follow us:
ఇండోనేషియాలో ఘోర ప్రమాదం చోటు చేసుకుంది. దక్షిణ కాలిమంటన్ ప్రావిన్స్ పరిధిలో అడవికి అంటుకున్న కార్చిచ్చును ఆర్పేందుకు నదిలో నీటిని తీసుకెళ్తుండగా ప్రమాదవశాత్తు అదే నదిలో హెలీకాప్టర్ కుప్పకూలింది. వెంటనే అప్రమత్తమైన స్థానికులు ముగ్గురు సిబ్బందిని కాపాడారు. ఈ ప్రమాదానికి సంబంధించిన విజువల్స్ వైరల్ గా మారుతోంది.
ఇండోనేషియాలోని దక్షిణ కాలిమంటన్ ప్రావిన్స్ పరిధిలోని బరిటో క్వాలా రీజెన్సీ ప్రాంతంలో గత కొన్ని రోజులుగా భీకరమైన కార్చిచ్చు చెలరేగింది. ఎండిపోయిన అడవులు, విపరీతమైన గాలుల కారణంగా మంటలు వేగంగా విస్తరించి స్థానిక ప్రజలను భయాందోళనకు గురిచేశాయి. ఈ కార్చిచ్చును త్వరగా అదుపులోకి తీసుకువచ్చేందుకు ఇండోనేషియా అధికార యంత్రాంగం అత్యవసర సహాయక చర్యలకు ప్రారంభించింది. ఇందులో భాగంగా ప్రత్యేకంగా శక్తివంతమైన ఫైర్ ఫైటింగ్ హెలికాప్టర్‌ను రంగంలోకి దించారు. ఆకాశం నుంచి నీటిని జారవిడిచి మంటలను ఆర్పుతూ ఆ హెలికాప్టర్ సహాయక చర్యలు ముమ్మరం చేసింది.”
“అయితే, ఈ సహాయక చర్యలు కొనసాగుతున్న సమయంలోనే ఆ హెలికాప్టర్‌కు అనుకోని ప్రమాదం జరిగింది. మంటలను ఆర్పేందుకు కావాల్సిన నీటిని నింపుకునే నిమిత్తం ఆ హెలికాప్టర్ సమీపంలో ఉన్న ఒక నది వైపునకు దిగింది. నది ఉపరితలానికి అతి తక్కువ ఎత్తులో వచ్చి నీటిని సేకరించే ప్రయత్నం చేస్తున్న ఆ సమయంలో.. పైలట్ అంచనా తప్పడంతో హెలికాప్టర్ ఒక్కసారిగా అదుపుతప్పింది. సాంకేతిక లోపమో లేక బ్యాలెన్స్ తప్పడమో జరగడంతో ఆ హెలికాప్టర్ అమాంతం నీటిలో కుప్పకూలిపోయింది. క్షణాల వ్యవధిలోనే హెలికాప్టర్ ముందు భాగం నదిలోకి మునిగిపోవడంతో అక్కడ తీవ్ర గందరగోళం నెలకొంది.”
“అసలేం జరుగుతుందో అర్థమయ్యే లోపే హెలికాప్టర్ నదిలో పడిపోవడాన్ని అక్కడే ఉన్న స్థానిక ప్రజలు స్వయంగా గమనించారు. క్షణం కూడా ఆలస్యం చేయకుండా వెంటనే అప్రమత్తమైన స్థానికులు తమ ప్రాణాలను సైతం లెక్కచేయకుండా పడవల్లో నదిలోకి దూసుకువెళ్లారు. మునిగిపోతున్న హెలికాప్టర్ వద్దకు చేరుకుని సాహసపేతమైన రెస్క్యూ ఆపరేషన్ చేపట్టారు. ఆ ప్రమాదంలో చిక్కుకుని ప్రాణభయంతో అల్లాడుతున్న ముగ్గురు సిబ్బందిని స్థానిక ప్రజలు చాకచక్యంగా సురక్షితంగా బయటకు రక్షించారు. సకాలంలో స్థానికులు స్పందించడంతో పెను ప్రమాదం తప్పి ప్రాణనష్టం పూర్తిగా తప్పింది.
“ప్రస్తుతం ఈ హెలికాప్టర్ ప్రమాదానికి సంబంధించిన భయానక దృశ్యాలు, స్థానికులు సిబ్బందిని కాపాడిన వీడియోలు సోషల్ మీడియాలో విపరీతంగా వైరల్ అవుతున్నాయి. ‘సకాలంలో స్పందించి ప్రాణాలు కాపాడిన ఆ స్థానిక ప్రజలే నిజమైన హీరోలు’ అంటూ నెటిజన్లు వారిపై ప్రశంసల వర్షం కురిపిస్తున్నారు.
