follow us:
మణిరత్నం ఇంజి వెల్లం రిలీజ్ డేట్ ఫిక్స్
జనవరి 29న ప్రపంచవ్యాప్తంగా గ్రాండ్ రిలీజ్
తొలిసారి జంటగా విజయ్ సేతుపతి, సాయి పల్లవి
సినిమా లవర్స్ ఎప్పుడెప్పుడా అని ఎదురుచూస్తున్న ఒక క్రేజీ కాంబినేషన్ ఇప్పుడు థియేటర్లలో సందడి చేయడానికి డేట్ ఫిక్స్ చేసుకుంది. లెజెండరీ డైరెక్టర్ మణిరత్నం, విలక్షణ నటుడు విజయ్ సేతుపతి, నేచురల్ బ్యూటీ సాయి పల్లవి.. ఈ ముగ్గురి కలయికలో వస్తున్న మోస్ట్ అవైటెడ్ మూవీ ‘ఇంజి వెల్లం’ విడుదల తేదీ అధికారికంగా వచ్చేసింది! ఇంతకీ అల్లం ఎవరు? బెల్లం ఎవరు? ఈ స్వీట్ అండ్ స్పైసీ లవ్ స్టోరీ ఎప్పుడు రాబోతోంది? ఆ విశేషాలేంటో ఇప్పుడు చూసేద్దాం!
సౌత్ ఇండియన్ సినిమాలో లెజెండరీ దర్శకుడు మణిరత్నం పేరు వింటేనే ప్రేక్షకుల్లో ఒక తెలియని మ్యాజిక్ మొదలవుతుంది. ముఖ్యంగా ఆయన తీసే ప్రేమకథలకు సెపరేట్ ఫ్యాన్ బేస్ ఉంటుంది. ఇప్పుడు మరోసారి తన మార్క్ రొమాంటిక్ డ్రామాతో ప్రేక్షకులను పలకరించడానికి సిద్ధమయ్యారు మణిరత్నం. ఆ సినిమానే ఇంజి వెల్లం. మక్కల్ సెల్వన్ విజయ్ సేతుపతి, నేచురల్ పెర్ఫార్మర్ సాయి పల్లవి తొలిసారి జంటగా నటిస్తున్న ఈ సినిమా రిలీజ్ డేట్‌ను చిత్రబృందం అఫీషియల్‌గా ప్రకటించింది. వచ్చే ఏడాది అంటే 2027 జనవరి 29న ఈ చిత్రాన్ని ప్రపంచవ్యాప్తంగా గ్రాండ్‌గా విడుదల చేయనున్నట్లు మద్రాస్ టాకీస్ సోషల్ మీడియా వేదికగా వెల్లడించింది. జనవరి 29 నుంచి ప్రపంచవ్యాప్తంగా ఇంజి వెల్లం సందడి షురూ’ అంటూ ఒక అందమైన మోషన్ పోస్టర్‌ను కూడా వదిలారు.
ఈ కొత్త పోస్టర్‌లో విజయ్ సేతుపతి, సాయి పల్లవి ఇద్దరు చిన్నపిల్లలతో కలిసి ఒక అందమైన ఫ్యామిలీ సెటప్‌లో చాలా సంతోషంగా కనిపిస్తున్నారు. ఇక గత సెప్టెంబర్‌లో వదిలిన టైటిల్ అనౌన్స్‌మెంట్ క్లిప్ అప్పట్లో సోషల్ మీడియాలో తెగ వైరల్ అయింది. ఇందులో ఇంజి అంటే అల్లం ఎవరు? వెల్లం అంటే బెల్లం ఎవరు? అంటూ విజయ్ సేతుపతి, సాయి పల్లవి మధ్య సాగిన సరదా సంభాషణ సినిమాపై అంచనాలను అమాంతం పెంచేసింది.
గతంలో మణిరత్నం దర్శకత్వంలో వచ్చిన చెక్క చివంత వానమ్ అంటే తెలుగులో ‘నవాబ్’ సినిమాలో విజయ్ సేతుపతి ఒక పవర్‌ఫుల్ రోల్ చేశారు. మళ్లీ ఇన్నాళ్లకు మణిరత్నం డైరెక్షన్‌లో విజయ్ సేతుపతి చేస్తున్న రెండో సినిమా ఇది. మరోవైపు సాయి పల్లవికి మణిరత్నంతో ఇదే మొదటి సినిమా కావడం విశేషం. ఇక ఈ సినిమాకు సంబంధించి మరో ఇంట్రెస్టింగ్ విషయం ఏంటంటే.. మణిరత్నం తన పర్ఫెక్ట్ ప్లానింగ్‌తో ఈ సినిమా షూటింగ్ మొత్తాన్ని కేవలం మూడు నెలల రికార్డు సమయంలోనే పూర్తి చేశారట. ఈ సినిమా మేజర్ భాగాన్ని కోల్‌కతాలోని అందమైన లొకేషన్లలో చిత్రీకరించారు. మద్రాస్ టాకీస్, లైకా ప్రొడక్షన్స్ పతాకాలపై మణిరత్నం, సుభాస్కరన్ ఈ చిత్రాన్ని సంయుక్తంగా నిర్మిస్తున్నారు.
మణిరత్నం సినిమా అంటే సంగీతం ప్రాణం. ఈ సినిమాకు కూడా ఆస్కార్ విజేత ఏఆర్ రెహమాన్ సంగీతం అందిస్తున్నారు. వీరిద్దరి కాంబినేషన్‌లో వస్తున్న 19వ సినిమా ఇది. వీరితో పాటు జాతీయ అవార్డు గ్రహీత శ్రీకర్ ప్రసాద్ ఎడిటింగ్, అవిక్ ముఖోపాధ్యాయ్ సినిమాటోగ్రఫీ అందిస్తున్నారు. థియేటర్లలో విడుదలైన తర్వాత ఈ సినిమా ప్రముఖ ఓటీటీ సంస్థ నెట్‌ఫ్లిక్స్‌లో స్ట్రీమింగ్ కానుంది.
చూశారు కదా! మణిరత్నం మ్యాజిక్, ఏఆర్ రెహమాన్ మ్యూజిక్, దానికి తోడు విజయ్ సేతుపతి, సాయి పల్లవిల నేచురల్ యాక్టింగ్.. ఈ లెక్కన జనవరి 29న థియేటర్లలో అల్లం ఘాటు, బెల్లం తీపి రెండూ కలిసిన ఒక అద్భుతమైన విందు ఖాయమనిపిస్తోంది.
