అప్సర హత్య కేసు : సినిమాను మించిన ట్విస్టులు.. అత్త ఆడియో కలకలం!

హైదరాబాద్‌లోని సరూర్ నగర్ అప్సర హత్య కేసు సినిమా ట్విస్టుల్లాగా రోజుకో మలుపు తీసుకుంటుంది. అదే ప్రాంతానికి చెందిన ఆలయ పూజారి సాయికృష్ణతో వివాహేతర సంబంధం కారణంగానే అప్సర హత్య జరిగిందని పోలీసులు వెల్లడించారు. పెళ్లై పిల్లలున్న తనను అప్సర పెళ్లి చేసుకోమని కోరడంతోనే బండరాయితో బాది చంపేసినట్లు నిందితుడు అంగీకరించాడంటూ పేర్కొన్నారు. అయితే ఆమె కేసు కొత్త మలుపులు తీసుకోవడం మొదలు పెట్టాయి. ఆమెకు గతంలోనే పెళ్లై అయ్యిందని కొన్ని ఫోటోలు బయటకు వచ్చాయి. అయితే తొలుత అతడు ఎవ్వరూ, ఇతర వివరాలు తెలియరాలేదు. అప్సర తల్లి అరుణను కూడా ఇదే విషయంపై వివరణ కోరితే.. తన కుమార్తెకు పెళ్లి అయిన సంగతి తర్వాత విషయమని, ముందు ఆమె చావుకు కారణమైన సాయిని శిక్షించాలంటూ మొర పెట్టుకుంది.

అప్సరకు గతంలో పెళ్లి అయిన విషయంపై తల్లి మాట్లాడుతూ.. ఆ ఫోటోలు ఎలా లీకయ్యాయో తనకు తెలియదని, పాత విషయాలు ఎందుకంటూ.. ఏదో దాచే ప్రయత్నం చేశారు. ఆ పెళ్లిపై స్పందించేందుకు నిరాకరించారు. అయితే ఇప్పుడు ఈ కేసులో కొత్త ట్విస్టు వెలుగులోకి వచ్చింది. అప్సర చేసుకున్న వ్యక్తి పేరు కార్తీక్ రాజా. అతడి తల్లి ధనలక్ష్మి.. అప్సర సంబంధించిన విస్తుపోయే విషయాలు ఆడియో ద్వారా విడుదల చేసింది. తమిళనాడుకు చెందిన కార్తీక్ సాఫ్ట్ వేర్ ఉద్యోగి కాగా.. అతడిని ప్రేమించి, పెళ్లి చేసుకుంది అప్సర.  తన కుమారుడ్ని అప్సర వేధించేదని, అవి తట్టుకోలేక అతడు ఆత్మహత్య చేసుకున్నాడని ఆ ఆడియోలో పేర్కొనడం కలకలం రేపుతోంది.

పెళ్లైన కొద్ది రోజులకే అప్సర, ఆమె తల్లి అరుణ.. తన కొడుకును వేధించడం మొదలు పెట్టారని ధనలక్ష్మి చెప్పారు. టూర్లకు తిప్పాలని, లగ్జరీ లైఫ్ కోసం అతడిని ఇబ్బందులకు గురి చేశారంటూ తెలిపారు. తన కొడుకుతూ అప్సర తరచూ గొడవపడుతుండేదని పేర్కొన్నారు. కార్తీక్ పై పోలీస్ కేసు పెట్టారని, దీంతో అతడిని అరెస్టు చేసి జైల్లో పెట్టారని వెల్లడించారు. జైలు నుండి వచ్చిన తన కుమారుడు మానసికంగా వేదన చెంది.. ఆత్మహత్య చేసుకున్నాడని తల్లి చెప్పారు. ఆ తర్వాత నుండి అప్సర, ఆమె తల్లి కనిపించలేదని, వారిద్దరూ హైదరాబాద్‌లో ఉన్నారన్న విషయం కూడా తమకు తెలియదన్నారు. వార్తలు చూసి తాను స్పందించినట్లు పేర్కొన్నారు.