నిన్నటిదాకా వరుస ఓటములు.. హఠాత్తుగా భారీ గెలుపు! RCB సక్సెస్​ సీక్రెట్ ఇదే..!

రాయల్ ఛాలెంజర్స్ బెంగళూరు జట్టు ప్లేఆఫ్స్ ఆశలు ఇంకా సజీవంగానే ఉన్నాయి. ప్లేఆఫ్స్​కు క్వాలిఫై అవ్వాలంటే తప్పక గెలవాల్సిన తరుణంలో ఆదివారం రాజస్థాన్ రాయల్స్​తో జరిగిన మ్యాచ్​లో బెంగళూరు సమష్టి కృషితో భారీ విజయాన్ని సొంతం చేసుకుంది. ఆ జట్టులోని బ్యాట్స్​మెన్​తో పాటు బౌలర్లు, ఫీల్డర్లు అద్భుతమైన ఆటతీరును ప్రదర్శించారు. ఈ మ్యాచ్​లో తొలుత బ్యాటింగ్​కు దిగిన ఆర్సీబీ 171 రన్స్ చేసింది. సారథి ఫాఫ్ డుప్లెసిస్​ (55), గ్లెన్ మ్యాక్స్​వెల్ (54) హాఫ్ సెంచరీలతో చెలరేగారు. ఇన్నింగ్స్ చివర్లో అనూజ్ రావత్ (29) మంచి ఫినిషింగ్ ఇచ్చాడు. ఆ తర్వాత ఆర్సీబీ బౌలర్ల ధాటికి ఛేదనలో రాజస్థాన్ రాయల్స్ 59 రన్స్​కే కుప్పకూలింది. ఆ టీమ్​లో షిమ్రన్ హెట్​మెయిర్ (35) ఒక్కడే రాణించాడు. మిగతా బ్యాట్స్​మెన్ అందరూ అలా వచ్చి ఇలా వెళ్లిపోయారు. బెంగళూరు బౌలర్లలో వేన్ పార్నెల్, మహ్మద్ సిరాజ్​తో పాటు బ్రేస్​వెల్, కర్ణ్​శర్మ కూడా బాగా రాణించారు.

రాజస్థాన్​ను ఇంత తక్కువ స్కోరుకే కట్టడి చేయడంలో ఇద్దరు ఆర్సీబీ బౌలర్లు కీలకపాత్ర పోషించారు. అందులో ఒకరు పార్నెల్ అయితే, మరొకరు బ్రేస్​వెల్. గత రెండు మ్యాచ్​ల్లో ఫెయిల్ అయిన స్పీడ్​స్టర్ జోష్ హేజెల్​వుడ్, స్పిన్నర్ వనిందు హసరంగ స్థానంలో చోటు దక్కించుకున్నారు పార్నెల్, బ్రేస్​వెల్. తమకు ఇచ్చిన అవకాశాన్ని సద్వినియోగం చేసుకొని రాజస్థాన్​ బ్యాటింగ్​ ఆర్డర్​ను కూల్చడంలో కీలక పాత్ర పోషించారు. పార్నెల్ 3 ఓవర్లలో 10 రన్స్ మాత్రమే ఇచ్చి మూడు వికెట్లు పడగొట్టాడు. బ్రేస్​వెల్ 3 ఓవర్లు వేసి 16 రన్స్ ఇచ్చి రెండు వికెట్లు తీశాడు. వరుస ఓటములతో డీలాపడ్డ ఆర్సీబీకి.. రాజస్థాన్​తో మ్యాచ్​లో వీళ్లిద్దర్నీ తీసుకోవడం కలిసొచ్చింది. జాస్ బట్లర్, సంజూ శాంసన్, పడిక్కల్ లాంటి డేంజరస్ బ్యాట్స్​మెన్​ను వీళ్లు త్వరగా పెవిలియన్​కు పంపారు. రాజస్థాన్​తో మ్యాచ్​లో గొప్పగా రాణించిన పార్నెల్, బ్రేస్​వెల్ తర్వాతి మ్యాచుల్లో కూడా తమ ప్రతిభకు తగ్గట్లుగా ఆడితే ఆర్సీబీ ప్లేఆఫ్స్​కు చేరినా ఆశ్చర్యపోనక్కర్లేదు.

RCB’s move of replacing Josh Hazlewood and Wanindu Hasaranga with Wayne Parnell and Michael Bracewell turned out to be game-deciding.

📸: IPL/BCCI pic.twitter.com/1Qejj5bCVT

— CricTracker (@Cricketracker) May 14, 2023