follow us:
ఇండిగో విమానానికి బాంబు బెదిరింపు రావడంతో శంషాబాద్ ఎయిర్ పోర్ట్ లో అధికారులు అలర్ట్ అయ్యారు. అహ్మదాబాద్ నుండి శంషాబాద్ ఎయిర్ పోర్ట్ కు వస్తున్న ఇండిగో విమానానికి బాంబు బెదిరింపు కలకలం రేపింది. విమానంలో ఉన్న ఓ విద్యార్థిని బాంబు ఉందంటూ చెప్పడంతో అప్రమత్తమైన అధికారులు శంషాబాద్ విమానాశ్రమంలో విమానాన్ని ల్యాండింగ్ చేసి తనిఖీలు చేశారు..
అహ్మదాబాద్ నుంచి శంషాబాద్ ఎయిర్ పోర్ట్‌కు బయలుదేరిన ఇండిగో విమానం ప్రయాణం ప్రశాంతంగా సాగుతోంది. అయితే, విమానం గాల్లో ఉండగా ఊహించని పరిణామం చోటుచేసుకుంది. ఆ విమానంలో ప్రయాణిస్తున్న ఓ విద్యార్థిని అనుకోకుండా ‘విమానంలో బాంబు ఉంది’ అని చెప్పడం..
ఈ మాట వినగానే తోటి ప్రయాణికులతో పాటు విమాన సిబ్బంది గుండెలు ఒక్కక్షణం ఆగిపోయినంత పనైంది. వెంటనే అప్రమత్తమైన పైలట్, శంషాబాద్ ఎయిర్‌పోర్ట్ అధికారులకు అత్యవసర సమాచారం అందించారు. హైదరాబాద్‌లోని రాజీవ్ గాంధీ అంతర్జాతీయ విమానాశ్రయంలో ఆ విమానం ల్యాండ్ కాగానే, ఎయిర్‌పోర్ట్ ఒక్కసారిగా భద్రతా బలగాల వలయంలోకి వెళ్లిపోయింది. ఇక ఈ విమానంలో హైదరాబాద్‌లోని ప్రముఖ ‘సుచిత్ర అకాడమీ’ స్కూల్‌కి చెందిన 47 మంది విద్యార్థులు ఎక్స్‌కర్షన్ కు వెళ్లి, తిరిగి అదే ఫ్లైట్‌లో వస్తున్నారు. పిల్లలందరూ క్షేమంగా ఉన్నారా లేదా అనే టెన్షన్ వారి తల్లిదండ్రులను కంటిమీద కునుకు లేకుండా చేసింది. విమానం ల్యాండ్ అయిన వెంటనే, భద్రతా ప్రోటోకాల్స్ ప్రకారం ప్రయాణికులందరినీ అత్యంత సురక్షితంగా కిందకు దించారు. ఆ తర్వాత విమానాన్ని ఎవరికీ అందుబాటులో లేని ‘ఐసోలేషన్ బే’ ప్రాంతానికి తరలించారు. రంగంలోకి దిగిన బాంబ్ స్క్వాడ్, డాగ్ స్క్వాడ్ సిబ్బంది విమానం మూలమూలా వెతికారు. ప్రయాణికుల లగేజీని కూడా క్షుణంగా తనిఖీ చేశారు. అయితే, ప్రాథమిక విచారణలో అది కేవలం ఒక ఆందోళనకర వ్యాఖ్య మాత్రమేనని తేలడంతో అంతా ఊపిరి పీల్చుకున్నారు.
అయితే శంషాబాద్ ఎయిర్‌పోర్ట్‌లో ఇలాంటి ఘటన జరగడం ఇదే మొదటిసారి కాదు. గతంలోనూ పలుమార్లు ఇలాంటి బాంబు బెదిరింపులు దేశవ్యాప్తంగా కలకలం రేపాయి. ముఖ్యంగా సోషల్ మీడియా వేదికగా లేదా ఆకతాయిల ఫోన్ కాల్స్ ద్వారా విమానాలకు బాంబు బెదిరింపులు రావడం ఇటీవల కాలంలో ఎక్కువైంది. గత ఏడాది కాలంలో దేశవ్యాప్తంగా వందలాది దేశీయ, అంతర్జాతీయ విమానాలకు ఇలాంటి నకిలీ బెదిరింపులే వచ్చాయి. దీనివల్ల ఎయిర్‌పోర్ట్ అధికారులకు, భద్రతా బలగాలకు కంటిమీద కునుకు లేకుండా పోయింది. గంటల తరబడి విమానాలు నిలిచిపోవడం వల్ల ప్రయాణికులు పడే నరకం అంతా ఇంతా కాదు. కోట్ల రూపాయల నష్టం వాటిల్లడంతో పాటు, భద్రతా వ్యవస్థల సమయం వృధా అవుతోంది. ఇక అదృష్టవశాత్తూ ఈ ఘటనలో ఎలాంటి ప్రమాదం జరగకపోవడంతో విద్యార్థుల తల్లిదండ్రులు, అధికారులు ఊపిరి పీల్చుకున్నారు. పిల్లలు సురక్షితంగా ఇళ్లకు చేరడంతో అంతా సద్దుమణిగింది. అయితే, ఇలాంటి సెన్సిటివ్ జోన్లలో ప్రయాణించేటప్పుడు ప్రతి ఒక్కరూ ఎంత అప్రమత్తంగా ఉండాలో ఈ ఘటన హెచ్చరిస్తోంది.
