ఏపీకి వస్తున్న సీఎం విజయ్.. చంద్రబాబు, పవన్ కల్యాణ్‌తో భేటీ ఎందుకంటే?

తమిళనాడు సీఎం విజయ్ ఏపీలో పర్యటించనున్నారు. ఈ నెల 13న ఆయన విజయవాడకు రానున్నారు. ఏపీ, తమిళనాడు రాష్ట్రాల మధ్య నెలకొన్న జల వివాదాల పరిష్కారంపై ఆయన ఇరువురు సీఎంలు చర్చించనున్నారు. ఈ చర్చల్లో భాగంగా సీఎం చంద్రబాబు, డిప్యూటీ సీఎం పవన్ కల్యాణ్‌తో ఆయన సమావేశం కానున్నారు. ప్రధానంగా తెలుగు గంగ ప్రాజెక్టు కింద కృష్ణా జలాల సరఫరాలో ఏర్పడిన లోటు, ఏపీ ప్రభుత్వం నిర్మించతలపెట్టిన డ్యామ్‌లు, నదుల అనుసంధానం వంటి అంశాలు ఈ భేటీలో ప్రస్తావనకు రానున్నాయి.

తెలుగు గంగ ఒప్పందం ప్రకారం.. ఆంధ్రప్రదేశ్ ఏటా 12 టీఎంసీల కృష్ణా జలాలను తమిళనాడుకు రాష్ట్ర సరిహద్దు వద్ద అందించాల్సి ఉంది. అయితే, ఈ ఏడాది అక్టోబర్ 9 నాటికి కేవలం 2.251 టీఎంసీల నీరు మాత్రమే అందింది. ఒప్పందం ప్రకారం రావాల్సిన నీటికి, ఇప్పటివరకు అందిన నీటికి మధ్య 9.749 టీఎంసీల భారీ వ్యత్యాసం ఉంది. ఈ నీటి కొరత అంశమే ఇద్దరు ముఖ్యమంత్రుల భేటీలో ప్రధాన చర్చనీయాంశంగా మారనుంది. ఈ ఏడాదిలో మిగిలిన కాలానికి తమిళనాడు నీటి అవసరాలను సమీక్షించి, సరఫరాను గాడిన పెట్టేందుకు ఈ సమావేశం ఒక అవకాశంగా నిలవనుంది.

కృష్ణా జలాల వాటాతో పాటు తమిళనాడులోకి ప్రవహించే నదులపై ఆంధ్రప్రదేశ్ ప్రభుత్వం డ్యామ్‌లు నిర్మించేందుకు చేస్తున్న కసరత్తుపై కూడా సీఎం విజయ్ తన ఆందోళనలను చంద్రబాబు దృష్టికి తీసుకురానున్నారు. ఈ డ్యామ్‌ల నిర్మాణం వల్ల దిగువ రాష్ట్రమైన తమకు నీటి లభ్యతపై తీవ్ర ప్రభావం పడుతుందని తమిళనాడు భావిస్తోంది. ఈ నేపథ్యంలో ప్రతిపాదిత డ్యామ్‌ల అంశం కూడా చర్చల ఎజెండాలో కీలకంగా ఉండనుంది. దీంతో పాటు నదుల అనుసంధానంపై కూడా ఇరు రాష్ట్రాల మధ్య సంప్రదింపులు జరిగే అవకాశం ఉంది.

ఈ పర్యటనలో భాగంగా సీఎం విజయ్, ఆంధ్రప్రదేశ్ డిప్యూటీ సీఎం పవన్ కల్యాణ్‌తో పాటు ఇతర మంత్రులతో కూడా సమావేశం కానున్నారని సమాచారం. ఇరు రాష్ట్రాల రాజకీయ నాయకత్వాల మధ్య ప్రత్యక్ష చర్చల ద్వారా దీర్ఘకాలంగా ఉన్న నీటి సమస్యలకు ఒక పరిష్కారం కనుగొనాలని తమిళనాడు ప్రభుత్వం భావిస్తోంది. ఈ ఉన్నతస్థాయి సమావేశం తర్వాత వెలువడే నిర్ణయాలు రెండు రాష్ట్రాల మధ్య జల సంబంధాలపై స్పష్టతనిస్తాయని విశ్లేషకులు భావిస్తున్నారు.