follow us:
ఏపీ, తెలంగాణ వాసులకు కేంద్ర ప్రభుత్వం గుడ్‌ న్యూస్ చెప్పింది. రెండు రాష్ట్రాలను కలుపుతూ.. ఐకానిక్ కేబుల్ కమ్‌ సస్పెన్షన్‌ బ్రిడ్జి నిర్మాణం చేపటనున్నట్లు వెల్లడించింది. ఈ మేరకు కేంద్ర రోడు రవాణా, రహదారుల మంత్రి నితిన్‌ గడ్కరీ ట్వీట్‌ చేశాడు. అంతేకాక ఐకానిక్ బ్రిడ్జి ఎలా ఉండనుందో ఫోటోలను కూడా షేర్‌ చేశాడు గడ్కరీ. 1082.56 కోట్ల రూపాయల భారీ వ్యయంతో నిర్మించే ఈ బ్రిడ్జిని 30 నెలల్లో పూర్తి చేయనున్నట్లు ప్రకటించారు. ఈ మేరకు ఆయన ట్వీట్‌ చేశారు. దేశంలో ప్రపంచ స్థాయి మౌలిక సదుపాయాల కల్పనే లక్ష్యంగా కేంద్ర ప్రభుత్వం ఈ కీలక నిర్ణయం తీసుకుంది. ఇక దేశంలో ఈ తరహా కేబుల్ బ్రిడ్జి ఇదే మొదటిది కావడం విశేషం. అంతేకాక ఇది ప్రపంచంలోనే రెండో చారిత్రాత్మక వంతెనగా నిలవనుంది అన్నారు నితిన్‌ గడ్కరీ.
ఇక ఈ బ్రిడ్జిపై వాహనాల రాకపోకల కోసం రహదారితో పాటు.. పాదచారుల కోసం గాజు నడక మార్గాన్ని ఏర్పాటు చేయనున్నారు. బ్రిడ్జి కింది భాగంలో ఈ వాక్‌వేను నిర్మిస్తారు. గ్లాస్ వాక్‌వేలో నడుస్తుంటే.. కింద కృష్ణమ్మ అందాలను ఆస్వాదించే విధంగా దీనిని తీర్చిదిద్దనున్నారు. ఈ ఐకానిక్ బ్రిడ్జి మీద.. పాదచారులు కోసం పొడవైన గాజు మార్గం, పైలాన్‌, సిగ్నేచర్ లైటింగ్, పెద్ద నావిగేషనల్ స్పాన్ వంటి అనేక ప్రత్యేకతలు కలిగి ఉండనుంది. బ్రిడ్జి చుట్టూ.. నల్లమల అడవులు, ఎత్తైన పర్వతాలు, విశాలమైన శ్రీశైలం రిజర్వాయర్‌ బ్యాక్ వాటర్‌తో ఎంతో ఆహ్లాదకర వాతావరణం ఉంది.
అలానే ఈ బ్రిడ్జికి తెలంగాణ రాష్ట్రం వైపున లలిత సోమేశ్వర స్వామి ఆలయం ఉండనుండగా.. ఆంధ్రప్రదేశ్ వైపున సంగమేశ్వరం ఆలయం ఉంటాయి. ఇరువైపున ఆలయాలు, ఐకానిక్ బ్రిడ్జి అందాలు, కృష్ణమ్మ పరవళ్లను చూస్తూ.. పచ్చటి ప్రకృతిని ఆస్వాదించే ప్రత్యేకతలు ఉన్నందున.. భవిష్యత్తులో ఈ ప్రాంతానికి పర్యాటకంగా డిమాండ్‌ పెరుగుతుందని కేంద్రం భావిస్తోంది. ఈ వంతెన నిర్మాణం పూర్తయితే.. ఇరు రాష్ట్రాల ప్రజలకు ఎంతో లాభం కలగనుంది. ఈ వంతెన వినియోగంలోకి వస్తే.. ప్రయాణ ఇక్కట్లు తప్పుతాయి అంటున్నారు పరిసర ప్రాంత ప్రజలు. ప్రస్తుతం తెలంగాణలోని కొల్లాపూర్ నుంచి ఆంధ్రప్రదేశ్‌‌లోని కర్నూలు, నంద్యాల ప్రాంతాలకు రాకపోకలు సాగించాలంటే కృష్ణా నదే దిక్కు. అది కూడా పడవలోనే ప్రయాణించాలి. అలా కాదనుకుంటే.. రోడ్డుమార్గంలో రాకపోకలు సాగించాలంటే సుమారు 100 కిలోమీటర్లు చుట్టు తిరిగి రావాలి.
ఈ క్రమంలో బ్రిడ్జి పూర్తైతే.. ఈ కష్టాలు తప్పుతాయి అంటున్నారు జనాలు. ఈ వంతెన నిర్మాణం పూర్తయితే హైదరాబాద్‌ నుంచి కడప, చిత్తూరు, తిరుపతి వెళ్లేవారు కర్నూలు మీదుగా వెళ్లాల్సిన అవసరం ఉండదు. బ్రిడ్జి మీది నుంచి నేరుగా వెళ్లిపోవచ్చు. దీనివల్ల హైదరాబాద్‌ నుంచి తిరుపతికి ప్రయాణ దూరం సుమారు 80 కిలోమీటర్లు తగ్గుతుంది అని భావిస్తున్నారు. పర్యాటకంగా మాత్రమే కాక.. రెండు రాష్ట్రాల ప్రజలకు దూరభారం తగ్గించే ప్రయోజనం ఉండే ఈ బ్రిడ్జి నిర్మాణం త్వరగా పూర్తవ్వాలని ప్రజలు ఆశిస్తున్నారు.
Bringing Prosperity Through World Class Infrastructure in New India
Iconic cable-stayed cum suspension bridge across Krishna river in Andhra Pradesh and Telangana has been approved at total cost of Rs 1082.56 Cr with the construction period of 30 months. #PragatiKaHighway pic.twitter.com/elKeMRhL4m
— Nitin Gadkari (@nitin_gadkari) October 13, 2022
