ప్రీతి ఘటన గడవక ముందే తెలంగాణలో మరో విద్యార్థిని ఆత్మహత్య

సీనియర్ విద్యార్థి వేధింపులు తట్టుకోలేక వరంగల్ కాకతీయ మెడికల్ కాలేజీ విద్యార్థిని ప్రీతి ఆత్మహత్య చేసుకున్న విషయం విదితమే. రెండు తెలుగు రాష్ట్రాల్లో ఈ ఘటన సంచలనంగా మారింది. ప్రీతి మరణానికి కారణమైన నిందితుడ్ని కఠినంగా శిక్షించాలని సామాన్య జనం దగ్గరి నుంచి సెలెబ్రిటీల వరకు అందరూ డిమాండ్ చేస్తున్నారు. ఈ ఘటన గడవక ముందే తెలంగాణలో మరో విద్యార్థిని సూసైడ్ చేసుకోవడం కలకలం రేపుతోంది. హనుమకొండ జిల్లా, ఎల్కతుర్తి మండలం గోపాలపూర్​లో విషాదం చోటుచేసుకుంది. పోగుల ఉషారాణి అనే స్టూడెంట్ ఇంట్లో ఎవరూ లేని సమయంలో ఉరి వేసుకుంది. కూతురి మృత దేహాన్ని చూసి తల్లిదండ్రులు బోరున విలపిస్తున్నారు.

ఉషా రాణి ఆత్మహత్యకు ప్రేమ వ్యవహారమే కారణమని సమాచారం. జయశంకర్ భూపాలపల్లి జిల్లాకు చెందిన ఓ యువకుడు ప్రేమించి మోసం చేయడంతో ఆమె మనస్తాపానికి గురై సూసైడ్ చేసుకుందని ప్రాథమిక సమాచారం. అయితే.. ఈ ఘటన మీద కేసు నమోదు చేసుకున్న పోలీసులు.. ఉషారాణి మృతదేహాన్ని హుజూరాబాద్ ఏరియా హాస్పిటల్​కు తరలించారు. కాగా.. రాష్ట్రంలో విద్యార్థినులు వరుసగా సూసైడ్​లు చేసుకోవడం కలకలం రేపుతోంది. మెడికల్ స్టూడెంట్ ప్రీతి ఘటన రాష్ట్రాన్ని ఉలిక్కిపడేలా చేసింది. అలాగే వరంగల్​ జిల్లాలోని నర్సంపేటలో ఇంజినీరింగ్ విద్యార్థిని ఆత్మహత్య చేసుకోవడం కలకలం రేపింది. ఈ ఘటనలో ఆత్మహత్యకు తొలుత ర్యాగింగ్ అని ప్రచారం జరిగినా.. దాన్ని కళాశాల యాజమాన్యం ఖండించింది.