follow us:
అదే జరిగితే.. ఖైరతాబాద్ ఎమ్మెల్యే నేనే! ఎన్నికల బరిలో మరోసారి చెమటోడ్చాల్సిన పని లేకుండా, నేరుగా చట్టపరంగానే అసెంబ్లీ పీఠం ఎక్కుతానని ధీమా వ్యక్తం చేస్తున్నారు కాంగ్రెస్ నేత విజయారెడ్డి. ఇక విజయారెడ్డి వ్యాఖ్యలతో ఖైరతాబాద్ రాజకీయాల్లో టెన్షన్ తారాస్థాయికి చేరింది. అసలు దానం నాగేందర్ అనర్హత వెనుక ఉన్న కథ ఏంటి? ఉపఎన్నిక వస్తుందా లేదా? విజయారెడ్డి వేసిన ఆ మాస్టర్ ప్లాన్ పిటిషన్ రాజకీయం ఏమిటి తెలుసుకుందాం.
తెలంగాణ రాజకీయాల్లో ఖైరతాబాద్ నియోజకవర్గం ఎప్పుడూ హాట్ టాపిక్‌గానే ఉంటుంది. 2023 అసెంబ్లీ ఎన్నికల్లో ఇక్కడ గెలుపొందిన దానం నాగేందర్ రాజకీయం అనూహ్య మలుపులు తిరిగింది. ఆయన అనర్హతకు గురికావడంతో ఈ స్థానం ఖాళీ అయింది. సుప్రీంకోర్టు కూడా ఆయన అనర్హతను సమర్థించడంతో ఖైరతాబాద్‌లో ఉపఎన్నికకు లైన్ క్లియర్ అయిందని అందరూ అనుకున్నారు. కానీ, ఇక్కడే అసలు ట్విస్ట్ ఇచ్చారు కాంగ్రెస్ నేత విజయారెడ్డి. 2023 ఎన్నికల్లో తన ఓటమిని, దానం నాగేందర్ గెలుపును సవాల్ చేస్తూ ఆమె హైకోర్టులో ఒక ఎన్నికల పిటిషన్ దాఖలు చేశారు. ప్రస్తుతం ఆ పిటిషన్ హైకోర్టులో పెండింగ్‌లో ఉంది.: తాజాగా మీడియాతో మాట్లాడిన విజయారెడ్డి కీలక వ్యాఖ్యలు చేశారు. ఈ కేసుపై పూర్తి నమ్మకం ఉందని, తన వాదనలను కోర్టు పరిగణనలోకి తీసుకుంటుందని ధీమా వ్యక్తం చేశారు. ఒకవేళ కోర్టు గనుక దానం నాగేందర్ ఎన్నిక చెల్లదని తేల్చితే.. చట్టప్రకారం తనను ఎమ్మెల్యేగా ప్రకటించే అవకాశం ఉందని ఆమె ధైర్యంగా చెబుతున్నారు. అంతేకూడా, తుది తీర్పు రాకముందే ఉపఎన్నిక నిర్వహించడంపై ఆమె తీవ్ర అభ్యంతరం వ్యక్తం చేశారు. ఈ విషయంలో సుప్రీంకోర్టు స్పష్టమైన తీర్పులు ఉన్నాయని, ఒకవేళ తన పిటిషన్‌ను పక్కన పెట్టి ఎన్నికలకు వెళ్తే ఊరుకునేది లేదని, మళ్లీ న్యాయస్థానాన్ని ఆశ్రయిస్తానని విజయారెడ్డి హెచ్చరించారు. ఒకవేళ తన పిటిషన్ పై తీర్పు అనుకూలంగా వస్తే.. ఖైరతాబాద్ ఎమ్మెల్యే నేనే’ అని ఆమె గట్టిగా నమ్ముతుండడం ఇప్పుడు రాష్ట్ర రాజకీయాల్లో చర్చనీయాంశమైంది.
ఈ పొలిటికల్ డ్రామాలో ఎన్నికల సంఘం కూడా తన వైఖరిని స్పష్టం చేసింది. విజయారెడ్డి దాఖలు చేసిన ఎన్నికల పిటిషన్ తేలే వరకు ఖైరతాబాద్ ఉపఎన్నికకు నోటిఫికేషన్ ఇవ్వబోమని ఈసీ తరఫు న్యాయవాది హైకోర్టుకు తేల్చిచెప్పారు. దీనిపై అధికారిక అఫిడవిట్ దాఖలు చేయాలని కోర్టు ఆదేశించగా.. తదుపరి విచారణను అక్టోబర్ 6కి వాయిదా వేసింది. అంటే అక్టోబర్ 6న కోర్టు ఇచ్చే తీర్పు లేదా ఆదేశాలపైనే ఖైరతాబాద్ భవితవ్యం ఆధారపడి ఉంది. ఉపఎన్నిక వస్తుందా? లేక కోర్టు తీర్పుతోనే ఎమ్మెల్యే మారుతారా? అనేది ఇప్పుడు మిలియన్ డాలర్ల ప్రశ్న. ఒక వేళ ఉపఎన్నిక జరిగితే కాంగ్రెస్ అధిష్ఠానం ఎలాంటి అభ్యర్థిని ఖరారు చేస్తుంది? ఒకవేళ కోర్టు తీర్పు అనుకూలంగా వస్తే విజయారెడ్డికి దక్కే అవకాశం ఎంత? ఇవన్నీ తేలాలంటే మరికొన్ని రోజులు వేచి చూడాల్సిందే.
