follow us:
ఏషియన్ గేమ్స్ 2026 పురుషుల క్రికెట్ విభాగంలో భారత జట్టు ఘనవిజయంతో ఫైనల్లోకి అడుగుపెట్టింది. నేడు జరిగిన రెండో సెమీఫైనల్ మ్యాచ్‌లో శ్రీలంకపై 124 పరుగుల భారీ తేడాతో విజయం సాధించి, గోల్డ్ మెడల్ రేసులో నిలిచింది. టాస్ ఓడి తొలుత బ్యాటింగ్‌కు దిగిన టీమిండియా, కఠినమైన పిచ్‌పై వికెట్లు పడుతున్నా ఇషాన్ కిషన్ (80 నాటౌట్) బాధ్యతాయుతమైన ఇన్నింగ్స్‌కి తోడు వైభవ్ సూర్యవంశీ (38) మెరుపులతో నిర్ణీత 20 ఓవర్లలో 7 వికెట్ల నష్టానికి 169 పరుగులు చేసింది. మిగతా బ్యాటర్లలో అభిషేక్ శర్మ (7), సంజూ శాంసన్ (7), శ్రేయస్ అయ్యర్ (13), అక్షర్ పటేల్ (8), తిలక్ వర్మ (2), శివమ్ దూబే (3) నిరాశపరిచినా, కిషన్ పోరాటంతో భారత్ గౌరవప్రదమైన స్కోరు సాధించగలిగింది..
అనంతరం 170 పరుగుల రక్షణలో భారత బౌలర్లు నిప్పులు చెరిగే బౌలింగ్‌తో లంకను ఆడుకోనిచ్చారు. జస్ప్రీత్ బుమ్రా, అక్షర్ పటేల్, అభిషేక్ శర్మ తలో రెండు వికెట్లతో విరుచుకుపడగా, వాషింగ్టన్ సుందర్ ఒక వికెట్‌తో సహకరించాడు. ఫలితంగా శ్రీలంక జట్టు కేవలం 9.5 ఓవర్లలో 45 పరుగులకే కుప్పకూలింది. లంక ఇన్నింగ్స్‌లో ఏకంగా ఐదుగురు బ్యాటర్లు సున్నా (డకౌట్)కే వెనుతిరగగా, నువనిదు ఫెర్నాండో (15) ఒక్కడే రెండంకెల స్కోరు చేయగలిగాడు..
ఈ అద్భుత విజయంతో అక్టోబర్ 3న ఉదయం 10:00 గంటలకు జరిగే హై-వోల్టేజ్ ఫైనల్ పోరులో భారత్ తమ చిరకాల ప్రత్యర్థి పాకిస్తాన్‌తో తలపడనుంది. ఈ తుది పోరులో గెలిచిన జట్టుకు స్వర్ణ పతకం వరిస్తుండగా, ఓడిన జట్టు రజత పతకంతో సరిపెట్టుకుంటుంది. మరోవైపు, సెమీస్‌లో పరాజయం పాలైన శ్రీలంక, బంగ్లాదేశ్ జట్లు అదే రోజు ఉదయం 5:30 గంటలకు కాంస్య పతకం (బ్రోంజ్ మెడల్) కోసం పోటీపడనున్నాయి.
