ప్రపంచంలోనే అతి పెద్ద మెరుపు.. ఎక్కడంటే

సాధారణంగా వర్షాకాలంలో ఉరుములు, మెరుపులు, పిడుగు పడటం వంటి సంఘటనలు చోటు చేసుకుంటాయి. ఇక ఆకాశం మేఘావృతమయి.. నల్ల మబ్బులు దట్టంగా వ్యాపించిన వేళ.. ఉన్నట్లుండి ఆకాశంలో ఓ మెరుపు మెరిసి.. ఆహ్లదకరమైన అనుభూతిని మిగుల్చుతుంది. పెద్ద వెలుగుతో కొన్ని సెకన్లు మాత్రమే ఈ వెలుగు కనిపించి.. ఆ తర్వాత మాయం అవుతుంది. మరి కాసేపు ఉంటే బాగుండు కదా అనిపిస్తుంది. ఇప్పటివరకు మనకు మెరుపు అనగానే.. కొన్ని కిలోమీటర్ల మేర వ్యాపిస్తుందని తెలుసు. కానీ వందల కిలోమీటర్ల మేర వ్యాపించిన మెరుపును చూశారా.. కనీసం విన్నారా లేదా.. అయితే ఇది చదవండి.

ప్రపంచంలోనే అతి పెద్ద మెరుపును అమెరికాలో గుర్తించినట్లు ఐక్యరాజ్య సమితికి చెందిన ప్రపంచ వాతావరణ సంస్థ (డబ్ల్యూఎంఓ) తాజాగా వెల్లడించింది. 2020, ఏప్రిల్‌ లో అమెరికా దక్షిణ ప్రాంతంలో దాదాపు 770 కిలోమీటర్ల మేర వ్యాపించిన ఈ మెరుపు సరికొత్త రికార్డు నెలకొల్పినట్లు డబ్ల్యూఎంఓ తెలిపింది. మిసిపిపీ, లూసియానా, టెక్సాస్‌ ల మీదుగా ఇది విస్తరించినట్లు సంస్థ వెల్లడించింది.

2018 అక్టోబరులో దక్షిణ బ్రెజిల్‌లో నమోదైన మునుపటి రికార్డు కంటే ఈ మెరుపు 60 కిలోమీటర్ల మేర అధికంగా వ్యాపించినట్లు పేర్కొంది. మెరుపులకు సంబంధించి మరో ప్రపంచ రికార్డునూ డబ్ల్యూఎంఓ నిపుణుల కమిటీ నమోదు చేసింది. 2020 జూన్‌లో ఉరుగ్వే, ఉత్తర అర్జెంటీనాపై ఏర్పడిన ఓ మెరుపు ఏకంగా 17.1 సెకన్లపాటు నిలిచినట్లు తెలిపింది. ఈ ప్రాంతంలోనే 2019 మార్చిలో నమోదైన మునుపటి రికార్డు కంటే ఇది 0.37 సెకన్లు ఎక్కువ.

మెరుపు ఘటనలకు సంబంధించిన అసాధారణ రికార్డులివి అని డబ్ల్యూఎంఓ ప్రతినిధి రాండాల్‌ సెర్వెనీ ఓ ప్రకటనలో తెలిపారు. ప్రకృతి శక్తి సామర్థ్యాలకు ఇవి కొలమానం అన్నారు. మెరుపుల పొడవు, వ్యవధిని గుర్తించడానికి ఉపయోగించే సాంకేతికత ఇటీవల కాలంలో చాలా మెరుగుపడినట్లు తెలిపారు. శాటిలైట్‌ లైట్నింగ్‌ ఇమేజరీ టెక్నాలజీ తదితర సాంకేతికతలు వచ్చినట్లు రాండాల్‌ వెల్లడించారు. మెరుపులను గుర్తించే సాంకేతికత మెరుగుపడుతుంన్నందున ఇంకా ఎక్కువ తీవ్రత గల వాటిని గుర్తించే అవకాశం ఉందని రాండాల్‌ తెలిపారు. దీనిపై మీ అభిప్రాయాలను కామెంట్స్‌ రూపంలో తెలియజేయండి.