చర్చ రేపుతున్న ట్రంప్-మోదీ ట్వీట్స్, అమెరికాను నమ్మొచ్చా

నువ్వెంతంటే నువ్వెంతనుకున్న ఇండియా అమెరికాలు ఇప్పుడు మళ్లీ మెతకబడుతున్నట్టున్నాయి. ఎవరు తగ్గారు. ఎవరు గెలిచారనేది అప్రస్తుతమే అయినా రెండు దేశాల అగ్రనేతల ట్వీట్స్ ఇప్పుడు చర్చనీయాంశంగా మారుతున్నాయి. మోదీతో మాట్లాడేందుకు ట్రంప్ సంసిద్ధత వ్యక్తం చేయగా మోదీ కూడా దీనికోసమే ఎదురు చూస్తున్నాననడం గమనార్హం.

రష్యా నుంచి చమురు కొనుగోళ్ల నేపధ్యంలో ఆగ్రహించిన అమెరికా అధ్యక్షుడు డోనాల్డ్ ట్రంప్ ఇండియా చేసే ఎగుమతులపై 50 శాతం సుంకాలు విధించడంతో రెండు దేశాల మధ్య సంబంధాలు చెడిపోయాయి. ట్రంప్‌తో పాటు ఆ దేశ మంత్రులు కూడా ఇండియాకు వార్నింగ్ ఇవ్వడం మొదలెట్టారు. మరోవైపు ఇండియా ప్రత్యామ్నాయ మార్కెట్‌పై దృష్టి సారించి అందుకు అనుగుణంగా చర్యలు చేపట్టింది. షాంఘై సదస్సులో చెన్నై, రష్యా దేశాధినేతలతో కలిసి కొత్త సంకేతాలిచ్చింది. ట్రంప్ బెదిరింపులకు లొంగేది లేదని స్పష్టం చేసింది. ఐటీ ఎగుమతులపై కూడా సుంకాలు విధించనున్నట్టు బెదిరింపులకు పాల్పడింది అగ్రరాజ్యం. ఇండియాను దారిలో తెచ్చుకునేందుకు అన్ని రకాల ప్రయత్నాలు చేస్తోంది. అటు ఇండియా కూడా అమెరికాకు దీటుగా ప్రత్యామ్నాయ మార్గాలు అణ్వేషించసాగింది. దేశీయ వినిమయాన్ని పెంచేందుకు జీఎస్టీ తగ్గిస్తూ కీలక నిర్ణయం తీసుకుంది.

ఇరుదేశాల మధ్య సంబంధాలు చెడిపోతూ ప్రశ్నార్ధకంగా మారుతున్న తరుణంలో అమెరికా అధ్యక్షుడు డోనాల్డ్ ట్రంప్ చేసిన ట్వీట్..అందుకు ప్రధాని మోదీ ఇచ్చిన రిప్లై ఇప్పుడు చర్చనీయాంశమౌతోంది. రెండు దేశాల మధ్య సంబందాలు తిరిగి మెరుగుపడవచ్చనే ఆలోచన రేగుతోంది. సుంకాల విషయంలో రాబోయే రోజుల్లో ఇండియాతో చర్చలుంటాయని ట్రంప్ ట్వీట్ చేశారు. రెండు దేశాలు సన్నిహిత మిత్రులని, వాణిజ్య చర్చలు రెండు దేశాల భాగస్వామ్య సామర్ధ్యాన్ని పెంచేదిశగా మార్గం సుగమం చేస్తాయని నమ్ముతున్నానని ట్రంప్ వ్యాఖ్యానించారు. చర్చలు వీలైనంత త్వరగా ముగించేందుకు తమ బృందాలు ప్రయత్నిస్తున్నాయన్నారు. నా సన్నిహిత మిత్రుడు ప్రధాని మోదీతో మాట్లాడతానన్నారు.

ట్రంప్ ట్వీట్‌కు ప్రధాని మోదీ కూడా బదులిచ్చారు. రెండు దేశాలు స్వాభావిక భాగస్వామ్యులని, కచ్చితంగా రెండు దేశాల మధ్య వాణిజ్య సంబంధ చర్చలు మెరుగుపడతాయని ఆశిస్తున్నట్టు చెప్పారు. తాను కూడా అమెరికా అధ్యక్షుడు ట్రంప్‌తో మాట్లాడేందుకు ఎదురు చూస్తున్నానన్నారు. కచ్చితంగా రెండు దేశాల మధ్య సంప్రదింపులు కొత్త మార్గాన్ని చూపిస్తాయన్నారు.

India and the US are close friends and natural partners. I am confident that our trade negotiations will pave the way for unlocking the limitless potential of the India-US partnership. Our teams are working to conclude these discussions at the earliest. I am also looking forward… pic.twitter.com/3K9hlJxWcl

— Narendra Modi (@narendramodi) September 10, 2025

ఈ రెండు ట్వీట్స్ ఇప్పుడు కొత్త చర్చకు దారి తీస్తున్నాయి. ట్రంప్ సుంకాల బెదిరింపుకు సమాధానంగా చైనాతో బంధం మెరుగుపర్చుకునే దిశగా ప్రయత్నించిన ఇండియా అదే వైఖరి కొనసాగిస్తుందా లేక అమెరికాను కాదనుకుంటుందా అనే ప్రశ్న ఉత్పన్నమౌతోంది. అటు ట్రంప్ కూడా మోదీతో మాట్లాడతానని చెబుతూనే ఇండియాపై సుంకాలు విధించాలని యూరోపియన్ యూనియన్‌పై ఒత్తిడి తీసుకురావడం ట్రంప్ దుష్టబుద్ధిని చాటుతోంది. ట్రంప్ మాటలు నమ్మితే ఇండియాకు రానున్న రోజుల్లో మరింత కష్టం రావచ్చనే అభిప్రాయం విన్పిస్తోంది. ఇండియాతో చర్చలు జరుపుతామంటూ ట్రంప్ ఇచ్చిన ట్వీట్‌కు ఇండియా అంత సానుకూలంగా స్పందించి ఉండకపోవల్సిందనే అభిప్రాయం వ్యక్తమౌతోంది.