క్యాన్సర్ రోగులకు రూ. 15 లక్షల సాయం! ఈ పథకం ఉందని మీకు తెలుసా?

క్యాన్సర్ సోకితే చికిత్స చేయించుకోవడం అంటే మామూలు విషయం కాదు. దీని చికిత్స ఎంతో ఖరీదైంది. డబ్బున్నవాళ్ళు తప్పితే క్యాన్సర్ చికిత్సను పేదవాళ్ళు భరించలేరు. అయితే క్యాన్సర్ సోకిన పేదలకు చికిత్స కోసం కేంద్ర ప్రభుత్వం రూ. 15 లక్షల ఆర్థిక సాయాన్ని అందించే పథకాన్ని అమలు చేస్తోంది. పేద క్యాన్సర్ రోగులకు వైద్యానికి అయ్యే ఖర్చు దాదాపు రూ. 15 లక్షల వరకూ ప్రభుత్వమే భరిస్తోంది. అయితే దురదృష్టవశాత్తు ఈ పథకం గురించి సరైన ప్రచారం, ప్రజలకు అవగాహన లేకపోవడం వల్ల పేద క్యాన్సర్ రోగులు ఈ పథకాన్ని వినియోగించుకోలేకపోతున్నారు. గత నాలుగేళ్లలో ఏపీ నుంచి 97 మంది రోగులు ఈ పథకాన్ని వినియోగించుకోగా.. తెలంగాణ నుంచి ఒక్కరు కూడా వినియోగించుకోలేకపోవడం దురదృష్టకరం.

ఈ పథకం పేరు ‘రాష్ట్రీయ ఆరోగ్య నిధి – హెల్త్ మినిస్టర్స్ క్యాన్సర్ పేషెంట్ ఫండ్’ పథకాన్ని అమలు చేస్తోంది. క్యాన్సర్ సోకిన పేదలకు చికిత్స కోసం ఆర్థిక సాయం అందించాలన్న ఉద్దేశంతో 2009లో కేంద్ర ప్రభుత్వం ఈ పథకాన్ని ప్రవేశపెట్టింది. కేంద్ర ప్రభుత్వ ఆరోగ్య, కుటుంబ సంక్షేమ మంత్రిత్వ శాఖ పర్యవేక్షణలో ఈ పథకం అమలు అవుతుంది. దారిద్య్ర రేఖకు దిగువన ఉన్న పేదలకు క్యాన్సర్ చికిత్స కోసం ఆర్థిక సాయం అందజేయాలన్న ఉద్దేశంతో దేశంలో 27 ప్రాంతీయ క్యాన్సర్ కేంద్రాలను ఏర్పాటు చేశారు. తొలుత క్యాన్సర్ రోగి చికిత్స కోసం రూ. 2 లక్షల వరకూ ఆర్థిక సాయం చేస్తారు. అంతకంటే ఎక్కువ డబ్బు అవసరమైతే కేంద్ర ఆరోగ్య మంత్రిత్వ శాఖకు దరఖాస్తులను పంపిస్తారు. క్యాన్సర్ రోగి పరిస్థితిని కేంద్ర ఆరోగ్య మంత్రిత్వ శాఖ అధ్యయనం చేసి.. అవసరాన్ని బట్టి గరిష్టంగా రూ. 15 లక్షల వరకూ ఆర్థిక సాయం చేస్తుంది. అయితే ఈ డబ్బును పూర్తిగా క్యాన్సర్ చికిత్స కోసమే ఖర్చు చేయాలి.

ప్రభుత్వం ఇచ్చే పథకం డబ్బుతో ఈ కింది చికిత్సలు చేయించుకోవచ్చు:

• క్యాన్సర్ రోగ నిర్ధారణ పరీక్షలు
• క్యాన్సర్ గడ్డల ఆపరేషన్
• యాంటీ క్యాన్సర్ కీమోథెరపీ
• రేడియేషన్
• బోన్ మారో ట్రాన్స్ ప్లాంటేషన్

ఈ పథకం పొందాలంటే ఉండాల్సిన అర్హతలు:

• కేంద్ర ప్రభుత్వం లేదా రాష్ట్ర ప్రభుత్వాలు నిర్దేశించిన దారిద్య్ర రేఖకు దిగువన ఉన్నవారు ఈ పథకానికి అర్హులు.
• సంబంధిత ఎమ్మార్వో జారీ చేసిన రేషన్ కార్డు లేదా వార్షికాదాయ ధృవీకరణ పత్రం ఉండాలి.
• క్యాన్సర్ ఉందని నిర్ధారించే నిర్ధారణ పరీక్షల ధ్రువపత్రాలు ఉండాలి.

ప్రైవేట్ ఆసుపత్రిలో కాకుండా క్యాన్సర్ కేంద్రాల్లో మాత్రమే చికిత్స చేయించుకోవాలి:

• ప్రైవేట్ ఆసుపత్రిలో చికిత్స చేయించుకుంటే ఈ పథకం వర్తించదు. దేశంలో ఉన్న 27 ప్రాంతీయ క్యాన్సర్ కేంద్రాల్లో ఏదో ఒక దాంట్లో చికిత్స చేయించుకుంటే ఈ పథకం కింద డబ్బులు సాయం చేస్తారు.
• లేదంటే టెరిటరీ క్యాన్సర్ సెంటర్లు గానీ రాష్ట్ర ప్రభుత్వ ఆసుపత్రుల్లో క్యాన్సర్ సెంటర్లలో చికిత్స చేయించుకుంటే ఈ పథకం వర్తిస్తుంది.

ప్రాంతీయ క్యాన్సర్ సెంటర్లలో ప్రతీ సెంటర్ లోనూ ఫండ్ ఏర్పాటు చేస్తారు. క్యాన్సర్ రోగుల చికిత్సకు ఇచ్చే రూ. 2 లక్షలను ఈ ఫండ్ నుంచే ఇస్తారు. అయితే రూ. 2 లక్షల కన్నా ఎక్కువ డబ్బు అవసరమైతే.. రోగి కేంద్ర ప్రభుత్వానికి దరఖాస్తు చేసుకోవాల్సి ఉంటుంది. రీజనల్ క్యాన్సర్ సెంటర్ లో మెడికల్ ఆఫీసర్ సిఫారసుతో దరఖాస్తు చేసుకోవాలి. కేంద్రం దరఖాస్తును పరిశీలించి అవసరాన్ని బట్టి రూ.సి 15 లక్షల వరకూ ఆర్థిక సాయం చేస్తుంది. దరఖాస్తు చేసుకున్నాక ఒకే దఫాలో డబ్బు చెల్లిస్తారు.

వీళ్ళు అనర్హులు:

• గతంలో క్యాన్సర్ చికిత్స చేయించుకుంటే వారికి ఈ పథకం కింద డబ్బులు ఇవ్వడం కుదరదు. ప్రస్తుతం జరుగుతున్న చికిత్సకు మాత్రమే డబ్బులు ఇస్తుంది.
• కేంద్ర ప్రభుత్వం అమలుచేస్తున్న ఆరోగ్య బీమా పథకాలు ఆయుష్మాన్ భారత్ ప్రధాన మంత్రి జన ఆరోగ్య యోజన పథకంలో ఉన్నట్లయితే ఈ పథకం వర్తించదు.

దేశంలో ఉన్న రీజనల్ క్యాన్సర్ సెంటర్లు:

• దేశంలో అలహాబాద్, అహ్మదాబాద్, తిరువనంతపురం, గువాహటి, కోల్కతా, కటక్, బెంగళూరు, హైదరాబాద్, హిమాచల్ ప్రదేశ్, చెన్నై, ముంబై, మధ్యప్రదేశ్, పాట్నా, పాండిచ్చేరి, హర్యానా, న్యూఢిల్లీ, రాజస్థాన్, ఛత్తీస్ ఘడ్, మహారాష్ట్రలలో మొత్తం 27 రీజనల్ క్యాన్సర్ సెంటర్లు ఉన్నాయి. తెలంగాణ, ఏపీ రాష్ట్రాలకు కలిపి ఒకే రీజనల్ క్యాన్సర్ సెంటర్ ఉంది. అది హైదరాబాద్ లో మాత్రమే ఉంది.

హైదరాబాద్ క్యాన్సర్ సెంటర్ చిరునామా:

డైరెక్టర్, ఎంఎన్జె ఇన్స్టిట్యూట్ ఆఫ్ ఆంకాలజీ, రెడ్ హిల్స్, హైదరాబాద్ 500004
టెలిఫోన్ నంబర్: 040-23318422/23318414/23397000
ఫ్యాక్స్ నంబర్: 040-23314063
ఈమెయిల్: info@mnjiorcc.org, director@mnjiorcc.org, dirmnjiorcc@yahoo.com

దరఖాస్తు చేసుకోవడం ఎలా?

• మినిస్ట్రీ ఆఫ్ హెల్త్ అండ్ ఫ్యామిలీ వెల్ఫేర్ వెబ్ సైట్ లో దరఖాస్తు ఫారంను డౌన్ లోడ్ చేసుకోవాలి.
• దరఖాస్తుని పూర్తిగా నింపాలి.
• నింపిన తర్వాత రోగికి చికిత్స చేస్తున్న ఆసుపత్రి సూపరింటెండెంట్ లేదా మెడికల్ ఆఫీసర్ లేదా ఆసుపత్రి హెడ్ ఆఫ్ ది డిపార్ట్మెంట్ నుంచి స్టాంపుతో కూడిన సంతకం తీసుకోవాలి.

ఈ దరఖాస్తును ఈ కింది చిరునామాకు పంపాలి

సెక్షన్ ఆఫీసర్, గ్రాంట్స్ సెక్షన్
మినిస్ట్రీ ఆఫ్ హెల్త్ & ఫ్యామిలీ వెల్ఫేర్
రూమ్ నం. 541, ఏ-వింగ్, నారీమన్ భవన్
న్యూఢిల్లీ-110011

• ఏమైనా వివరాలు కావాలంటే so.grants-mhfw@nic.in కి మెయిల్ పెట్టి అడగవచ్చు.
• ఆఫ్ లైన్ లో దరఖాస్తు చేసుకోవడానికి ఇక్కడ క్లిక్ చేయండి
• దేశంలో ఉన్న రీజనల్ క్యాన్సర్ సెంటర్ల చిరునామా కోసం ఇక్కడ క్లిక్ చేయండి

మరి క్యాన్సర్ సోకితే చికిత్స చేయించుకోవడానికి కూడా డబ్బులు లేని పరిస్థితుల్లో ఇవాళ ఎంతోమంది పేదలు ఉన్నారు. ఈ పథకం ఉందని కనీస అవగాహన కూడా లేక ఎంతోమంది చికిత్స చేయించుకోలేక ప్రాణాలను కోల్పోతున్నారు. మరి క్యాన్సర్ సోకితే రూ. 2 లక్షల నుంచి రూ. 15 లక్షల వరకూ ఆర్థిక సాయం అందించే ప్రభుత్వ పథకం ఉందని అందరికీ తెలియజేస్తారు కదూ. మీరు షేర్ చేయడం ద్వారా ప్రతీ ఒక్కరిలోనూ అవగాహన పెరుగుతుంది. దురదృష్టవశాత్తు ఈ పథకం గురించి ప్రచారం లేదు. మీ వంతుగా ఈ పథకాన్ని ప్రచారం చేసి ప్రజల్లోకి తీసుకెళ్ళండి. క్యాన్సర్ సోకిన నిరుపేదలకు చికిత్స కోసం ఆర్థిక సాయం అందుతున్న విషయాన్ని తెలియజేయండి. అలానే మీ అభిప్రాయాన్ని కూడా కామెంట్ చేయండి.