హైదరాబాద్ పాతబస్తీలో దారుణం చోటు చేసుకుంది. కట్టుకున్న భార్యను భర్త కత్తితో పొడిచి అత్యంత కిరాతకంగా ఆమె ప్రాణాలు తీశాడు. అనంతరం తన మూడేళ్ల చిన్నారిని తీసుకొని అక్కడి నుంచి పరారయ్యాడు. సమాచారం అందుకున్న పొలీసులు స్పాట్ కు చేరుకుని మృతదేహాన్ని పోస్ట్ మార్టం నిమిత్తం ఆస్పత్రికి తరలించారు. కేసు నమోదు చేసుకుని దర్యాప్తు చేస్తున్నారు.
హైదరాబాద్ పాతబస్తీలోని బహదూర్పురా పోలీస్ స్టేషన్ పరిధిలో ఉన్న హసన్ నగర్లో ఈ దారుణ ఘటన వెలుగుచూసింది. మృతురాలిని 30 ఏళ్ల గృహిణి అస్మా బేగంగా గుర్తించారు. ఈమెను హత్య చేసింది మరెవరో కాదు, ఆమె భర్త ధర్మేందర్. వీరిస్వస్థలం బీహార్ రాష్ట్రం. సుమారు 15 ఏళ్ల క్రితం బీహార్ నుంచి ఉపాధి కోసం హైదరాబాద్కు వలస వచ్చిన ధర్మేంద్ర, అస్మా బేగం, పాతబస్తీలోని హసన్ నగర్లో నివాసం ఉంటూ స్థిరపడ్డారు. వీరిద్దరూ ఒకరినొకరు ఇష్టపడి ప్రేమ వివాహం చేసుకున్నారు. ఈ దంపతులకు మూడేళ్ల వయసున్న ఒక ముద్దులొలికే కుమార్తె కూడా ఉంది. బయటి ప్రపంచానికి సాఫీగా సాగుతున్నట్లు కనిపించిన వీరి కుటుంబంలో, ఊహించని విధంగా ఈ ఘోరం జరిగిపోయింది.
సాయంత్రం 7 గంటల సమయంలో హసన్ నగర్లోని వారి నివాసంలో ఈ దారుణం చోటుచేసుకుంది. ఇంట్లో ఇద్దరి మధ్య ఏ విషయంలో వివాదం తలెత్తిందో తెలియదు కానీ, ఆవేశంతో ఊగిపోయిన ధర్మేందర్ ఒక్కసారిగా విచక్షణ కోల్పోయాడు. ఇంట్లో ఉన్న పదునైన కత్తిని తీసుకుని, తన భార్య అస్మా బేగం గొంతు కోసి అత్యంత కిరాతకంగా హత్య చేశాడు. ఊహించని ఈ దాడితో తీవ్ర రక్తస్రావమై అస్మా బేగం అక్కడికక్కడే కుప్పకూలి ప్రాణాలు విడిచింది. భార్య రక్తపు మడుగులో పడి ఉన్నా ఏమాత్రం జాలి చూపని ధర్మేందర్, తన మూడేళ్ల కుమార్తెను తీసుకుని వెంటనే అక్కడి నుంచి పరారయ్యాడు. ఇంటి నుంచి ఎలాంటి అలికిడి లేకపోవడం, అనుమానాస్పద పరిస్థితులు కనిపించడంతో స్థానికులు గమనించి ఒక్కసారిగా షాక్కు గురయ్యారు.
ఈ ఘటనపై స్థానికుల నుంచి సమాచారం అందుకున్న బహదూర్పురా పోలీసులు వెంటనే అలర్ట్ అయ్యారు. హుటాహుటిన హసన్ నగర్లోని ఘటనా స్థలానికి చేరుకుని పరిసరాలను తమ ఆధీనంలోకి తీసుకున్నారు. సమాచారం తెలియగానే రాజేంద్రనగర్ జోన్ డీసీపీ శ్రీనివాస్, ఫలక్నుమా డివిజన్ ఏసీపీ ఎం.ఎ. జావేద్, రాత్రి విధుల్లో ఉన్న ఇతర పోలీసు ఉన్నతాధికారులు స్వయంగా స్పాట్ను పరిశీలించారు. క్లూస్ టీమ్ సహాయంతో కీలక ఆధారాలను సేకరించిన పోలీసులు, మృతదేహాన్ని పోస్టుమార్టం నిమిత్తం ఆసుపత్రికి తరలించారు. ఈ హత్యపై BNS చట్టం కింద కేసు నమోదు చేసి దర్యాప్తును వేగవంతం చేశారు.
ప్రస్తుతం ఈ కేసులో ప్రధాన నిందితుడిగా ఉన్న భర్త ధర్మేందర్ ఆచూకీ కోసం బహదూర్పురా పోలీసులు ప్రత్యేక బృందాలను ఏర్పాటు చేసి ముమ్మరంగా గాలిస్తున్నారు. నిందితుడు తన మూడేళ్ల చిన్నారిని కూడా వెంట తీసుకెళ్లడంతో, ఆ పాప క్షేమంపై కూడా పోలీసులు ఆందోళన వ్యక్తం చేస్తూ సాంకేతిక ఆధారాలు, సీసీటీవీ ఫుటేజీల సాయంతో వేట కొనసాగిస్తున్నారు. ప్రేమించి పెళ్లి చేసుకున్న భార్యనే ఇంత కర్కశంగా కడతేర్చడం స్థానికంగా తీవ్ర విషాదాన్ని, కలకలాన్ని రేపింది. త్వరలోనే నిందితుడిని పట్టుకుని కఠినంగా శిక్షిస్తామని రాజేంద్రనగర్ జోన్ డీసీపీ శ్రీనివాస్ మీడియాకు వివరించారు.
