సామాన్యులకు ఊరట.. భారీగా తగ్గిన వంట నూనె ధరలు!

సామాన్యులకు ఊరటనిచ్చే వార్త ఇది. వంట నూనె ధరలు భారీగా దిగొచ్చాయి. ఏకంగా 30 శాతం వరకు ఆయిల్ రేట్లు పడిపోయాయి. దీంతో ప్రజలకు ఊరట కలుగుతుందని చెప్పుకోవచ్చు.హోలి పండుగ నేపథ్యంలో ఇది శుభవార్త అనే చెప్పాలి. మార్కెట్‌లో వంట నూనె డిమాండ్ పైకి చేరినప్పటికీ ఆయిల్ రేట్లు దిగి రావడం గమనార్హం. విదేశీ మార్కెట్‌లో ఆయిల్ ధరలు పడిపోవడం, అదే సమయంలో దేశీయ మార్కెట్‌లో ఆయిల్ సీడ్స్ ఉత్పత్తి పెరగడం వంటి అంశాలు ధరల తగ్గుదలకు కారణాలుగా చెప్తున్నారు.

గత నెలలో 10 శాతం మేర దిగొచ్చిన వంట నూనె ధరలు ఇప్పుడు ఏకంగా 30 శాతం వరకు తగ్గాయి. ఏడాది కిందట మస్టర్డ్ ఆయిల్ ధర లీటరుకు రూ. 165 నుంచి రూ. 170 వద్ద ఉండగా, ఇప్పుడు రూ. 135 నుంచి రూ. 140 వద్ద ఉంది. అదేసమయంలో సన్ ఫ్లవర్ ఆయిల్ విషయానికి వస్తే.. ఏడాది కిందట లీటరు రూ. 135 – రూ. 140గా ఉన్న రిఫైన్డ్ సోయాబీన్ ఆయిల్ ఇప్పుడు రూ. 115 – రూ. 120కు దిగొచ్చింది. ఈ గణాంకాలు చూస్తే.. వంట నూనె ధరలు భారీగా తగ్గాయని చెప్పుకోవచ్చు. లెక్కల ప్రకారం.. నెల రోజుల్లో ఆవాల నూనె 10 శాతం, సోయాబీన్ నూనె 3 శాతం తగ్గింది. దిగుమతి చేసుకున్న నూనెలలో, ముడి పామాయిల్ ధరలు దాదాపు 30 శాతం తగ్గి లీటరుకు రూ. 95 వద్ద ఉండగా, ఆర్‌బీడీ పామ్ ఆయిల్ ధర 25 శాతం క్షీణించి.. లీటరు రూ. 100కు పడిపోయింది.

వాస్తవానికి, మనదేశంలో తినదగిన నూనెల ధరలు ఎక్కువగా విదేశీ మార్కెట్లపై ఆధారపడి ఉంటాయి. అందుకు కారణం.. ఎక్కువుగా దిగుమతి చేసుకోవడమే. రానున్న రోజుల్లో బ్రెజిల్, అర్జెంటీనా దేశాల్లో సోయాబీన్, మలేషియాలో పామాయిల్ ఉత్పత్తి పెరిగే అవకాశం ఉందని ఆల్ ఇండియా ఎడిబుల్ ఆయిల్ ట్రేడర్స్ అసోసియేషన్‌తో అనుబంధించబడిన వ్యాపారవేత్తలు తెలిపారు. దీంతో విదేశీ మార్కెట్లలో ఎడిబుల్ ఆయిల్ ధరలు తగ్గుముఖం పట్టాయి. దిగుమతి చేసుకునే చమురు చౌకగా మారింది.