పండగ ఎఫెక్ట్.. పెరిగిన నిత్యవసర ధరలు

పండుగ వచ్చింది అంటే ఇళ్లలో వెలుగులు, ముఖాల్లో నవ్వులు వెలిగిపోవాలి. కానీ, ఈ దసరా, బతుకమ్మ పండుగల వేళ నిత్యావసరాల ధరలు ఆకాశాన్నంటుతూ సామాన్యుడి జేబుకు భారీగా చిల్లులు పెడుతున్నాయి. కేవలం ఒకే ఒక్క నెలలో కిలో బియ్యం ధర ఏకంగా 30 రూపాలయలు పెరగడంతో సామాన్య ప్రజలు షాక్ గురవుతున్నారు. అసలు పండుగ వేళ వంటింటి బడ్జెట్‌ను తలకిందులు చేస్తున్న ఆ ధరల వివరాలు ఎలా ఉన్నాయనేది ఇప్పుడు చూద్దాం. ఈ ధరల పెరుగుదలకు ప్రధాన కారణం రాష్ట్రవ్యాప్తంగా కనిపిస్తున్న ఎల్‌నినో ప్రభావమే. వర్షాలు సరిగా కురవక జలాశయాల్లో నీరు అడుగంటిపోవడంతో నీటి లభ్యత లేక వరి దిగుబడి బాగా తగ్గిపోయింది. దీని ప్రభావం మార్కెట్‌పై స్పష్టంగా కనిపిస్తోంది. గత నెలలో హోల్‌సేల్‌లో కిలో రూ. 65 ఉన్న హెచ్‌ఎంటీ జైశ్రీరాం బియ్యం ధర ఏకంగా రూ. 95కి చేరగా, కిలో రూ. 45 ఉన్న సోనామసూరి బియ్యం రూ. 70 పలుకుతోంది. కేంద్ర వినియోగదారుల వ్యవహారాల శాఖ ప్రకారం తెలంగాణలో బియ్యం రిటైల్ ధరలు 13.3 శాతం పెరిగాయి.

కేవలం బియ్యం మాత్రమే కాదు, వంటగదిలో రోజూ వాడే పప్పుల ధరలు కూడా విపరీతంగా ఎగబాకుతున్నాయి. సెప్టెంబరులో హోల్‌సేల్ మార్కెట్‌లో కిలో శనగపప్పు ధర రూ. 76 ఉంటే, ఇప్పుడు రూ. 96కి పెరిగింది. అలాగే రూ. 96 ఉన్న పెసరపప్పు రూ. 110కి చేరింది. కందిపప్పు, చక్కెర, ధనియాలు, జీలకర్రతో పాటు సోప్‌లు, డిటర్జెంట్ల ధరలు కూడా పెరిగాయని వ్యాపారులు చెబుతున్నారు. సరుకుల దిగుబడి తక్కువగా ఉండటంతో రేట్లు పెంచక తప్పడం లేదని మార్కెట్ వర్గాలు అంటున్నాయి. హైదరాబాద్‌ లాంటి మహానగరంలో నలుగురు ఉన్న ఒక సాధారణ కుటుంబానికి నెలకు సరుకులు, పాలు, కూరగాయల కోసం సగటున రూ. 9,500 వరకు ఖర్చయ్యేది. కానీ ప్రస్తుత ధరల భారాన్ని బట్టి రూ. 12,000 కూడా సరిపోవడం లేదు. నెలలో సగం రోజులకే పర్సు ఖాళీ అవుతోందని, కుటుంబ పోషణ కోసం అప్పులు చేయాల్సి వస్తోందని నగర వాసులు ఆవేదన వ్యక్తం చేస్తున్నారు. ధరల ధాటికి తాళలేక దసరా సెలవుల్లో విహారయాత్రలకు వెళ్లే ప్లాన్లను కూడా జనం వాయిదా వేసుకుంటున్నారు.

ఇదెలా ఉంటే.. మరోవైపు పండుగకు సొంతూళ్లకు వెళ్దామనుకుంటున్న ప్రజలపై రవాణా భారం పడింది. పండుగ రద్దీని ఆసరాగా చేసుకుని ఆర్టీసీ స్పెషల్ బస్సుల పేరుతో 50 శాతం అదనపు చార్జీలు వసూలు చేయడంపై ప్రయాణికులు తీవ్ర ఆగ్రహం వ్యక్తం చేస్తున్నారు. కాగా, రాబోయే 15 నుంచి 20 రోజుల్లో వర్షాలు పడకపోతే ఆహారధాన్యాల ధరలు మరో 10 నుంచి 20 శాతం పెరిగే ప్రమాదం ఉందని వ్యాపారులు హెచ్చరిస్తున్నారు. ధరల భయంతో మార్కెట్‌లో సరుకుల డిమాండ్ కూడా 30 శాతం వరకు పడిపోయింది.

నిత్యావసరాలతో పాటు ఎలక్ట్రానిక్ ఉపకరణాలు కూడా తామేం తీసిపోమంటూ పోటీపడి రేట్లు పెంచేసాయి. రాగి, ఉక్కు, ప్లాస్టిక్ వంటి ముడి పదార్థాలు, మెమరీ చిప్‌ల ధరలు పెరగడంతో స్మార్ట్‌ఫోన్లు, టీవీలు, ల్యాప్‌టాప్‌ల రేట్లు పైపైకి వెళ్లాయి. ఈ ఏడాది ఆన్‌లైన్‌లో ల్యాప్‌టాప్‌ల సగటు విక్రయ ధరలు 32 శాతం, ఏసీల ధరలు 11 శాతం, స్మార్ట్‌ఫోన్ల ధరలు 7 శాతం పెరిగాయి. గతేడాది అక్టోబరుతో పోలిస్తే ఈ ఏడాది ల్యాప్‌టాప్‌ల సగటు ధరలు ఏకంగా 41 శాతం పెరగడం గమనార్హం. పండుగ పూట సంతోషంగా గడపాల్సిన సామాన్యుడు ఇలా పెరిగిన ధరలతో అల్లాడిపోతున్నాడు. మార్కెట్‌లో నిత్యావసర సరుకుల అక్రమ నిల్వలను అరికట్టి, బ్లాక్ మార్కెటింగ్‌పై కఠిన చర్యలు తీసుకుంటేనే ధరలు అదుపులోకి వచ్చి సామాన్యుడికి ఊరట లభిస్తుందని నిపుణులు అభిప్రాయపడుతున్నారు. మరి పెరిగిన ఈ ధరలపై మీ అభిప్రాయాన్ని కామెంట్ బాక్స్‌లో తెలియజేయండి.