follow us:
స్వార్థం రాజ్యమేలుతున్న తరుణంలో, మానవత్వ పరిమళం వెల్లివిరిసిన ఒక అపురూప సంఘటన ఇప్పుడు ప్రతి ఒక్కరి హృదయాలను కదిలిస్తోంది. ఏలూరు జిల్లాలోని ప్రసిద్ధ పుణ్యక్షేత్రం ద్వారకాతిరుమల శ్రీ వేంకటేశ్వరస్వామి ఆలయంలో ఒక సాధారణ మహిళా ఉద్యోగిని చేసిన నిస్వార్థ సేవకు ఏకంగా రాష్ట్ర సీఎం చంద్రబాబు నాయుడే ముగ్ధులయ్యారు. చేతులు లేని ఒక దివ్యాంగ భక్తుడికి తల్లిలా ఆప్యాయంగా అన్నం తినిపించి ఆకలి తీర్చిన ఆమె సహృదయానికి ‘శభాష్ గాయత్రీ’ అంటూ సీఎం ప్రశంసల వర్షం కురిపించారు.
ఈ నెల 3వ తేదీన భీమడోలు మండలం పాతూరు గ్రామానికి చెందిన వాడపల్లి రాంబాబు అనే దివ్యాంగ భక్తుడు ద్వారకాతిరుమల చిన్న తిరుపతి స్వామివారి దర్శనం కోసం వచ్చారు. స్వామివారిని దర్శించుకున్న అనంతరం ఆయన ఆలయ ఆవరణలోని నిత్యాన్నదాన కేంద్రానికి భోజనం చేయడానికి వెళ్లారు. అయితే రెండు చేతులు లేకపోవడంతో విస్తరిలో ఉన్న భోజనం తినడానికి ఆయన తీవ్రంగా ఇబ్బంది పడటం గమనించిన నిత్యాన్నదాన కేంద్రం ఉద్యోగిని గాయత్రి, ఏమాత్రం ఆలస్యం చేయకుండా వెంటనే ఆయన వద్దకు వెళ్లారు.”
“ఆ దివ్యాంగ భక్తుడిని ఎంతో ఆప్యాయంగా పలకరించి, ఆయన పక్కనే కూర్చుని విస్తరిలోని అన్నంలో కూర కలిపి తన చేతులతో ముద్దలు చేసి నోటికి అందిస్తూ ఆకలి తీర్చారు. తోడబుట్టిన చెల్లిలా ఆ ఉద్యోగిని చూపిన ఈ ఆప్యాయతను అక్కడే ఉన్న కొందరు భక్తులు తమ ఫోన్లలో వీడియో తీసి సోషల్ మీడియాలో పోస్ట్ చేశారు. ఈ వీడియో విపరీతంగా వైరల్ అయి, లక్షలాది మంది నెటిజన్ల హృదయాలను గెలుచుకుంది. ఈ హృదయ విదారక దృశ్యం ఏపీ సీఎం చంద్రబాబు నాయుడు దృష్టికి కూడా వెళ్ళింది.”
“గాయత్రి చేసిన సేవను చూసి సీఎం చంద్రబాబు ఎంతో భావోద్వేగానికి గురయ్యారు. తన అధికారిక ‘ఎక్స్’ ఖాతా ద్వారా స్పందిస్తూ.. ‘శభాష్ గాయత్రీ.. చేతులు లేని దివ్యాంగ భక్తుడికి అన్నం తినిపించి ఆకలి తీర్చిన మీ సహృదయానికి నా హృదయపూర్వక వందనాలు. మానవ సేవే మాధవ సేవ అని మళ్లీ సమాజానికి చాటి చెప్పిన మీ సేవ, స్ఫూర్తి నిజంగా అభినందనీయం’ అంటూ ట్వీట్ చేశారు. సీఎం స్థాయి వ్యక్తి నుంచి తనకు అభినందనలు రావడంపై ఉద్యోగిని గాయత్రి తీవ్ర ఆనందం వ్యక్తం చేస్తూ సీఎంకు ధన్యవాదాలు తెలిపారు.”
ఈ సంఘటనపై ద్వారకాతిరుమల ఆలయ యంత్రాంగం కూడా వేగంగా స్పందించింది. గాయత్రి చూపిన సేవాభావాన్ని ఆలయ ఈవో వెండ్ర త్రినాథరావు ప్రత్యేకంగా కొనియాడారు. ఆలయ నిత్యాన్నదాన భవనంలో ఆమెను శాలువాతో ఘనంగా సత్కరించి, స్వామివారి శేషవస్త్రం, తీర్థప్రసాదాలు అందజేశారు. తోటి మనుషుల పట్ల గాయత్రి చూపిన ఈ నిస్వార్థ ప్రేమ, దయాగుణం సమాజంలో ప్రతి ఒక్కరికీ ఆదర్శమని ఈవో తెలిపారు. మానవత్వం ఇంకా బతికే ఉందనడానికి నిదర్శనంగా నిలిచిన గాయత్రి చూపిన ఈ అపురూప సేవపై మీ అభిప్రాయాన్ని కామెంట్ సెక్షన్‌లో షేర్ చేయండి.
