follow us:
సంక్రాంతి పండుగకు సొంతూర్లకు వెళ్లే ప్రయాణికుల కోసం టీఎస్‌ఆర్టీసీ ప్రత్యేక బస్సులను అందుబాటులోకి తెచ్చిన సంగతి తెలిసిందే. పెద్ద పండుగ కావడంతో నగరంలో ఉంటున్న ప్రజలందరూ పల్లెబాట పట్టేందుకు సిద్ధమవుతున్నారు. ఈ క్రమంలోనే టీఎస్‌ఆర్టీసీ ప్రత్యేక బస్సులను అందుబాటులోకి తెచ్చింది. అలాగే, రానుపోనూ ఒకేసారి టికెట్లు బుక్ చేసుకుంటే తిరుగు ప్రయాణంపై 10 శాతం రాయితీ కల్పిస్తున్నట్లు ప్రకటించింది. డీలక్స్, సూపర్ లగ్జరీ, రాజధాని, గరుడ ప్లస్ బస్సుల్లో అడ్వాన్స్ రిజర్వేషన్ బుకింగ్ కి ఈ రాయితీ వర్తించనుంది. ఇదిలావుంటే.. తాజాగా, టికెట్ బుక్ చేసుకున్న ప్రయాణికులు బస్ ఎక్కడుందో తెలుసుకునేందుకు ప్రత్యేకమైన యాప్ ను అందుబాటులోకి తెచ్చింది.
పండుగ రద్దీ దృష్ట్యా టీఎస్‌ఆర్టీసీ పకడ్బందీ చర్యలు తీసుకుంటోంది. టికెట్ బుక్ చేసుకున్న ప్రయాణికులకు అసౌకర్యం కలుగకుండా ఉండేందుకు వీలుగా ‘TSRTC Bus Tracking’ పేరిట యాప్‌ను అందుబాటులోకి తీసుకొచ్చింది. ట్రాకింగ్ యాప్ వివరాల ఆధారంగా బస్సు వచ్చే సమయాన్ని ఖచ్చితంగా తెలుసుకోవచ్చు. ముందుగా టికెట్ బుకింగ్ చేసుకున్న ప్రయాణికుల ఫోన్లకు టికెట్ వివరాలతో పాటు బస్ ట్రాకింగ్ లింక్‌ను మెసేజ్ రూపంలో పంపిస్తున్నారు. ప్రయాణికులు ఆ లింక్‌పై క్లిక్‌ చేయగానే బస్ ఎక్కడుందో సులువుగా తెలుసుకోవచ్చు. ప్రస్తుతం ముందస్తు రిజర్వేషన్ చేసుకునే 1800 బస్సు సర్వీస్‌లకు బస్సు ట్రాకింగ్ సదుపాయం కల్పించామని టీఎస్‌ఆర్టీసీ ఎండీ సజ్జనార్ తెలిపారు. త్వరలోనే హైదరాబాద్‌లోని మెట్రో ఎక్స్‌ప్రెస్‌ సర్వీస్‌లతో సహా మిగిలిన సర్వీస్‌లకు ట్రాకింగ్ సదుపాయం కల్పిస్తామని తెలిపారు.
ముందుగా గూగుల్ ప్లే స్టోర్‌ లేదా టీఎస్‌ఆర్టీసీ అధికారిక వెబ్‌సైట్‌ www.tsrtc.telangana.gov.in నుంచి ‘TSRTC Bus Tracking‘ యాప్ డౌన్లోడ్ చేసుకోవాలి. ఈ యాప్‌లో ప్రయాణికులు ఎలాంటి వ్యక్తిగత వివరాలను ఎంటర్ చేయాల్సిన అవసరం లేదు. ఇందులో ఒక ప్రాంతం నుంచి మరొక ప్రాంతానికి ప్రయాణించే బస్సుల వివరాలతో పాటు అవి ప్రస్తుతమున్న లోకేషన్‌ను తెలుసుకోవచ్చు. ప్రయాణికుల సమీపంలోని బస్టాప్‌, సర్వీస్‌ నంబర్‌, బస్సు నంబర్‌లను ఎంటర్ చేసి వివరాలను పొందవచ్చు. అత్యవసర పరిస్థితులు తలెత్తితే రిపోర్ట్‌ చేసే సదుపాయాన్ని ఈ యాప్‌లో కల్పించారు. వినూత్న పద్ధతులతో ప్రజలకు మరింత చేరువవుతోన్న టీఎస్‌ఆర్టీసీపై.. మీ అభిప్రాయాలను కామెంట్ల రూపంలో తెలియజేయండి.
#TSRTCBusTracking https://t.co/1tiRnQYPZM
— TSRTC (@TSRTCHQ) January 13, 2023
