ధోని, పంత్‌ చేయలేకపోయారు.. ఇషాన్‌ కిషన్‌ సాధించాడు!

లక్నో వేదికగా భారత్‌-శ్రీలంక మధ్య జరిగిన తొలి టీ20 మ్యాచ్‌లో టీమిండియా ఘన విజయం సాధించింది. ఈ మ్యాచ్‌లో టీమిండియా యువ క్రికెటర్లు ఇషాన్‌ కిషన్‌, శ్రేయస్‌ అయ్యర్‌ చెలరేగారు. ముఖ్యంగా ఇషాన్‌ కిషన్‌ ఈ మ్యాచ్‌తో టీమిండియా మాజీ కెప్టెన్‌ ఎంఎస్‌ ధోని రికార్డును బ్రేక్‌ చేశాడు. టీమిండియా తరఫున టి20ల్లో ధోని ఎన్నో సూపర్‌ ఇన్నింగ్సులు ఆడాడు. కెప్టెన్‌గా తొలి టి20 ప్రపంచ కప్‌లో భారత్ (India)ను విశ్వవిజేతగా నిలిపాడు. అయితే ఎన్నడూ కూడా టీ20ల్లో 80 ప్లస్ పరుగులను సాధించలేదు. 98 అంతర్జాతీయ టీ20లు ఆడిన ధోని అత్యధిక స్కోరు 56 పరుగులే.

ఇక యువ వికెట్ కీపర్ రిషభ్ పంత్ కూడా టీ20ల్లో 80 ప్లస్‌ను అందుకోలేకపోయాడు. అతడి అత్యధిక స్కోరు 65 పరుగులు. 2019లో వెస్టిండీస్‌తో జరిగిన మ్యాచ్ ద్వారా పంత్ ఈ స్కోరును అందుకున్నాడు. కాగా శ్రీలంకతో జరిగే సిరీస్‌లో పంత్‌కు విశ్రాంతి కల్పించడంతో… ఇషాన్ కిషన్ వికెట్ కీపర్‌గా బరిలోకి దిగాడు. గురువారం జరిగిన తొలి టీ20లో ఓపెనర్ గా వచ్చి 89 పరుగులు సాధించాడు. దాంతో టీ20ల్లో 80 ప్లస్ స్కోరును సాధించిన తొలి భారత వికెట్ కీపర్‌గా ఇషాన్ రికార్డు కెక్కాడు.

ఈ మ్యాచ్‌లో ఓపెనర్ గా బరిలోకి దిగిన అతడు ఆకాశమే హద్దుగా చెలరేగాడు. దొరికిన బంతిని దొరికినట్లు స్టాండ్స్ లోకి పంపుతూ టీమిండియాకు భారీ స్కోరును అందించాడు. 56 బంతుల్లో 89 పరుగులు చేశాడు. ఇందులో 10 ఫోర్లు, 3 సిక్సర్లు ఉన్నాయి. సెంచరీ చేసేలా కనిపించిన ఇషాన్… ఆ ఘనతకు 11 పరుగుల దూరంలో భారీ షాట్ కు ప్రయత్నించి అవుటయ్యాడు. అయినా కూడా ఇషాన్‌ ఈ ఇన్నింగ్స్‌తో దిగ్గజ ఆటగాడు ధోని, యువ సంచలనం పంత్‌ను వెనక్కునెట్టడం విశేషం. మరి ఇషాన్‌ కిషన్‌ ఇన్నింగ్స్‌పై మీ అభిప్రాయాలను కామెంట్ల రూపంలో తెలియజేయండి.