తెలంగాణకు తుఫాన్ ఊరట.. రైతులకు మాత్రం పంట నష్టం ముప్పు?

ఎల్‌నినో రక్కసి కోరల్లో చిక్కి.. భూగర్భ జలాలు పాతాళానికి పడిపోయిన తెలంగాణ రాష్ట్రానికి ‘అర్నాబ్ తుఫాన్’ కాస్త ఊరటనిస్తుంది.
సాగు నీరు లేక అల్లాడిపోతున్న తెలంగాణ గడ్డపైకి.. ప్రకృతి ఒక సంజీవనిని పంపుతోందా? అంటే అవుననే చెప్పుకోవచ్చు. ఏపీ, ఒడిశాలను భయపెడుతున్న ఆ ‘అర్నాబ్ తుఫాన్’.. తెలంగాణకు మాత్రం ఒక వరంలా మారనుంది. ఎండిపోయిన జలాశయాలకు ప్రాణం పోస్తూ, నీటి కొరత అనే పెను శాపానికి చెక్ పెట్టేందుకు వరుణ దేవుడు ‘అర్నాబ్’ రూపంలో కరుడుగట్టిన కరువుపై దండెత్తుతున్నాడు! తెలంగాణ పాలిట ఈ తుఫాన్ ఏ విధంగా ‘లైఫ్ లైన్’ కాబోతోంది? ఎల్‌నినో సెగలను చల్లబరుస్తూ ఈ అర్నాబ్ కురిపించబోయే అమృత వర్షం.. నీటి కొరత సంక్షోభాన్ని ఎలా ముగిస్తుందో ఇప్పుడు చూద్దాం.

బంగాళాఖాతంలో బలపడుతున్న ‘అర్నాబ్ తుఫాన్’ అక్టోబర్ 26 నాటికి పూర్తిస్థాయి తుఫానుగా మారనుందని భారత వాతావరణ శాఖ అంచనా వేసింది.
అక్టోబర్ 28 నాటికి ఉత్తరాంధ్ర – దక్షిణ ఒడిశా తీరాల వైపు కదిలే అవకాశం ఉందని తెలపింది. ఈ తుఫాన్ ప్రభావం అక్టోబర్ 26 నుండి 29 వరకు తీవ్రంగా ఉండనుందని IMD భావిస్తోంది. అక్టోబర్ 28 నాటికి కాకినాడ – కళింగపట్నం మధ్య తీరాన్ని తాకే ఈ తుఫాన్.. ఏపీ, ఒడిశా సరిహద్దులను వణికించడానికి సిద్ధమవుతోంది. ఈ తుఫాన్ ప్రధాన తాకిడి కోస్తా ఆంధ్రప్రదేశ్, ఒడిశాలపై ఉన్నప్పటికీ.. దీని నుంచి వచ్చే తేమతో కూడిన ఈదురుగాలులు, దట్టమైన మేఘాలు పొరుగునే ఉన్న తెలంగాణను కూడా కమ్మేస్తున్నాయి. ముఖ్యంగా తూర్పు, దక్షిణ తెలంగాణ జిల్లాల్లో దీని ప్రభావం ఎక్కువగా ఉండబోతోంది.

ఈ ఏడాది తెలంగాణను ‘ఎల్‌నినో’ ప్రభావం తీవ్రంగా వేధించింది. వర్షపాతం తగ్గి, భూగర్భ జలాలు పాతాళానికి పడిపోయాయి. అనేక జిల్లాల్లో నీటి కొరత కోరలు చాస్తోంది. ఇలాంటి తరుణంలో వస్తున్న ‘అర్నాబ్’.. తెలంగాణకు కొంతవరకు కచ్చితంగా ఊరటనిస్తుందనే చెప్పాలి! అక్టోబర్ 26 తర్వాత తెలంగాణలో వాతావరణం ఒక్కసారిగా మారిపోనుంది. పలు జిల్లాలకు ఇప్పటికే ఐఎండీ ఎల్లో అలర్ట్ జారీ చేసింది. ఉరుములు, మెరుపులతో కూడిన ఈ ఈదురు వానలు.. ఎండిపోతున్న జలాశయాలకు, బావులకు కాస్తయినా కొత్త నీటిని మోసుకొస్తాయి. తాగునీటి ఎద్దడితో ఇబ్బంది పడుతున్న ప్రాంతాలకు ఈ వర్షాలు తాత్కాలికంగా పెద్ద రిలీఫ్ ఇవ్వబోతున్నాయి.”

“కానీ.. ఇక్కడే ఒక పెద్ద ట్విస్ట్ ఉంది! అర్నాబ్ తుఫాన్ తెచ్చే వర్షాలు సాధారణ ప్రజలకు, నీటి కొరత సమస్యకు ‘మేలు’ చేసినప్పటికీ.. రైతన్నలకు మాత్రం ఇది పెద్ద శాపంగా మారే ప్రమాదం ఉంది! వర్షాల వల్ల భూగర్భ జలమట్టం పెరుగుతుంది. చెరువుల్లో నీరు చేరుతుంది. ఎల్‌నినో సృష్టించిన కరువు ఛాయలు తగ్గుతాయి.
ప్రస్తుతం ఖరీఫ్ సీజన్ ముగింపు దశలో ఉంది. పొలాల్లో వరి కోతలు, పత్తి ఏరుడు పనులు ముమ్మరంగా సాగుతున్నాయి. ఇలాంటి సమయంలో గంటకు 50 నుండి 70 కిలోమీటర్ల వేగంతో వీచే ఈదురుగాలులు, పిడుగులతో కూడిన భారీ వర్షాలు పడితే.. చేతికొచ్చిన పంట పూర్తిగా తడిసి ముద్దవుతుంది. పత్తి రాలిపోతుంది, వరి ధాన్యం కొట్టుకుపోతుంది. అంటే.. తాగడానికి నీళ్లిచ్చి ఊరటనిచ్చే విషయంలో అర్నాబ్ ‘మిత్రుడు’ అయితే.. కష్టపడి పండించిన పంటను తుడిచిపెట్టే విషయంలో సమస్యగా మారే అవకాశాలు కూడా లేకపోలేదు.

“ఏది ఏమైనా, ప్రకృతి ఇచ్చే ఊరట వెనుక ఎప్పుడూ ఒక హెచ్చరిక దాగి ఉంటుంది. ఎల్‌నినో దెబ్బకు నీటి కొరత తీరుతుందనే ఆనందం ఒకవైపైతే.. ఎక్కడ ఫ్లాష్ ఫ్లడ్స్ వస్తాయోనన్న భయం ఇంకోవైపు! అందుకే, ముఖ్యంగా పరివాహక ప్రాంతాల ప్రజలు, రైతన్నలు వాతావరణ శాఖ సూచనలు గమనిస్తూ అప్రమత్తంగా ఉండాలి. ప్రకృతి కురిపించే అమృతాన్ని అందుకంటూనే.. ముంచుకొచ్చే ముప్పు నుంచి మనల్ని మనం కాపాడుకోవాలి.