టెస్టుల్లో టీ20 స్టైల్​లో బ్యాటింగ్.. ఆస్ట్రేలియాను వణికిస్తున్న ఇంగ్లండ్!

క్రికెట్​లో సంప్రదాయ ఫార్మాట్​ అయిన టెస్టుల్లో ఇన్నాళ్లూ అన్ని టీమ్స్ దాదాపుగా ఒకే తరహాలో ఆడుతూ వచ్చాయి. ప్రతి సెషన్​కు వ్యూహాలను రచిస్తూ.. ఒక పద్ధతిలో ఆడుతూ వచ్చాయి. టెస్టుల్లో అటాకింగ్ పెద్దగా ఉండదు. కానీ ఇంగ్లండ్ జట్టు మాత్రం ఈ పద్ధతికి చరమగీతం పాడేలాగే ఉంది. బజ్​బాల్ వ్యూహంతో దూకుడుగా ఆడుతూ టెస్టులకు క్రేజ్ పెంచుతోంది ఇంగ్లీష్ టీమ్. ఆస్ట్రేలియాతో జరుగుతున్న ప్రతిష్టాత్మక యాషెస్ సిరీస్​లోనూ ఇదే గేమ్ ప్లాన్​తో ఆడుతోంది. తొలి టెస్టులో ఓడిపోయినా బజ్​బాల్ వ్యూహాన్ని వదల్లేదు. టెస్టుల్లో టీ20 తరహా గేమ్​తో రెండో టెస్టులో ఆస్ట్రేలియాకు చుక్కలు చూపిస్తోంది ఇంగ్లండ్. సెకండ్ టెస్ట్​లో కంగారూ జట్టు ఫస్ట్ ఇన్నింగ్స్​లో 416 రన్స్​కు ఆలౌట్ అయింది. స్టీవ్ స్మిత్ (110), ట్రేవిస్ హెడ్ (77) అద్భుతంగా బ్యాటింగ్ చేశారు.

స్మిత్, హెడ్​ రాణించడంతో ఆసీస్ ఫస్ట్ ఇన్నింగ్స్​లో భారీ స్కోరు చేసింది. అయితే ఇంగ్లండ్‌ దూకుడు ముందు ఈ స్కోరు సరిపోయేలా కనిపించడం లేదు. రెండో రోజు బ్యాటింగ్​కు దిగిన ఇంగ్లీష్ టీమ్ బ్యాటర్లు ధనాధన్ షాట్లతో అలరిస్తున్నారు. ఓపెనర్లు జాక్ క్రాలే (48 బంతుల్లో 48), బెన్ డకెట్ (134 బంతుల్లో 98) ఇంగ్లండ్​కు అదిరిపోయే ఆరంభాన్ని అందించారు. వీళ్లిద్దరూ ఫోర్లతో విరుచుకుపడటంతో స్కోరు బోర్డు రాకెట్ వేగాన్ని తలపించింది. ఓలీ పోప్ (42) కూడా క్రీజులో ఉన్నంత సేపు స్పీడుగా ఆడాడు. ప్రస్తుతం ఇంగ్లండ్ స్కోరు 4 వికెట్లకు 226. 46 ఓవర్లలోనే ఇంగ్లీష్ టీమ్ ఈ స్కోరును అందుకుంది. స్టార్ బ్యాటర్ జో రూట్ (10 నాటౌట్), బెన్ స్టోక్స్ (1 నాటౌట్) క్రీజులో ఉన్నారు. టెస్టుల్లోనూ టీ20 తరహా బ్యాటింగ్​తో ఆ జట్టు బ్యాటర్లు అదరగొడుతున్నారు. ఇంగ్లండ్ జోరు చూస్తుంటే ఆసీస్ స్కోరును మూడో రోజు లంచ్​లోపే దాటేసేలా ఉంది.