దశాబ్దాల ఎదురుచూపు.. ఐపిఎస్ అధికారి చొరవతో వృద్ధురాలి ఇంట్లో వెలుగులు

నేటి రోజుల్లో విద్యుత్ లేకుండా క్షణం కూడా గడపలేము. ఎలక్ట్రానిక్ వస్తువుల వాడకం పెరిగిన తర్వాత ఇంటి నుంచి మొదలు పరిశ్రమల దాక విద్యుత్ వినియోగం పెరిగిపోయింది. కానీ ఇంకా కొన్ని ప్రాంతాల్లో ఇప్పటి వరకు కరెంటు సౌకర్యం లేని కుటుంబాలు ఉన్నాయంటే ఆశ్చర్యపోవాల్సిన పని లేదు. ఇంట్లో కరెంట్ ఏర్పాటు చేసుకునే స్థోమత లేక చీకట్లోనే జీవితాలను సాగిస్తున్నారు నిరుపేదలు. ఇదే అంశానికి సంబంధించి ఓ వృద్ధ మహిళ దశాబ్దాల తరబడి ఇంట్లో కరెంటు సౌకర్యం లేక చీకట్లోనే జీవిస్తుంది. ఈ విషయం తెలిసిన పోలీసు అధికారులు ఆమె ఇంట్లో విద్యుత్ కనెక్షన్ ఏర్పాటు చేసి వెలుగులు నింపారు. దీనికి సంబంధించిన వీడియో నెట్టింట్లో వైరల్ గా మారింది. ఇది చూసిన నెటిజన్లు పోలీసులను ప్రశంసిస్తున్నారు.

సాధారణంగా పోలీసులు నేరాలను అదుపుచేసి శాంతి భద్రతలను కాపాడే క్రమంలో కాస్తంతా కటువుగానే వ్యవహరిస్తారు. మరికొంత మంది పోలీసు అధికారులు దురుసుగా ప్రవర్తించి ప్రజల పట్ల కఠినంగా ప్రవర్తిస్తారు. కానీ ఉత్తర్ ప్రదేశ్ లోని పోలీసులు మానవత్వాన్ని చాటుకున్నారు. కరెంట్ లేకుండా నివసిస్తున్న వృద్ద మహిళ ఇంట్లో కరెంట్ కనెక్షన్ ఏర్పాటు చేసి ఆ ఇంట్లో వెలుగులు నింపారు. వివరాల్లోకి వెళ్తే.. యూపిలో 70 ఏళ్ల వయసున్న నూర్జాహాన్ కొన్నేండ్ల నుంచి కరెంట్ లేకుండా నివసిస్తుంది. భర్త చనిపోయాడు, ఉన్న ఒక్క కూతురుకు పెళ్లి చేసింది. అప్పటి నుంచి ఆమె ఒంటరిగానే చీకట్లో ఉంటుంది. ఇటీవల తన ఇంట్లో కరెంట్ ఏర్పాటు చేయాలని పోలీసుల వద్దకు వెళ్లి తన గోడును వెల్లబోసుకుంది.

తన గోడును విని చలించిపోయిన బులంద్ షహర్ జిల్లా ఎఎస్పీ అనుకృతి శర్మ ఆమె ఇంట్లో కరెంట్ ఏర్పాటు చేయడానికి చర్యలు చేపట్టారు. విద్యుత్ అధికారులతో మాట్లాడి స్వయంగా తానే ఆ మహిళ ఇంటికి వెళ్లి విద్యుత్ కనెక్షన్ ఇప్పించారు. సిబ్బందితో పాటు వెళ్లిన అనుకృతి శర్మ దగ్గరుండి విద్యుత్ మీటర్, బల్బ్, ఫ్యాన్ ఏర్పాటు చేయించారు. మొదటి సారి తన ఇంట్లో బల్బ్ వెలగడంతో నూర్జాహాన్ పట్టరాని ఆనందంతో మురిసిపోయింది. తన ఇంటికి విద్యుత్ ఏర్పాటు చేసిన పోలీసులకు ధన్యవాదాలు తెలిపింది. ఈ విషయాన్ని ఐపిఎస్ అధికారి అనుకృతి శర్మ తన ట్విట్టర్ ఖాతాలో పోస్ట్ చేసింది. ఆ వీడియో సోషల్ మీడియాలో వైరల్ గా మారింది. దీనిపై నెటిజన్లు స్పందిస్తూ నిరుపేద మహిళ ఇంట్లో వెలుగులు నింపిన పోలీసులపై ప్రశంసల వర్షం కురిపిస్తున్నారు.

Swades moment of my life 🌸😊 Getting electricity connection to Noorjahan aunty’s house literally felt lyk bringing light into her life. The smile on her face ws immensely satisfying.Thank u SHO Jitendra ji & the entire team 4 all da support 😊#uppcares @Uppolice @bulandshahrpol pic.twitter.com/3crLAeh1xv

— Anukriti Sharma, IPS 🇮🇳 (@ipsanukriti14) June 26, 2023