follow us:
ఏపీలో ఓటర్ల జాబితా సవరణ ప్రక్రియలో భాగంగా ఇవాళ నుంచి SIR స్పెషల్ డ్రైవ్ ప్రారంభమైంది. ఇటీవలి సవరణల్లో భాగంగా ఓటర్ల జాబితా నుంచి తొలగించిన ఏకంగా 46.62 లక్షల ఓటర్ల వివరాలను సవరించేందుకు, రీ-వెరిఫై చేసేందుకు ఎన్నికల సంఘం క్షేత్రస్థాయిలోకి దిగుతోంది. ఓటు హక్కు కలిగిన అర్హులైన ఏ ఒక్క పౌరుడి పేరు కూడా జాబితా నుంచి మిస్ కాకూడదనే ఉద్దేశంతో ఏపీ ప్రధాన ఎన్నికల అధికారి వివేక్ యాదవ్ ఈ ప్రత్యేక డ్రైవ్‌ను పర్యవేక్షిస్తున్నారు
రాష్ట్రంలో చేపట్టిన ఈ ప్రత్యేక డ్రైవ్ వివరాలను సీఈవో వివేక్ యాదవ్ స్పష్టం చేశారు. ఎస్‌ఐఆర్ ప్రాథమిక లెక్కింపు ప్రక్రియలో మరణించిన వారు, వేరే ప్రాంతాలకు శాశ్వతంగా వలస వెళ్లిన వారు, అలాగే రెండు చోట్ల పేర్లు ఉన్న డూప్లికేట్ ఓటర్లను గుర్తించి జాబితా నుంచి తొలగించినట్లు ఆయన వెల్లడించారు. అయితే, ఈ తొలగింపుల్లో ఎలాంటి పొరపాట్లు జరగకుండా ఉండేందుకు గురువారం నుంచి BLOలు నేరుగా ప్రతి ఇంటికీ వెళ్లి క్షేత్రస్థాయిలో రీ-వెరిఫికేషన్ చేపడతారు. తొలగించిన ప్రతి ఓటరు చిరునామాకు వెళ్లి ప్రత్యక్షంగా వివరాలు సేకరిస్తారు.
పరిశీలన సమయంలో ఒకవేళ అర్హత ఉన్నప్పటికీ పొరపాటున లేదా అపోహల వల్ల ఓటరు పేరు తొలగించబడిందని తేలితే, వారికి వెంటనే పునరుద్ధరణ అవకాశం కల్పిస్తున్నారు. బాధిత ఓటర్లు ‘ఫారం-6’ నింపడం ద్వారా మళ్లీ ఓటరుగా నమోదు చేసుకోవచ్చని సీఈవో సూచించారు. బిఎల్ఓల పరిశీలన పూర్తయిన తర్వాత, నిరంతర సవరణ ప్రక్రియ ద్వారా అర్హులైన వారందరి పేర్లను మళ్లీ జాబితాలో చేర్చనున్నారు. కొత్తగా 18 ఏళ్లు నిండి అర్హత సాధించిన యువత కూడా ఫారం-6 ద్వారా తమ పేర్లను నమోదు చేసుకోవడానికి ఈ స్పెషల్ డ్రైవ్ ఎంతో ఉపయోగపడుతుంది.
ఈ రీ-వెరిఫికేషన్ ప్రక్రియ అంతా పూర్తయిన తర్వాత, ఈ నెల 16వ తేదీన ఆంధ్రప్రదేశ్ రాష్ట్ర తుది ఓటర్ల జాబితాను ఎన్నికల సంఘం అధికారికంగా విడుదల చేయనుంది. తుది జాబితా వచ్చిన తర్వాత కూడా ఓటరు జాబితా సవరణ ప్రక్రియ ఆగిపోదని, నిరంతర సవరణ అందుబాటులోనే ఉంటుందని అధికారులు వెల్లడించారు. పౌరుల సౌకర్యార్థం ప్రతి ఏడాది జనవరి 1, ఏప్రిల్ 1, జులై 1, అక్టోబర్ 1 తేదీలను క్వాలిఫైయింగ్ డేట్లుగా పరిగణిస్తూ కొత్త ఓటర్ల నమోదును స్వీకరిస్తామని స్పష్టం చేశారు.
ప్రజాస్వామ్యంలో ఓటు హక్కు అనేది అత్యంత కీలకమైన ఆయుధం. కాబట్టి ప్రతీ పౌరుడు తమ ఓటు భద్రంగా ఉందో లేదో ముందే సరిచూసుకోవడం ఎంతో అవసరం. మీ ఇంటికి బిఎల్ఓ వచ్చినప్పుడు సరైన వివరాలు అందించి సహకరించండి, ఒకవేళ ఓటు లేకపోతే వెంటనే ఫారం-6 పూర్తి చేసి సమర్పించండి.
