follow us:
AP DSC 2026 : ఏపీలోని నిరుద్యోగ యువతకు, ఏళ్లనుంచి టీచర్ ఉద్యోగం సాధించడమే లక్ష్యంగా శ్రమిస్తున్న అభ్యర్థులకు కూటమి ప్రభుత్వం తీపి కబురు అందించింది. ఎంతో కాలంగా ఆసక్తిగా ఎదురుచూస్తున్న డీఎస్సీ-2026 ప్రకటన విడుదలకావడంతో అభ్యర్థుల్లో కొత్త ఉత్సాహం నెలకొంది. మంగళవారం విద్యాశాఖ అధికారులు దీనికి సంబంధించి షార్ట్ నోటిఫికేషన్‌ను అధికారికంగా విడుదల చేశారు. రాష్ట్రవ్యాప్తంగా వివిధ కేటగిరీల్లో ఉన్న వేలాది ఖాళీలను భర్తీ చేసేందుకు వేర్వేరు ప్రకటనలను జారీ చేసింది.
ఈ డీఎస్సీ-2026 నోటిఫికేషన్ ద్వారా రాష్ట్రవ్యాప్తంగా మొత్తం 2,721 ఉపాధ్యాయ పోస్టులను భర్తీ చేయనున్నారు. వీటిలో ప్రభుత్వ, జిల్లా పరిషత్, మండల పరిషత్, పురపాలక పాఠశాలల పరిధిలోని 2,111 జనరల్ టీచర్ పోస్టులు ఉన్నాయి. ఈ జనరల్ పోస్టుల్లో 906 స్కూల్ అసిస్టెంట్ పోస్టులు ఉండగా, 1,205 ఎస్జీటీ పోస్టులు ఉన్నాయి. ఇవే కాకుండా ప్రత్యేక అవసరాలున్న పిల్లల కోసం 350 స్పెషల్ ఎడ్యుకేషన్ టీచర్ పోస్టులను, వివిధ సంక్షేమ సొసైటీలు, మోడల్ స్కూళ్ల పరిధిలో ప్రిన్సిపల్, పీజీటీ, టీజీటీ, పీడీ, పీఈటీ కేటగిరీలకు సంబంధించి మరో 260 పోస్టులను నింపనున్నారు.
ఇక జిల్లాల వారీగా ఉన్న ఖాళీల వివరాలను పరిశీలిస్తే… పాఠశాల విద్య పరిధిలోని 2,111 పోస్టుల్లో అత్యధికంగా కర్నూల్ జిల్లాలో 389 ఖాళీలు ఉన్నాయి. ప్రత్యేక పోస్టులతో కలిపితే ఒక్క కర్నూలులోనే 404 పోస్టులు అందుబాటులో ఉన్నాయి. ఆ తర్వాతి స్థానాల్లో ప్రకాశం జిల్లాలో 266, కడప జిల్లాలో 206, నెల్లూరులో 165, చిత్తూరులో 130, తిరుపతిలో 99 మరియు అనంతపురం జిల్లాలో 92 పోస్టులు ఉన్నాయి. ఇక అత్యంత తక్కువగా విజయనగరం జిల్లాలో 4, పార్వతీపురం మన్యం జిల్లాలో 8, అలానే పశ్చిమగోదావరితో పాటు ఏలూరు జిల్లాల్లో 10 చొప్పున ఖాళీలు మాత్రమే ఉన్నట్లు విద్యాశాఖ గణాంకాలు స్పష్టం చేస్తున్నాయి.
మరోవైపు వివిధ సంక్షేమ సొసైటీల పరిధిలోని 260 పోస్టుల్లో అత్యధికంగా సాంఘిక సంక్షేమ రెసిడెన్షియల్ సొసైటీలోనే 85 ఖాళీలు ఉన్నాయి. ఇందులో ప్రిన్సిపల్ పోస్టులను మల్టీ జోన్ పరిధిలోకి, పీజీటీ, టీజీటీ పోస్టులను జోనల్ కేడర్‌గా పరిగణిస్తారు. ఇక ఆదర్శ పాఠశాలల్లోని టీజీటీ పోస్టులను ఇటీవలే ప్రభుత్వం స్థానిక కేడర్ పోస్టులుగా వర్గీకరించింది. ఈ నియామకాలకు సంబంధించి నవంబరు 3వ తేదీ నుంచి అధికారిక పోర్టల్ ద్వారా ఆన్‌లైన్ దరఖాస్తులను స్వీకరించనున్నారు. అభ్యర్థులు తమ దరఖాస్తులను కేవలం ఆన్‌లైన్ విధానంలో మాత్రమే సమర్పించాల్సి ఉంటుందని స్పష్టం చేశారు.
ఆన్‌లైన్ దరఖాస్తు ప్రక్రియ ప్రారంభమయ్యే ముందే విద్యాశాఖ పూర్తిస్థాయి నోటిఫికేషన్‌ను వెబ్‌సైట్‌లో అందుబాటులోకి తీసుకురానుంది. ఆ సమగ్ర నోటిఫికేషన్‌లో పోస్టుల వారీగా రోస్టర్ పాయింట్లు, రిజర్వేషన్లు, వయోపరిమితి సడలింపులు, విద్యార్హతలు, పరీక్షా తేదీల సమాచారాన్ని క్లియర్‌గా వెల్లడిస్తారు. కాబట్టి డీఎస్సీకి ప్రిపేర్ అవుతున్న అభ్యర్థులంతా ఇప్పటినుంచే ప్రణాళికాబద్ధంగా ప్రిపరేషన్‌ను వేగవంతం చేసుకోవడం ఉత్తమమని పలువురు సూచిస్తున్నారు.
