UPI MDR Charges: వ్యాపారులకు రిలీఫ్.. ఛార్జీల అమలు వాయిదా!

దసరా, దీపావళి పండుగల సీజన్ వచ్చేసింది. దీంతో షాపులన్నీ కస్టమర్లతో కళకళలాడుతున్నాయి. సరిగ్గా ఇలాంటి పీక్ బిజినెస్ టైమ్‌లోనే… ‘అక్టోబర్ 15 నుండి UPI పేమెంట్స్ మీద 0.4శాతం MDR ఛార్జీలు పడబోతున్నాయనే వార్త … వ్యాపారుల గుండెల్లో రైళ్లు పరిగెత్తించింది. ‘కస్టమర్ పెద్ద అమౌంట్ స్కాన్ చేస్తే లాభం కాస్తా బ్యాంకులకు పోతుందా?’ అని ప్రతి చిన్న, పెద్ద వ్యాపారి తెగ టెన్షన్ పడ్డారు. కానీ వ్యాపారుల అందరికి కాస్త గుడ్‌న్యూస్ చెప్పంది కేంద్రం. UPI పేమెంట్లపై MDR ఛార్జీలు వాయిదా వేసింది. పండుగ సీజన్‌లో వ్యాపారస్తులపై ఎలాంటి అదనపు భారం పడకూడదనే ఉద్దేశంతో, ఈ కొత్త UPI MDR ఛార్జీల అమలును దీపావళి పండుగ తర్వాత వరకు వాయిదా వేసింది!”

నిజానికి ఈ నిర్ణయం వెనుక ఫిన్‌టెక్ సంస్థలు, మర్చంట్ అసోసియేషన్ల కృషి ఎంతో ఉంది. పండుగ వేళ దేశవ్యాప్తంగా లక్షల కోట్ల రూపాయల డిజిటల్ బిజినెస్ జరుగుతుంది. ఇలాంటి క్రూషియల్ టైమ్‌లో కొత్త ఛార్జీలు పెడితే, క్యాష్ లిక్విడిటీ తగ్గి వ్యాపారాలు దెబ్బతినే అవకాశం ఉందని ప్రభుత్వానికి విజ్ఞప్తి చేశారు. దానికి NPCI సానుకూలంగా స్పందించి, ‘ప్రస్తుతానికి ఎలాంటి ఛార్జీలు ఉండవని.. హ్యాపీగా బిజినెస్ చేసుకోండి’ అంటూ గ్రీన్ సిగ్నల్ ఇచ్చింది! కాబట్టి, ఈ దీపావళి సీజన్ మొత్తం ఎలాంటి అదనపు ఫీజులు, కటింగ్‌లు లేకుండా వ్యాపారులు హాయిగా బిజినెస్ చేసుకునేలా నిర్ణయం తీసుకున్నారు.

“అయితే, దీపావళి తర్వాత వచ్చే ఆ ఛార్జీలు ఎలా ఉంటాయో కూడా మీరు ఇప్పుడే క్లియర్ గా తెలుసుకుంటే భవిష్యత్తులో ప్లాన్ చేసుకోవడం ఈజీ అవుతుంది.
మొదటి రూల్… రూ. 2,000 లోపు ఉండే చిన్న లావాదేవీలపై ఎలాంటి ఛార్జీలు ఉండవు! అంటే షాపులో జరిగే చిన్న చిన్న పేమెంట్స్ అన్నీ ఎప్పటికీ 100% ఉచితమే.
రెండో రూల్… కేవలం రూ. 2,000 దాటిన నిర్దిష్ట పర్సన్-టు-మర్చంట్ ట్రాన్సాక్షన్స్ పై మాత్రమే 0.4% MDR వర్తిస్తుంది.ఉదాహరణకు, ఒక కస్టమర్ రూ. 3,000 స్కాన్ చేస్తే, మీరు బ్యాంకుకు కట్టాల్సింది కేవలం రూ. 12 మాత్రమే. ఒకవేళ రూ. 50,000 పెద్ద లావాదేవీ జరిగితే రూ. 200 కట్ అవుతుంది.”

మరి లక్షల్లో వ్యాపారం చేసే హోల్‌సేల్ వ్యాపారుల పరిస్థితి ఏంటి? అక్కడే ప్రభుత్వం ఒక పెద్ద ఊరటనిచ్చింది! మీ షాపులో రూ. 75,000 లేదా అంతకంటే ఎక్కువ, ఎంత పెద్ద మొత్తంలో UPI ట్రాన్సాక్షన్ జరిగినా సరే… గరిష్ఠ ఛార్జీని రూ. 300లకే పరిమితం చేశారు. అంటే రూ. 2 లక్షల లావాదేవీ జరిగినా కూడా మీకు కట్ అయ్యేది కేవలం రూ. 300 మాత్రమే. దీనివల్ల పెద్ద మొత్తంలో వ్యాపారం చేసేవారికి లాభాలు సురక్షితంగా ఉంటాయి. ఇక్కడ ప్రభుత్వం మరో కీలక ఆదేశం కూడా ఇచ్చింది—ఈ ఛార్జీల భారాన్ని కస్టమర్లపై నెట్టకూడదని.. అలాగే డిజిటల్ లావాదేవీలకు ఎలాంటి ఆటంకం కలగకుండా చూసుకోవాలని నిర్ణయించింది.