మీరు ఎంతగానో ఇష్టపడే టెడ్డీ బేర్‌ గురించి ఈ విషయాలు తెలుసా?

ఈ ప్రపంచంలో టెడ్డీ బేర్‌ బొమ్మను ఇష్టపడే వాళ్లు కొన్ని కోట్ల మంది ఉన్నారు. ముఖ్యంగా అమ్మాయిలు టెడ్డీ బేర్‌ బొమ్మను ఎక్కువగా ఇష్టపడుతుంటారు. అందుకే అబ్బాయిలు తమకు ఇష్టమైన అమ్మాయిని ఇంప్రెస్‌ చేయటానికి టెడ్డీ బేర్‌ను గిఫ్ట్‌గా ఇస్తూ ఉంటారు. వాలెంటైన్స్‌ డేలోని ఏడు రోజుల్లో ప్రత్యేకంగా టెడ్డీ డేను కూడా జరుపుకుంటూ ఉంటారు. ఈ రోజున అబ్బాయిలు, అమ్మాయిలకు టెడ్డీలను గిఫ్ట్స్‌గా ఇస్తూ ఉంటారు. అసలు ఈ టెడ్డీ బేర్‌ ఎలా పుట్టుకొచ్చింది? దీన్ని ఎవరు తయారు చేశారు? బొమ్మల్లో దీనికంత ప్రాధాన్యత ఎందుకు? అన్న విషయాలు ఇప్పుడు తెలుసుకుందాం..

• 1902 ప్రాంతంలో టెడ్డీ రూసోవెల్ట్‌ వేటకు వెళ్లి ఓ ఎలుగుబంటి పిల్లను చంపకుండా వదిలేశాడంట. ఇక, అప్పటినుంచి వాటికి టెడ్డీ అన్న పేరు వచ్చిందన్న కథ ప్రచారంలో ఉంది.
• 1906లో మొదటిసారి టెడ్డీ బేర్‌ అన్న పదాన్ని వాడినట్లు ఆక్సఫర్ట్‌ డిక్షనరీ పేర్కొంది.
• టెడ్డీ బేర్‌ను సానుభూతి, శుభాకాంక్షలు, ప్రేమకు చిహ్నంగా భావిస్తుంటారు.
• 1912లో టైటానిక్‌ నావ సముద్రంలో మునిగిపోయింది. వందల మంది చనిపోయారు. టైటానిక్‌ ప్రమాదంలో చనిపోయిన వారికి నివాళులు అర్పిస్తూ.. జర్మన్‌ బొమ్మల కంపెనీ స్టెయిఫ్‌ దాదాపు 500 టెడ్డీ బేర్‌లను తయారు చేసింది. వాటిని ‘మౌర్నింగ్‌ బేర్స్‌’ అని పేరు పెట్టింది. నల్లటి ఆకారంతో ఉన్న వాటి కళ్లు ఎర్రగా సానుభూతి తెలిపేలాగా కంపెనీ వాటిని తయారు చేసింది. ఆ టెడ్డీ బేర్‌లు ప్రస్తుతం వేలంపాటలో ఒక్కోటి 20 వేల డాలర్లకు అమ్ముడవుతున్నాయి.
• ప్రపంచంలో అత్యంత పెద్దదైన.. చేత్తో కుట్టిన టెడ్డీ బేర్‌ 2008లో తయారైంది. అమెరికాలో కాన్సాస్‌లో తయారైన ఈ బొమ్మ 55 అడుగుల 4 అంగుళాల పొడవు ఉంది.
• 2009 – 2010 మధ్య కాలంలో బ్రిటీష్‌కు చెందిన రాయ్‌మండో అనే టెడ్డీ బియర్‌ ప్రపంచ వ్యాప్తంగా పర్యటనలు చేసింది. ఒక సంవత్సరంలో ఈ బొమ్మ 395,605 కిలోమీటర్లు ప్రయాణించింది. మొత్తం ఆరు ఖండాల్లోని 35 దేశాల్లో పర్యటించింది.
• మాగిల్లన్‌ టీ బేర్‌ మొట్టమొదటి సారి అంతరిక్ష ప్రయాణం చేసింది. 1995లో ఈ ప్రయాణం చేసింది.
• టెడ్డీ బేర్స్‌ అంటే ఇష్టపడే వారిని, ప్రేమించే వారిని ఆర్ట్కోఫైల్‌ అని అంటారు.