బుకీల నుంచి టీమిండియాను కాపాడిన సచిన్, గంగూలీ! రియల్ స్టోరీ!

సచిన్ టెండూల్కర్, సౌరవ్ గంగూలీ.. వరల్డ్ క్రికెట్​కు భారత్ అందించిన ఇద్దరు గొప్ప ప్లేయర్లు అనే చెప్పాలి. ఆటగాడిగా సచిన్ అత్యున్నత శిఖరాలు అధిరోహించాడు. క్రికెట్​లో అతడు చూడని విజయం లేదు. మాస్టర్ బ్లాస్టర్​కు దాసోహం అనని రికార్డు లేదు. టన్నుల కొద్దీ రన్స్​ చేసి గ్రేటెస్ట్ బ్యాటర్​గా అవతరించాడు. సెహ్వాగ్ దగ్గర నుంచి కోహ్లీ దాకా ఎందరో క్రికెటర్లు సచిన్​ను స్ఫూర్తిగా తీసుకొని క్రికెట్​ను మొదలుపెట్టారు. ఇక, గంగూలీ గురించి తెలిసిందే. లెఫ్టాండర్ బ్యాటర్​గా కళాత్మక షాట్లతో పాటు విధ్వంసకర బ్యాటింగ్​తో అపోజిషన్​ టీమ్ వెన్నులో వణుకు పుట్టించేవాడు. అతడు కొట్టే సిక్సర్లు స్టేడియాలు దాటి ఎక్కడో పడేవి. బ్యాటర్​గానే గాక కెప్టెన్​గానూ భారత జట్టును ముందుండి నడిపాడు దాదా. అలా సచిన్, గంగూలీలు భారత క్రికెట్​కు విశిష్ట సేవలు అందించారు.

అలాంటి సచిన్​-గంగూలీలు ఒక మ్యాచ్​లో టీమిండియాను బుకీల బారి నుంచి కాపాడారు. 1990వ దశకం చివర్లో మ్యాచ్ ఫిక్సింగ్ క్రికెట్​ను కుదిపేసింది. ఆ సమయంలోనే శ్రీలంకలో నిదాహస్ కప్ జరిగింది. ఈ ట్రై సిరీస్​లో లంకతో పాటు భారత్, న్యూజిలాండ్​లు పోటీపడ్డాయి. ఫైనల్స్​కు టీమిండియా, శ్రీలంక క్వాలిఫై అయ్యాయి. అయితే ఫైనల్ మ్యాచ్ రేపు జరుగుతుందనగా సచిన్ టెండూల్కర్​ ఓ విషయాన్ని గమనించాడు. ఆ మ్యాచ్​ను ఫిక్స్ చేయడానికి భారత జట్టులోని ఒక సీనియర్ ప్లేయర్ ప్రయత్నిస్తున్నట్లు సచిన్​కు అర్థమైంది. ఆ సీనియర్ ప్లేయర్ బుకీలతో ఫోన్ కాల్ మాట్లాడుతుండటాన్ని మాస్టర్ బ్లాస్టర్ గుర్తించాడు. మ్యాచ్ ఫిక్స్ కాబోతోందని అప్పటి భారత జట్టు మేనేజర్ అన్షుమన్ గైక్వాడ్​కు ఒక ఫోన్ కాల్ వచ్చింది. దీంతో తన ఓపెనింగ్ పార్ట్​నర్ అయిన గంగూలీని పిలిచాడు సచిన్. మ్యాచ్ ఫిక్సింగ్​కు ప్రయత్నాలు జరుగుతున్న అంశాన్ని గంగూలీతో చర్చించాడు. ఎలాగైనా ఆ సీనియర్ ప్లేయర్ ప్రయత్నాన్ని అడ్డుకోవాలని వీళ్లిద్దరూ డిసైడ్ అయ్యారు.

ఇన్నింగ్స్ ఓపెనింగ్ చేసేది తామే కాబట్టి మ్యాచ్​ను గెలిపించాలని వాళ్లు నిర్ణయించుకున్నారు. టాస్ గెలిచి బ్యాటింగ్​కు దిగిన భారత్​కు భారీ స్కోరును అందించారు సచిన్​-గంగూలీలు. తొలి వికెట్​కు ఏకంగా 252 రన్స్ జోడించారు. సచిన్ (128), గంగూలీ (109)లు సెంచరీలతో చెలరేగారు. దీంతో భారత్ 50 ఓవర్లలో 307 రన్స్ చేసింది. ఛేజింగ్​కు దిగిన లంక ఇన్నింగ్స్​లో అరవింద్ డిసిల్వా సెంచరీ చేసినా.. ఆ జట్టు 6 రన్స్ తేడాతో ఓడిపోయింది. ముత్తయ్య మురళీధరన్, ధర్మసేన, జయసూర్య లాంటి వారి బౌలింగ్​లో సచిన్​-దాదా విజృంభించి ఆడారు. జట్టును ఎలాగైనా గెలిపించాలని అనుకొని మరీ భారత్​కు విజయాన్ని, ట్రోఫీని అందించారు. తమ బ్యాటింగ్​తో మ్యాచ్ ఫిక్సింగ్​ను అడ్డుకొని భారత జట్టును ఆదుకున్నారు. ఇదో రియల్ స్టోరీ. ఈ విషయాన్ని అప్పటి జట్టు మేనేజర్ అన్షుమన్ గైక్వాడ్ పలు టీవీ ఇంటర్వ్యూల్లోనూ చెప్పాడు. తనకు వచ్చిన కాల్స్​ గురించి.. సచిన్-గంగూలీలు కలసి భారత జట్టును ఆ మ్యాచ్​లో ఎలా బయటపడేశారో తెలిపాడు.