గిన్నిస్ వరల్డ్ రికార్డ్.. ఒకే చోట ఒకే పేరు గల 178 మంది వ్యక్తులు..

ఎవరికైనా తమ పేరుకి ఒక వైబ్రేషన్ ఉంటుంది. తమ పేరు ఉన్న వ్యక్తులు ఎదురైతే లోపల ఏదో తెలియని ఒక అనుభూతి కలుగుతుంది. బ్రో నీది, నాది ఒకే పేరు అని చెప్పుకుని సంబరపడిపోతుంటారు. అయితే జీవితంలో ఒకే పేరు గల వ్యక్తులు ఒకరిద్దరు ఎదురవుతుంటారు. కానీ వంద మందికి పైగా ఒకే పేరున్న వ్యక్తులు ఎక్కడైనా కలవడం చూశారా? మన పేరు కలిగిన వ్యక్తులు చాలా మంది ఉంటారు. కానీ అందరూ కలవడం అనేది అసాధ్యం. మహా అయితే మన పేరుతో ఉన్న వ్యక్తుల్లో ఒకరో, ఇద్దరో.. లేదా గట్టిగా పది మందిని కలిసే అవకాశం ఉంటుంది. కానీ ఒకే పేరు కలిగిన 178 మంది వ్యక్తులు ఒకే చోట కలవడం ఇప్పుడు అందరినీ ఆశ్చర్యానికి గురి చేస్తుంది. అసలు అంతమంది ఒకే చోట కలవాలనుకోవడమే పెద్ద ట్విస్ట్. ఇంతకే ఆ పేరు ఏంటంటే హిరోకాజు తనకా. పేరులో తనకా ఉందని, నగలు, నక్లీసులు తనకా పెట్టే బ్యాచ్ అనుకోకండి. ఈ బ్యాచ్ వేరే. 

జపాన్ రాజధాని టోక్యోలో ‘హిరోకాజు తనకా’ అనే పేరు గల 178 మంది వ్యక్తులు ఒకే చోట కలిశారు. ఒక ఆడిటోరియంలో శనివారం నాడు వీరందరూ కలిశారు. అదే ఇప్పుడు గిన్నిస్ వరల్డ్ రికార్డ్ తెచ్చిపెట్టింది. అతి ఎక్కువగా 178 మంది ఒకే చోట కలిసిన సమూహం ప్రపంచంలో ఇదే తొలిసారి. టోక్యోకి చెందిన ‘హిరోకాజు తనకా’ (53) అనే ఒక కార్పొరేట్ ఉద్యోగి ఈ అతి పెద్ద సమూహాన్ని ఏర్పాటు చేశాడు. ఒకే పేరు గల వ్యక్తులందరం ఒక చోట మీట్ అవుదాం రండ్రా అని అందరినీ ఉసికొలిపి ఇలా ఆడిటోరియంలో కూర్చోబెట్టాడు. ఇది ఇప్పటి కల కాదంట. ఈ తనకా గాడికి 1994 నుంచి ఈ డ్రీమ్ ఉందంట. 1994లో తన పేరు కలిగిన ఒక బేస్ బాల్ ప్లేయర్ ని చూసి ఆశ్చర్యపోయాడు. అరె నా పేరు సాధారణ పేరు కాదు, అదొక సెలబ్రిటీ పేరు అని సంతోషంలో మునిగితేలిపోయాడు తనకా.

అప్పటి నుంచి తన పేరుతో ఉన్న వ్యక్తుల కోసం వేట మొదలుపెట్టాడు. హిరోకాజు తనకా పేరుతో ఒక మినీ ఉద్యమాన్నే స్టార్ట్ చేశాడు. ఒక్కొక్కరూ ఇతని ఒకే పేరు గల కుటుంబంలో భాగమవుతూ వచ్చారు. గతంలో వీళ్లంతా కలిసి ఒక పాటను కూడా విడుదల చేశారు. ఈ 178 మందలో మూడేళ్ళ చిన్నారి నుంచి 80 ఏళ్ల వృద్ధుడు వరకూ అన్ని వయసుల వారూ ఉన్నారు. ఈ ఆత్మీయ కలయిక కోసం ఒక హిరోకాజు తనకా.. ఏకంగా వియాత్నం నుంచి జపాన్ కి వచ్చారు. తమ పేరు, నంబర్ తో ప్రింట్ చేయించుకున్న టీ షర్ట్స్ ని ధరించి మరీ కలుసుకున్నారు. ఒక 5 నిమిషాల పాటు ఒక ఆడిటోరియంలో అందరూ కూర్చున్నారు. గిన్నిస్ బుక్ ఆఫ్ రికార్డ్స్ అధికారి ఈ సరికొత్త రికార్డును ప్రకటించారు. ప్రపంచంలోనే అతి పెద్ద ఆత్మీయ కలయిక ఇదే అంటూ ప్రకటించారు.

గతంలో న్యూయార్క్ లో 164 మంది ‘మార్తా స్టీవర్ట్’ పేరుతో ఒక రికార్డ్ ఉండేది. ఆ రికార్డ్ ని ఇప్పుడు ‘హిరోకాజు తనకా’ బ్యాచ్ బద్దలు కొట్టింది. 2017లో కేవలం 87 మంది మాత్రమే కలిసిన హిరోకాజు తనకా బ్యాచ్ ఇప్పుడు 178 మందితో పాత రికార్డ్ ని బ్రేక్ చేశారు. అయితే ఈ కాయ్ కచోడీ గాళ్లంతా ఒకే చోట కలిసారు. మరి అంతమందలో కొంచెం దూరంగా ఉన్న వాడ్ని పిలవాలంటే.. ఉష్ ఉష్ అనో.. ఏవాయ్ అనో పిలిస్తే బాగోదు కాబట్టి.. ఒక పరిష్కారం కనుక్కున్నారు. ఏంటంటే.. ప్రతీ తనకా గాడికి ఒక అభిరుచి ఏడుస్తుంది కదా. వృత్తిలో గానీ, ఇష్టమైన ఆహారం ఏదో ఒకటి ఉంటాయి కదా. ఆ పేర్లతో పిలుచుకుంటారట.

ఒకడి పేరు సన్ గ్లాసెస్, ఇంకొకడి పేరు చూయింగ్ గమ్ ఇలా ఒక్కొక్కరినీ ఒక్కో నిక్ నేమ్ తో పిలుచుకుంటారు. అదన్నమాట విషయం. మొత్తానికి ఈ గిన్నిస్ రికార్డ్ కి కారణమైన అసలు ‘హిరోకాజు తనకా’ అనుకున్నది సాధించాడు. పైగా ఏమంటాడు.. ‘ఇది మా అందరి పిచ్చితనానికి ఒక ఉదాహరణ. పేరు మీద ఇలా గిన్నిస్ వరల్డ్ రికార్డ్ దక్కడం విచిత్రమైన అనుభూతి’ అంటూ సెలవిచ్చాడు. ప్రస్తుతం 178 మంది కలిసి ఒకే చోట కలిసిన వీడియో సోషల్ మీడియాలో వైరల్ అవుతోంది.

速報です🌟東京都渋谷区に178人のタナカヒロカズさんが集まり、ギネス世界記録「同姓同名の最大の集まり」更新㊗達成直後のタナカヒロカズさんたちをご覧ください！本当におめでとうございます！！ pic.twitter.com/RWeSzXHHPz

— ギネス世界記録｜書籍『ギネス世界記録2022』OUT NOW (@GWRJapan) October 29, 2022