నేనూ డిప్రెషన్‌ని ఎదుర్కొన్నా.. నా వల్ల గౌతమ్ కూడా!

తెరమీద కనిపించి కోట్లాది రూపాయల పారితోషికం తీసుకునే సెలబ్రిటీల లైఫ్ స్టైలే వేరు. కాలు కింద పెట్టరు, లగ్జరీ లైఫ్, కోరుకుంటే కొండమీది కోతిని కూడా కొని తెచ్చుకోగలరు అనుకుంటుంటారు కానీ పెద్దలు సామెత చెప్పినట్లు వాళ్లకుండే కష్టాలు వారికుంటాయి. అందరిలానే వాళ్లూ మనుషులే కదా.. ఒకప్పుడంటే స్టార్స్ తమకున్న ఆరోగ్య సమస్యల గురించి, ఇతర భయాల గురించి బయటకి పెద్దగా చెప్పేవారు. ముఖ్యంగా హీరోయిన్లు. పైకి బాగానే కనిపించినా లోలోపల ఏవో సమస్యలతో ఇబ్బంది పడుతుంటారు. ఇప్పుడున్నంత సోషల్ మీడియా అప్పట్లో లేదు కాబట్టి జనాలకు కూడా అలాంటి వాటి గురించి పెద్దగా తెలియదు. ఇప్పుడలా కాదు, ఏ విషయాన్నైనా ధైర్యంగా చెప్పేస్తున్నారు. పాజిటివ్ కామెంట్స్ వస్తే స్పందిస్తున్నారు. నెగిటివ్ కామెంట్స్ వస్తే ఘాటుగా రిప్లై ఇస్తున్నారు. రీసెంట్‌గా సీనియర్ యాక్ట్రెస్ కాజల్ అగర్వాల్ తను కూడా డిప్రెషన్‌కి గురయ్యానంటూ చేసిన కామెంట్స్ వైరల్ అవుతున్నాయి.

దర్శకుడు తేజ ‘లక్ష్మీకళ్యాణం’ మూవీతో కాజల్ అగర్వాల్‌ని తెలుగు ఇండస్ట్రీకి ఇంట్రడ్యూస్ చేశారు. తర్వాత చిన్నా చితకా సినిమాలు చేసింది కానీ ‘మగధీర’ తో దశ తిరిగిపోయింది. తక్కువ టైంలో స్టార్ హీరోయిన్‌గా మారిపోయింది. యంగ్, సీనియర్ అనే తేడా లేకుండా తెలుగు, తమిళం, హిందీలో మొత్తంగా 50కి పైగా సినిమాలు చేసింది. 2020లో బిజినెస్ మెన్ గౌతమ్ కిచ్లుని పెళ్లాడి, ఓ బాబుకి జన్మనిచ్చింది. కొద్ది కాలం ఫ్యామిలీతోనే కాలం గడిపింది. పెళ్లి తర్వాత కూడా ఆఫర్స్ వస్తుండడంతో తిరిగి సినిమాలు చేస్తుంది. తొలిసారి బాలకృష్ణ పక్కన ‘భగవంత్ కేసరి’ లో నటిస్తుంది. ‘ఇండియన్ 2’ తో పాటు ‘సత్యభామ’, ‘ఉమ’ వంటి లేడీ ఓరియంటెడ్ మూవీస్‌తోనూ బిజీగా ఉన్న కాజల్, రీసెంట్‌గా నెటిజన్లతో చాట్ చేస్తూ తన డిప్రెషన్ గురించి చెప్పుకొచ్చింది.

డిప్రెషన్ – ఫ్యామిలీ సపోర్ట్

‘డెలివరీ తర్వాత నేను కూడా డిప్రెషన్‌కి గురయ్యా. అది సర్వసాధారణ విషయం. మహిళలు ఎవరైనా సరే పోస్ట్ పార్టమ్ డిప్రెషన్‌తో బాధపడితే ఫ్యామిలీ అండగా నిలబడాలి. అలాగే ఆడవాళ్లు పిల్లలు పుట్టిన తర్వాత తమకంటూ కొంత టైం కేటాయించుకోవాలి. ట్రైనర్ సాయంతో వర్కౌట్స్ చేయడం, ఇష్టమైన వారితో సయమాన్ని గడపడం.. ఇలా కొన్ని పనుల ద్వారా డిప్రెషన్ నుండి బయటపడొచ్చు. నన్ను ఎంతగానో అర్థం చేసుకునే కుటుంబం ఉండడంతో దాని నుండి త్వరగా బయటకొచ్చేశాను. డిప్రెషన్ టైంలో నా వల్ల భర్త గౌతమ్ కిచ్లు చాలా క్లిష్టమైన పరిస్థితులు చూశారు’ అని చెప్పుకొచ్చింది కాజల్.