IPL 2023 ఫైనల్ కోసం రూ.10 లక్షలు ఖర్చు పెట్టిన స్టార్ హీరోయిన్!

ఇండియన్ ప్రీమియర్ లీగ్-2023 ప్రేక్షకులను విపరీతంగా అలరించింది. గత సీజన్లతో పోలిస్తే ఈసారి మ్యాచుల్లో ఉత్కంఠత తీవ్రస్థాయికి చేరింది. సీజన్​ తొలి అంచెలో కొన్ని మ్యాచ్​లు అయితే ఆడియెన్స్​ను మునివేళ్లపై నిల్చొని చూసేలా చేశాయి. లీగ్ సెకండాఫ్ కూడా తక్కువేమీ కాదు. ప్లేఆఫ్స్​కు ప్రతి మ్యాచ్​ కీలకంగా మారడంతో అన్ని జట్లు తమ శక్తివంచన లేకుండా పోరాడాయి. ఈసారి ప్లేయర్ల బ్యాటింగ్ మెరుపులు, ఫీల్డింగ్ విన్యాసాలు, బౌలింగ్ అద్భుతాలతో పాటు గ్రౌండ్​లో వివాదాలు కూడా బాగా హైలైట్​ అయ్యాయి. సౌరవ్ గంగూలీతో విరాట్ కోహ్లీ గొడవతో మొదలైన వివాదాల పరంపర.. ఆ తర్వాత గౌతం గంభీర్, నవీన్ ఉల్ హక్​ వరకు వెళ్లింది. తొలుత గంగూలీతో అనంతరం గంభీర్, నవీన్​తో వివాదాల్లో కోహ్లీ కేంద్రబిందువుగా మారాడు.

లీగ్ మ్యాచ్​ల మాదిరిగానే ప్లేఆఫ్స్​ కూడా ఉత్కంఠభరితంగా సాగాయి. టేబుల్ టాపర్​గా నిలిచిన గుజరాత్ టైటాన్స్​ను ఓడించి చెన్నై నేరుగా ఫైనల్స్​కు దూసుకెళ్లింది. హార్దిక్ సేన మాత్రం క్వాలిఫయర్-2లో ముంబై మీద నెగ్గాకే ఫైనల్​ ఫైట్​కు అర్హత సాధించింది. టైటిల్ ఫైట్​కు అంతా సిద్ధమనుకున్న వేళ వర్షం రూపంలో అంతరాయం ఏర్పడింది. తుదిపోరుకు వేదికగా ఉన్న అహ్మదాబాద్​లో వర్షం కురవడంతో మ్యాచ్​ సోమవారానికి వాయిదా పడింది. ఇవాళ మ్యాచ్ జరుగుతుందో లేదో చూడాలి. పూర్తి మ్యాచ్ సాధ్యం కాకపోతే సూపర్ ఓవర్ నిర్వహిస్తారు. దాంతో విజేతను నిర్ణయిస్తారు. ఒకవేళ అది కూడా కుదకపోతే గుజరాత్ టైటాన్స్​ను విన్నర్​గా ప్రకటిస్తారు.

సూపర్ ఓవర్ నిర్వహణ సాధ్యం కాకపోతే లీగ్ దశలో టేబుల్​ టాపర్​గా నిలిచినందున గుజరాత్​ కప్ విన్నర్​గా నిలుస్తుంది. మ్యాచ్ జరగాలా వద్దా అనేది ఇప్పుడు వరుణుడి చేతుల్లో ఉంది. ఇకపోతే, మన దేశంలో క్రికెట్​ను ఇష్టపడని ఎవరుంటారా చెప్పండి? సీఎస్​కే వర్సెస్ గుజరాత్ పోరును చూసేందుకు ఎందరో సెలబ్రిటీలు తరలివచ్చారు. వారిలో స్టార్ నటి వరలక్ష్మీ శరత్ కుమార్ ఒకరు. ఈ మ్యాచ్ కోసం ఆమె దాదాపు 20 టికెట్లు తీసుకున్నట్లు నెటిజన్స్ చెబుతున్నారు. ఒక్కో టికెట్ ధర రూ.50 వేలు వేసుకున్నా.. ఆమె దగ్గర ఉన్న టికెట్ల ధర రూ.10 లక్షల వరకు ఉంటుందని అంటున్నారు. సీఎస్​కేపై అభిమానంతో ఒక మ్యాచ్​కు ఏకంగా రూ.10 లక్షలు ఖర్చు పెట్టారట వరలక్ష్మీ. కాగా, ‘క్రాక్’, ‘నాంది’, ‘వీర సింహా రెడ్డి’ సినిమాలతో తెలుగు నాట ఆమె సూపర్ స్టార్​డమ్ సంపాదించిన విషయం విదితమే.