బ్యాంకు పనులు ఇప్పుడే చేసుకోండి.. ఏప్రిల్‌లో 15 రోజులు బ్యాంకులు క్లోజ్!

బ్యాంకు ఖాతాదారులారా.. మీకో ముఖ్య గమనిక. ప్రస్తుత ఆర్థిక సంవత్సరం మార్చి 31తో ముగిసి.. ఏప్రిల్ 1 నుంచి దేశంలో కొత్త ఆర్థిక సంవత్సరం మొదలు కానున్న క్రమంలో అనేక మార్పులు జరగనున్నాయి. అందులో ముఖ్యమైనది.. పాన్-ఆధార్ గడువు ఈ నెలాఖరుతో ముగియనుంది. ఇంకా ఏప్రిల్‌ నెలలో బ్యాంకులు సెలవుల కారణంగా 15 రోజులు మూతపడనున్నాయి. కావున మీకు ఏవైనా బ్యాంకులకు సంబంధించిన పనులు ఉంటే ముందుగా సెలవుల వివరాలు అందుకు తగ్గట్టుగా ప్లాన్ చేసుకోవడం ఉత్తమం.

రిజర్వ్ బ్యాంక్ ఆఫ్ ఇండియా విడుదల చేసిన సెలవుల జాబితా ప్రకారం.. 2023 ఏప్రిల్‌లో దేశవ్యాప్తంగా వివిధ ప్రాంతాల్లో మొత్తం 15 రోజుల పాటు బ్యాంకులు పని చేయవు. ఇందులో వారాంతపు సెలవులు కూడా కలిపి ఉన్నాయి. ఏప్రిల్ నెలలో.. మహావీర్ జయంతి, గుడ్ ఫ్రైడే, అంబేద్కర్ జయంతి వంటి అనేక పర్వదినాలు, జయంతులు ఉన్నవి కావున సెలవుల జాబితా పెద్దగానే ఉంది. బ్యాంకుల సెలవుల కారణంగా ఆర్థిక కార్యకలాపాలు తీవ్రంగా ప్రభావితమవుతాయి. కావున, ఖాతాదారులను ఇబ్బందుల నుంచి రక్షించడానికి ఆర్‌బీఐ ప్రతి నెలా బ్యాంకు సెలవుల జాబితాను విడుదల చేస్తుంది.

ఏప్రిల్ నెల బ్యాంకుల సెలవుల జాబితా..

• ఏప్రిల్ 1: కొత్త ఆర్థికసంవత్సరం తొలి రోజు కావున మిజోరం, చండీగఢ్, మేఘాలయ, హిమాచల్ ప్రదేశ్ మినహా మిగిలిన అన్ని రాష్ట్రాలలో బ్యాంకుల గేట్లు మూసేస్తారు. అంటే బ్యాంకులు పనిచేస్తాయి కానీ ప్రజల లావాదేవీలు జరగవు.
• ఏప్రిల్ 2: ఆదివారం
• ఏప్రిల్ 4 : మహావీర్ జయంతిని పురస్కరించుకుని వివిధ నగరాల్లో బ్యాంకులు మూసి ఉంటాయి
• ఏప్రిల్ 5: బాబూ జగ్‌జీవన్ రామ్ జయంతి సందర్భంగా హైదరాబాద్‌లో బ్యాంకులకు సెలవు.
• ఏప్రిల్ 7: గుడ్ ఫ్రైడే కావడంతో దేశవ్యాప్తంగా బ్యాంకులకు సెలవు
• ఏప్రిల్ 8: రెండో శనివారం
• ఏప్రిల్ 9: ఆదివారం
• ఏప్రిల్ 14: అంబేద్కర్ జయంతిని పురస్కరించుకుని బ్యాంకులకు సెలవు
• ఏప్రిల్ 15: వివిధ రాష్ట్రాల్లో ప్రాంతీయ పండగల నేపథ్యంలో ఆయా ప్రాంతాల్లో బ్యాంకులకు సెలవు.
• ఏప్రిల్ 16: ఆదివారం
• ఏప్రిల్ 18: షాబ్ ఇ బకర్ కారణంగా జుమ్మూ అండ్ శ్రీనగర్‌లో బ్యాంకులు మూసి ఉంటాయి.
• ఏప్రిల్ 21: రంజాన్ ఈద్(ఈద్ ఉల్ ఫితర్‌) అగర్తల, జమ్ము, కొచ్చి, శ్రీనగర్, తిరువనంతపురం ప్రాంతాల్లో బ్యాంకులకు సెలవు.
• ఏప్రిల్ 22: నాలుగో శనివారం
• ఏప్రిల్ 23: ఆదివారం
• ఏప్రిల్ 30: ఆదివారం

గమనిక: సెలవుల జాబితా అనేది ఆయా రాష్ట్రాల వారిగా వేరు వేరుగా ఉంటుంది. బ్యాంకుల సెలవు దినాల్లో మొబైల్ బ్యాంకింగ్, నెట్ బ్యాంకింగ్, యూపీఐ వంటి ఆన్‌లైన్ సౌకర్యాల ద్వారా ఖాతాదారులు తమ పనులు పూర్తి చేసుకోవచ్చు.