వన్డే ఫార్మాట్‌‌లో మార్పులు? సచిన్ ఇలాంటి సలహా ఇచ్చాడు ఏంటి?

ఒకప్పుడు టీవీలో మ్యాచ్ వస్తుందంటే చాలు.. జనమంతా ఒక్కచోట చేరిపోయేవారు. అది వన్డేనా..? టెస్టా..? అన్నది కాదు.. క్రికెట్‌పై మక్కువ. ఆ మక్కువతోనే ఐదు రోజుల పాటు సాగే టెస్ట్ మ్యాచును సైతం ఆసక్తిగా తిలకించేవారు. రాను.. రాను.. మ్యాచుల నిర్వహణలో విప్లవాత్మక మార్పులొచ్చాయి. టీ20, టీ20 అంటూ కొత్త కొత్త ఫార్మాట్లు పుట్టుకురావడంతో పాతవాటికి ఆదరణ తగ్గుతోంది. చెప్పుకోవడానికి టెస్ట్ మ్యాచులు కూడా అప్పుడప్పుడూ ఆసక్తి కలిగిస్తున్నా రోజంతా మ్యాచ్ ఎవరు చూస్తారంటూ అభిమానుల మనుషుల్లో ఒక బీజం నాటుకుపోయింది.

టీ20 ఫార్మాట్ వచ్చాక.. 50 ఓవర్ల మ్యాచులకు ఆదరణ తగ్గిందన్నది వాస్తవం. 3 గంటల సమయంలోనే మ్యాచ్ ఫలితం వచ్చేస్తుండడంతో అభిమానులు వీటికే జై కొడుతున్నారు. పైగా ధనాధన్ బ్యాటింగ్‌తో ఆటగాళ్ల మెరుపులు, ఫీల్డర్ల విన్యాసాలు వారికి టీ20 మ్యాచులపై మరింత ఆసక్తి కలిగిస్తున్నాయి. వన్డేలను కూడా అలా బోర్ కొట్టకుండా చూడాలని సూచిస్తున్నారు.. క్రికెట్ దేవుడు సచిన్ టెండూల్కర్. ఇండియా టుడే కాన్‌క్లేవ్ లో మాట్లాడిన మాస్టర్.. వన్డే ఫార్మాట్ బోర్ కొడుతోందని, అది మనుగడ సాగించాలంటే కొన్ని మార్పులు చేయాలని సూచించారు.

నాలుగు ఇన్నింగ్స్‌లు.. అదిరిపోయే ట్విస్ట్

వన్డేలను టెస్టుల్లాగా నాలుగు భాగాలు చేయాలని సూచిన సచిన్, తొలి ఇన్నింగ్స్ లో ఒక జట్టు ఆలౌట్ అయితే అక్కడితో వారి బ్యాటింగ్ ముగిసినట్లే అని తెలిపారు. ఈ విధంగా చేయడం వల్ల 10, 11వ బ్యాటర్ కూడా చాలా మ్యాచ్ ఫలితాన్ని తారుమారు చేయవచ్చన్నారు. “వన్డే ఫార్మాట్ ను 25 ఓవర్ల చొప్పున నాలుగు భాగాలు చేయాలి.. మొదట ఓ టీమ్ 25 ఓవర్లు ఆడాలి.. అనంతరం మరో జట్టు 25 ఓవర్లు ఆడుతుంది.. కానీ, టెస్టుల్లో 20 వికెట్లు ఉంటాయి. ఇక్కడ మాత్రం 10 వికెట్లు మాత్రమే ఉంటాయి. ఒకవేళ తొలి 25 ఓవర్లలోనే ఒక జట్టు పది వికెట్లు కోల్పోతే ఇక వారి ఇన్నింగ్స్ ముగిసినట్లే. తర్వాతి 25 ఓవర్లు ఆడే అవకాశం వారికి ఉండదు..” అని సచిన్ చెప్పుకొచ్చాడు.

Sachin Tendulkar on ODI Format pic.twitter.com/m7cjYqJojv

— RVCJ Media (@RVCJ_FB) March 18, 2023

ఈ ఫార్మాట్ సూచించడానికి సచిన్ ఒక ప్రత్యక్ష మ్యాచునే ఉదాహరణగా చెప్పారు. “నేను ఈ విధంగా చేయాలని ఎందుకు చెబుతున్నానంటే మేము శ్రీలంక పర్యటనలో ఒక మ్యాచులో ఎలాంటి ఫలితం లేకుండా 118 ఓవర్లు ఆడాము. తొలి రోజు శ్రీలంక బ్యాటింగ్ చేసి 10 ఓవర్లు ఆడాక వర్షం అంతరాయం కలిగించింది. తర్వాతి రోజు వర్షమే. ఎలాగోలా వారి ఇన్నింగ్స్ ముగిశాక మేము ఫలితం లేకుండా 118 ఓవర్లు ఆడాము. ఇది దేనికి ఉపయోగం. వన్డేలను 25 ఓవర్ల చొప్పున నాలుగు భాగాలుగా విడగొడితే.. కనీసం ఒక్కో టీమ్ 25 ఓవర్లు పూర్తి చేసుకుంటాయి”.

అంతేకాదు.. ప్రస్తుతం వన్డే క్రికెట్ మరీ ముందుగానే అంచనా వేసేటట్లుగా మారిపోయిందని తెలిపారు.. సచిన్. అందువల్లే ఆదరణ తగ్గుతోందన్నాడు. ఓ కెప్టెన్ టాస్ ఓడి రెండో ఇన్నింగ్స్ బౌలింగ్ చేయాల్సి వస్తే మంచు కారణంగా నష్టపోతున్నారని వ్యాఖ్యానించాడు. అలా కాకుండా ఒక్కో టీమ్ 25 ఓవర్లు ఆడితే వీటిని బ్యాలెన్స్ చేయొచ్చని తన అభిప్రాయాల్ని వెల్లడించాడు. అలాగే, వన్డేల్లో చివరి 10 ఓవర్లలో ఐదుగురు ఫీల్డర్లు సర్కిల్ లోపల ఉండాలన్న నిబంధనని కొట్టి పారేశాడు. స్పిన్నర్లకు తమ లైన్ మార్చుకునే అవకాశం దొరకడం లేకపోగా, భారీగా పరుగులు ఇచ్చుకోవాల్సి వస్తోందని వాళ్లు తనతో అన్నట్లు సచిన్ వెల్లడించాడు. సచిన్ సూచించిన 25 ఓవర్స్ ఫార్మాట్ వన్డేలకు వర్కౌట్ అవుతుందా..? మీ అభిప్రాయాలను కామెంట్ల రూపంలో తెలియజేయండి.

Do you know that ‘master blaster’ @sachin_rt remembers each of his dismissals. Take a look
Watch full video:https://t.co/azypM5XwEk#IndiaTodayConclave #Conclave23 #Cricket @NikhilNaz #SachinTendulkar pic.twitter.com/wtLfuqBXLa

— IndiaToday (@IndiaToday) March 17, 2023