నమ్మశక్యంకాని సిక్స్‌! ‘షాట్‌ ఆఫ్‌ ది ఇయర్‌’గా కొనియాడుతున్న క్రికెట్‌ లోకం

క్రికెట్‌లో కొన్నిషాట్లు ఎన్ని సార్లు చూసినా మళ్లీ మళ్లీ చూడాలనిపించేలా ఉంటాయి. క్రికెట్‌ ఫ్యాన్స్‌కు ఫుల్‌ వినోదాన్ని అందిస్తూ.. బౌలర్‌కు కోపం తెప్పించే షాట్లు కూడా కొన్ని ఉంటాయి. కానీ.. ఈ షాట్‌ మాత్రం అసలు నమ్మశక్యంకాని రీతిలో ఉంది. జెస్ట్‌ అలా పంచ్‌ చేస్తే.. వెళ్లి స్టాండ్స్‌లో పడింది. ఈ షాట్‌ను చూసిన క్రికెట్‌ అభిమానలు, మాజీ క్రికెటర్లు షాట్‌ ఆఫ్‌ ది ఇయర్‌గా కొనియాడుతున్నాడు. అంతలా క్రికెట్‌ ప్రేమికులను ఆకట్టుకున్న, అలరించిన ఈ షాట్‌ను వెస్టిండీస్‌ స్టార్‌ ఓపెనర్‌ కైల్‌ మేయర్స్‌ ఆడాడు. ఆస్ట్రేలియా స్టార్‌ ఆల్‌రౌండర్‌ గ్రీన్‌ బౌలింగ్‌లో స్వీపర్‌ కవర్స్‌ మీదుగా కొట్టిన పంచ్‌ సిక్స్‌ ఇప్పుడు సోషల్‌ మీడియాను, క్రికెట్ ప్రపంచాన్ని ఊపేస్తుంది. ఈ వీడియోను సోషల్‌ మీడియాలో క్రికెట్‌ ఫ్యాన్స్‌ తెగ షేర్‌ చేస్తున్నారు.

వెస్టిండీస్‌-ఆస్ట్రేలియా మధ్య క్వీన్స్‌లాండ్‌ వేదికగా జరిగిన తొలి టీ20 మ్యాచ్‌లో ఈ అద్భుతమైన షాట్‌ చోటుచేసుకుంది. ఆసీస్‌ బౌలర్‌ గ్రీన్‌ వేసిన ఇన్నింగ్స్‌ నాలుగో ఓవర్‌ మూడో బంతిని కైల్‌ మేయర్స్‌ అద్భుతమైన పంచ్‌తో సిక్స్‌ బాదాడు. ఆ షాట్‌ చూసిన వారు ఎవరైనా అది సిక్స్‌ వెళ్తుందని ఊహించరు. కానీ.. అది అలా అలా బుల్లెట్‌ వేగంతో వెళ్లి స్టాండ్స్‌లో పడింది. కైల్‌ ఆ బాల్‌పై చేసిన టైమింగ్‌తోనే అది అంత భారీ సిక్స్‌గా మారింది. మంచి బాల్‌ను కైల్‌ ఇలా స్వీపర్‌ కవర్స్‌ మీదుగా ఆడిన షాట్‌ నిజంగా సూపర్‌.

ఇక మ్యాచ్‌ విషయానికి వస్తే.. ఈ మ్యాచ్‌లో తొలుత బ్యాటింగ్‌ చేసిన వెస్టిండీస్‌ నిర్ణీత 20 ఓవర్లలో 9 వికెట్ల నష్టానికి 145 పరుగులు చేసింది. కైల్‌ మేయర్స్‌ 39, ఓడియన్‌ స్మిత్‌ 27 పరుగులతో రాణించారు. ఆసీస్‌ బౌలర్లలో హెజల్‌వుడ్‌ 3, స్టార్క్‌ 2, కమిన్స్‌ 2, గ్రీన్‌ ఒక వికెట్‌ పడగొట్టారు. కాగా.. ఈ నామమాత్రపు స్కోర్‌ను ఛేదించడంలో ఆస్ట్రేలియా ఆరంభంలో తడబడింది. విండీస్‌ బౌలర్‌ కాట్రెల్‌ ఆరంభంలోనే వార్నర్‌(14), మిచెల్‌ మార్ష్‌(3)లను అవుట్‌ చేసి ఆసీస్‌ను కష్టాల్లోకి నెట్టాడు. ఆ వెంటనే మాక్స్‌వెల్‌, టిమ్‌ డేవిడ్‌ డకౌట్‌ కావడంతో ఆస్ట్రేలియా 58 పరుగులకే 5 వికెట్లు కోల్పోయి పీకల్లోతు కష్టాల్లో పడింది. సొంత గడ్డపై విండీస్‌ చేతిలో ఓడిపోయేలా కనిపించింది. కానీ.. కెప్టెన్‌ ఆరోన్‌ ఫించ్‌(58), వికెట్‌ కీపర్‌ మ్యాథ్యూ వేడ్‌(39 నాటౌట్‌) ఆస్ట్రేలియాను ఓటమి కోరల్లోంచి బయటపడేశారు. చివరికి 19.5 ఓవర్లలో 7 వికెట్లు కోల్పోయి లక్ష్యాన్ని ఛేదించి 3 వికెట్లతో ఆసీస్‌ విజయం సాధించింది.

Shot of the year! 🤯🤯🤯pic.twitter.com/h658wEQjzZ

— Atishay Agarwal (@sportsontoast) October 5, 2022

ఇది కూడా చదవండి: రోహిత్‌ పేరిట అత్యంత చెత్త రికార్డు! ప్రపంచంలోనే తొలి ప్లేయర్‌