follow us:
ఖమ్మం- ఆంద్రప్రదేశ్ మాజీ ముఖ్యమంత్రి, టీడీపీ జాతీయ అధ్యక్షులు చంద్రబాబు నాయుడు కన్నీళ్లు పెట్టుకున్న ఘటనపై ఇంకా చర్చ జరుగుతోంది. తన సతీమణి భువనేశ్వరిపై అసెంబ్లీలో అనుచిత వ్యాఖ్యలు చేశారని మీడియా సమావేశంలో చంద్రబాబు వెక్కి వెక్కి ఏడ్చారు. ఎప్పుడూ గంబీరంగా ఉండే చంద్రబాబు అలా చిన్న పిల్లాడిలా ఏడ్వటంతో తెలుగు రాష్ట్రాల్లోనే కాదు జాతీయ స్థాయిలో రాజకీయ నాయకులు ఆశ్చర్యపోయారు.
ఐతే చంద్రబాబు సతీమణి భువనేశ్వరిపై తాము ఎటువంటి వ్యాఖ్యలు చేయలేదని వైసీపీ నేతలు చెబుతూ వచ్చారు. ఇదిగో ఈ ఎపిసోడ్ కు సంబంచింది తెలంగాణలో ఓ టీఆర్ ఎస్ నేత సంచలన ప్రకటన చేశాడు. నారా భువనేశ్వరిపై అనుచిత వ్యాఖ్యలు చేసిన వైసీపీ నేతలను చంపిన వారికి సుపారీ ఇస్తానని భహిరంగంగానే ప్రకటించాడో టీఆర్ ఎస్ నేత.
ఏపీ మంత్రి కొడాలి నాని, ఎంఎల్‌ఏలు వల్లభనేని వంశీ, అంబటి రాంబాబులను హత్య చేసేందుకు ముందుకొస్తే తాను 50 లక్షలు ఇస్తానని తెలంగాణలోని ఖమ్మం జిల్లా మధిర మున్సిపల్‌ కౌన్సిలర్‌ మల్లాది వాసు ఆఫర్ ఇచ్చారు. నవంబర్‌ 28న మధిర మండలం కృష్ణాపురం సమీపంలో బొప్పన నాగేశ్వరరావు మామిడితోటలో జరిగిన వనసమారాధన కార్యక్రమం సభావేదికపై కౌన్సిలర్‌ మల్లాది వాసు ఈ ప్రకటన చేశాడు. సమయం ఆసన్నమైంది.. మనల్ని మనమే ప్రూవ్‌ చేసుకోవాల్సిన అవసరం ఉంది.. అని అన్నాడు వాసు.
కులంలో ఉన్నటువంటి కొన్ని చీడ పురుగులు వంశీ, కొడాలి నాని, అలాంటి వాళ్లే గాకుండా మదపుటేనుగులా ప్రవర్తిస్తున్న అంబటి రాంబాబు.. ఇలాంటి వాళ్లను కూడా మనం ఓ ఆపరేషన్‌ స్టార్ట్‌ చేసి భౌతికంగా నిర్మూలించాల్సిన అవసరం ఉంది. దాని కోసం ఈ వేదిక మీద నుండి 50 లక్షలు ప్రకటిస్తున్నా.. అంటూ సుపారి ప్రకటించాడు వాసు. దీంతో వాసు మర్డర్ ఆఫర్ ఇప్పుడు రాజకీయవర్గాల్లో సంచలనం రేపుతోంది.
అన్నట్లు మల్లాది వాసు మధిర మున్సిపాలిటీ 10వ వార్డు కౌన్సిలర్‌. ఆయన సతీమణి మల్లాది సవిత 9వ వార్డు కౌన్సిలర్‌ గా పనిచేస్తున్నారు. ఈ దంపతులిద్దరూ గత మున్సిపల్‌ ఎన్నికల్లో కాంగ్రెస్‌ పార్టీ తరఫున గెలుపొంది, ఇటీవల టీఆర్‌ఎస్‌లో చేరారు.
