బీసీలకే చంద్రబాబు ప్రాధాన్యం.. సీట్ల విషయంలో తగ్గేదేలే!

బీసీలకు రాజకీయంగా మరింత ప్రాధాన్యం కల్పించే దిశగా తెలుగుదేశం పార్టీ కీలక నిర్ణయం తీసుకుంది. స్థానిక సంస్థల ఎన్నికల్లో బీసీలకు పార్టీ పరంగా 34 శాతం రిజర్వేషన్లు అమలు చేస్తామని ప్రకటించింది. బీసీలకు రాజకీయ సాధికారత కల్పించడమే తమ ప్రధాన లక్ష్యమని, చట్టపరంగా రిజర్వేషన్లు అమలు చేయలేని పరిస్థితులు ఉన్నప్పటికీ పార్టీ పరంగా బీసీలకు న్యాయం చేస్తామని స్పష్టం చేసింది.గత వైసీపీ ప్రభుత్వ హయాంలో బీసీలకు అన్యాయం జరిగిందని తెలుగుదేశం పార్టీ ఆరోపిస్తోంది. గతంలో స్థానిక సంస్థల ఎన్నికల్లో ఉన్న 34 శాతం బీసీ రిజర్వేషన్లను 24 శాతానికి తగ్గించారని, దీనివల్ల సుమారు 16 వేల 800 మంది బీసీలు రాజకీయ అవకాశాలను కోల్పోయారని పేర్కొంది. బీసీల రాజకీయ ప్రాతినిధ్యాన్ని పెంచాల్సిన అవసరం ఉందని, అందుకే పార్టీ పరంగా 34 శాతం రిజర్వేషన్లు అమలు చేయాలని నిర్ణయించినట్లు తెలిపింది.

బీసీలంటే కేవలం ఓటర్లు మాత్రమే కాదని, సమాజ నిర్మాణంలో కీలక పాత్ర పోషించే శక్తులని తెలుగుదేశం పార్టీ చెబుతోంది. బీసీలకు రాజకీయ పదవులతో పాటు ఆర్థికంగా, సామాజికంగా ఎదిగే అవకాశాలు కల్పించడమే తమ విధానమని స్పష్టం చేసింది. స్థానిక సంస్థల్లో బీసీల ప్రాతినిధ్యం పెరిగితే గ్రామస్థాయి నుంచి నాయకత్వం అభివృద్ధి చెందుతుందని, భవిష్యత్తులో మరింత మంది బీసీ నాయకులు రాజకీయంగా ఎదిగేందుకు అవకాశం ఉంటుందని అభిప్రాయపడింది.బీసీలకు న్యాయం చేసే విషయంలో తెలుగుదేశం పార్టీకి ప్రత్యేక చరిత్ర ఉందని ఆ పార్టీ గుర్తుచేస్తోంది. 1995లో స్థానిక సంస్థల ఎన్నికల్లో బీసీ రిజర్వేషన్లను 34 శాతానికి పెంచిన ఘనత తమదేనని పేర్కొంది. బీసీలకు రాజకీయ గుర్తింపు కల్పించడంలో ఎన్టీఆర్, చంద్రబాబు నాయకత్వంలోని తెలుగుదేశం పార్టీ కీలక పాత్ర పోషించిందని వివరించింది.

ఇక రాజకీయ రిజర్వేషన్లతో పాటు బీసీల ఆర్థికాభివృద్ధికి కూడా కూటమి ప్రభుత్వం పెద్దపీట వేస్తున్నట్లు ప్రకటించింది. ఆదరణ పథకం కింద 341 రకాల పనిముట్లను 90 శాతం సబ్సిడీతో అందించేందుకు చర్యలు చేపడుతున్నట్లు తెలిపింది. చేతివృత్తులపై ఆధారపడి జీవించే కుటుంబాలకు ఆధునిక పనిముట్లు అందించడం ద్వారా వారి ఆదాయాన్ని పెంచడమే లక్ష్యమని వివరించింది. అలాగే వడ్డెర్లకు 10 శాతం మైనింగ్ రీచ్‌లు, గీత కార్మికులకు 10 శాతం ఎక్సైజ్ షాపులు కేటాయించనున్నట్లు పేర్కొంది. నేతన్న నేస్తం పేరుతో ఒక్కో చేనేత కుటుంబానికి ఏడాదికి 25 వేల రూపాయల ఆర్థిక సాయం అందించనున్నట్లు తెలిపింది. సంప్రదాయ వృత్తులపై ఆధారపడిన కుటుంబాలకు ఆర్థిక భరోసా కల్పించేందుకు ప్రత్యేక కార్యక్రమాలు అమలు చేస్తున్నట్లు వివరించింది.

మత్స్యకారుల సంక్షేమానికి కూడా ప్రత్యేక ప్రాధాన్యం ఇస్తున్నట్లు పేర్కొంది. మత్స్యకారుల సేవలో పథకం ద్వారా వేట విరామ సమయంలో ఒక్కో కుటుంబానికి 20 వేల రూపాయల ఆర్థిక సాయం అందిస్తున్నట్లు తెలిపింది. గత ప్రభుత్వం రద్దు చేసిన జీవో నంబర్ 217ను రద్దు చేసి మత్స్యకారుల హక్కులను కాపాడినట్లు పేర్కొంది. మత్స్యకార మహిళలకు ఉచిత బస్సు ప్రయాణ సౌకర్యం కల్పిస్తున్నామని, తీర ప్రాంతాల్లో వేటకు వెళ్లే మత్స్యకారులకు రక్షణ చర్యలు చేపడుతున్నామని వివరించింది.హ్యాండ్లూమ్ మగ్గాలకు నెలకు 200 యూనిట్లు, పవర్‌లూమ్ మగ్గాలకు నెలకు 500 యూనిట్ల వరకు ఉచిత విద్యుత్ అందించేందుకు చర్యలు తీసుకుంటున్నట్లు తెలిపింది. నాయీ బ్రాహ్మణులు నిర్వహించే సెలూన్లకు నెలకు 200 యూనిట్ల వరకు ఉచిత విద్యుత్ అందిస్తున్నట్లు పేర్కొంది. స్వర్ణకారుల కోసం ప్రత్యేక కార్పొరేషన్ ఏర్పాటు, దేవాలయాల్లో పనిచేసే నాయీ బ్రాహ్మణుల భృతిని 15 వేల నుంచి 25 వేల రూపాయలకు పెంచడం వంటి చర్యలను కూడా ప్రస్తావించింది.

బీసీలకు రాజకీయంగా పదవులు ఇవ్వడమే కాకుండా వారి జీవన ప్రమాణాలను మెరుగుపరచడం కూడా తమ లక్ష్యమని తెలుగుదేశం పార్టీ స్పష్టం చేస్తోంది. స్థానిక సంస్థల్లో 34 శాతం రిజర్వేషన్లను పార్టీ పరంగా అమలు చేయడం ద్వారా బీసీలకు మరిన్ని రాజకీయ అవకాశాలు కల్పిస్తామని ప్రకటించింది. మొత్తానికి బీసీల రాజకీయ ప్రాతినిధ్యం, సంక్షేమం, ఆర్థికాభివృద్ధి అనే మూడు అంశాలను ప్రధానంగా తీసుకుని తెలుగుదేశం పార్టీ తన విధానాన్ని ప్రకటించింది. స్థానిక సంస్థల ఎన్నికల్లో 34 శాతం బీసీ రిజర్వేషన్లను పార్టీ పరంగా అమలు చేస్తామన్న నిర్ణయం ఇప్పుడు ఆంధ్రప్రదేశ్ రాజకీయాల్లో ప్రాధాన్యం సంతరించుకుంది. ఈ నిర్ణయం క్షేత్రస్థాయిలో ఎలా అమలవుతుంది? బీసీలకు ఎంతవరకు రాజకీయ అవకాశాలు లభిస్తాయి? అనేది రాబోయే స్థానిక సంస్థల ఎన్నికల్లో తేలనుంది