ఇంగ్లండ్ కొంపముంచిన కెప్టెన్ స్టోక్స్.. అతడి తప్పు వల్లే ఓటమి!

ప్రపంచ క్రికెట్​లో ఎన్నో గొప్ప మ్యాచ్​లను చూసుంటారు. వరల్డ్ కప్​ లాంటి టోర్నీల్లో జట్లు తలపడే తీరు, గెలుపు కోసం చివరి దాకా చేసే పోరాటాలు చూడటానికి రెండు కళ్లు చాలు. అలాంటి గొప్ప మ్యాచ్​లు ఒకే సిరీస్​లో చూడాలంటే అది కేవలం యాషెస్​తోనే సాధ్యం. బూడిద కప్​​ కోసం జరిగే ఈ సిరీస్​లో నెగ్గేందుకు ఆస్ట్రేలియా, ఇంగ్లండ్ జట్ల ప్లేయర్లు ప్రాణం పెట్టేస్తారు. ఎట్టి పరిస్థితుల్లోనూ ఓటమిని ఒప్పుకోరు. అందుకే చాలా మటుకు యాషెస్​ మ్యాచ్​లు ఆఖరి రోజు, చివరి సెషన్ వరకు వెళ్తాయి. ఒత్తిడిని తట్టుకున్న జట్టే విజేతగా నిలుస్తుంది. హైటెన్షన్​ మ్యాచ్​లు కాబట్టే యాషెస్​ సిరీస్​కు అంత ఆదరణ ఉంటుంది. ఈసారి యాషెస్​ సిరీస్​కు ఘనమైన ఆరంభం దక్కింది. ఎప్పటిలాగే మ్యాచ్​ చివరి రోజు, లాస్ట్ సెషన్​లో ఫలితం తేలింది. ఉత్కంఠత తీవ్రస్థాయికి చేరుకున్న మ్యాచ్​లో ఆసీస్ 2 వికెట్ల తేడాతో ఇంగ్లండ్​ను ఓడించింది. ఓపెనర్ ఖవాజా (65), కెప్టెన్ ప్యాట్ కమిన్స్ (44)లు కంగారూ టీమ్ గెలుపులో కీలక పాత్ర పోషించారు.

ఇంగ్లీష్ బౌలర్లను కాచుకొని లయన్ (16) అండగా కమిన్స్​ జట్టును విజయతీరాలకు చేర్చాడు. దీంతో ఆసీస్ సారథిపై ప్రశంసల జల్లులు కురుస్తున్నాయి. అదే టైమ్​లో ఇంగ్లండ్​ టీమ్ కెప్టెన్ బెన్​ స్టోక్స్​పై విమర్శలు వస్తున్నాయి. బజ్​బాల్ పేరుతో ఈ మ్యాచ్​ తొలిరోజే సాహసం చేశాడు స్టోక్స్. ఫస్ట్ డే పూర్తి బ్యాటింగ్ చేయకుండా తొలి ఇన్నింగ్స్​ను 8 వికెట్ల నష్టానికి 393 రన్స్ దగ్గర డిక్లేర్ చేశాడు. ఆ తర్వాత ఇంగ్లీష్ టీమ్​కు ధీటుగా బదులిచ్చింది ఆసీస్. ఆ జట్టు 386 రన్స్​కు ఆలౌట్ కావడంతో ఇంగ్లండ్​కు స్వల్ప ఆధిక్యం లభించింది. ఒకవేళ స్టోక్స్ ఫస్ట్ ఇన్నింగ్స్​ను డిక్లేర్ చేయకుండా ఉంటే.. ఇంగ్లండ్​కు మరో 30 నుంచి 40 రన్స్ లీడ్ దొరికి ఉండేది. దీంతో రెండో ఇన్నింగ్స్​లో ఆసీస్​కు ఛేజింగ్ మరింత కష్టమయ్యేది. స్టోక్స్ చేసిన ఆ ఒక్క తప్పే ఇంగ్లండ్​ ఓటమికి కారణమైందని సోషల్ మీడియాలో నెటిజన్స్ అంటున్నారు. ప్రతిసారి బజ్​బాల్ వ్యూహం పనికిరాదని స్టోక్స్ అర్థం చేసుకోవాలని సూచిస్తున్నారు. మరి.. రెండో టెస్టు నుంచి బజ్​బాల్​ క్రికెట్​ను ఇంగ్లీష్ టీమ్ కొనసాగిస్తుందో లేదో చూడాలి.