follow us:
క్రికెట్ లో స్పిన్ మాంత్రికుడిగా తనకంటూ గుర్తింపు తెచ్చుకున్న ఆస్ట్రేలియా లెజండరీ లెగ్ స్పిన్నర్ షేన్ వార్న్ శుక్రవారం(మార్చి 4) థాయ్‌లాండ్లోని ఓ విల్లాలో మరణించిన సంగతి తెలిసిందే. 52 ఏళ్ల వయసున్న షేన్ వార్న్ హార్ట్ అటాక్ తో మరణించినట్లు అక్కడి పోలీసులు ప్రాథమికంగా తేల్చారు. ఇక వార్న్ మృతిపట్ల యావత్‌ క్రీడాలోకం దిగ్భ్రాంతికి గురైంది. తమ అభిమాన సహచరుడు లేడనే వార్త విని క్రికెట్ ప్రముఖులు విషాదంలో మునిగారు. తన మణికట్టు మాయాజాలంతో ప్రత్యర్థి బ్యాటర్ల పని పట్టిన షేన్ వార్న్.. ఆస్ట్రేలియా విజయాల్లో కీలక పాత్ర పోషించాడు. ఆసీస్ తరఫున 1992లో టెస్టుల్లో అరంగేట్రం చేసిన వార్న్, 1993 లో వన్డేల్లో అరంగ్రేటం చేశాడు. రెండు ఫార్మాట్లలో కలిపి వెయ్యికి పైగా వికెట్లు తీశాడు.
జట్టు ఏదైనా.. పిచ్ ఎలాంటిదైనా తన మణికట్టు మాయాజాలంతో ప్రత్యర్థి బ్యాటర్లకు అంతుచిక్కని బంతులను వేస్తూ వికెట్లు తీయగల సమర్థుడు షేన్ వార్న్. ఇక 1993లో యాషెష్ సిరీస్ లో భాగంగా ఇంగ్లాండ్ తో జరిగిన టెస్టు మ్యాచులో అతడు వేసిన ఓ బంతి ’బాల్ ఆప్ ద సెంచరీ‘గా నిలిచింది. ఇంగ్లండ్ బ్యాటర్ మైక్ గ్యాటింగ్ ను ఎక్కడో లెగ్ స్టంప్ ఆవల పిచ్ అయిన బంతి అనూహ్యంగా గింగిరాలు తిరుగుతూ వికెట్లను గిరాటేసింది. ఆ బంతితో వార్న్ ఒక్కసారిగా ప్రపంచ హీరో అయిపోయాడు. అయితే ఇవన్నీ.. వార్న్ జీవితంలో ఒక వైపు మాత్రమే. మరో వైపు వివాదాలు కనిపిస్తాయి. 2003 ప్రపంచకప్ ముంగిట డోపీగా తేలడం, ఫిక్సింగ్ ఆరోపణలు, అమ్మాయిలతో రాసలీలలు.. ఇలా మరెన్నో అతడి మంచితనాన్ని చెడిపేశాయి. ఇవన్నీ ఒక ఎత్తైతే.. బిగ్ బాష్ లీగ్ సందర్భంగా వెస్టిండీస్ ప్లేయర్ సామ్యూల్స్ తో వివాదం అప్పట్లో పెద్ద దుమారాన్ని రేపింది.
An ugly, but unforgettable moment in one of the @BBL‘s earliest Melbourne Derbies.
Warne vs Samuels is No.9 in our countdown: https://t.co/PQmRqn1r0i pic.twitter.com/sQfa9zfRJo
— cricket.com.au (@cricketcomau) November 19, 2020
ఆస్ట్రేలియాలో బిగ్ బాష్ లీగ్ 2012-13 సీజన్ సందర్భంగా మెల్ బోర్న్ స్టార్స్, మెల్ బోర్న్ రెనెగేడ్స్ జట్ల మధ్య మ్యాచ్ జరిగింది. స్టార్స్ బ్యాటర్ డేవిడ్ హస్సీ రెండో పరుగు తీస్తున్న సమయంలో అతడిని ప్రత్యర్థి ప్లేయర్ సామ్యూల్స్ అడ్డుకున్నాడు. దీన్ని మనసులో పెట్టుకున్న వార్న్.. సామ్యూల్స్ బ్యాటింగ్ చేస్తున్నప్పుడు అతడితో గొడవ పెట్టుకున్నాడు. ’జెర్సీ పట్టుకొని లాగుతావా నువ్వు‘ అంటూ అసభ్యకర పదాలతో సామ్యూల్స్ ను దూషిస్తాడు. అనంతరం సామ్యూల్స్ పై బంతిని కూడా విసరతాడు. దీనికి ఆగ్రహించిన సామ్యూల్స్ వార్న్ కు సమీపంగా బ్యాట్ ను త్రో చేస్తాడు. ఒక రకంగా మ్యాచ్ లో వీరిద్దరూ కొట్టుకుంటారా అన్నట్లు కనిపిస్తారు. అందుకు సంబంధించిన వీడియో ప్రస్తుతం సోషల్ మీడియాలో వైరలవుతోంది.
