ర‌ష్యా-ఉక్రెయిన్ యుద్ధం.. ఇండియాపై ఎలాంటి ప్రభావం?

కరోనాతో దెబ్బతిన్న‌ ఆర్థిక వ్య‌వ‌స్థ కార‌ణంగా ఇప్ప‌టికే దేశ వ్యాప్తంగా ధరల పెరుగుదలతో సామాన్యుడు ఇబ్బంది ప‌డుతున్నాడు. తాజాగా మ‌రో సంక్షోభం సామాన్యుడిపై ప్ర‌భావం చూపనుంది. ఉక్రెయిన్ సంక్షోభం ప్రపంచ దేశాలను కలవరపెడుతోంది. తూర్పు ఉక్రెయిన్ లోని లుహాన్క్స్ , దోనెట్క్స్ రెండు ప్రాంతాలను స్వతంత్ర ప్రాంతాలుగా గుర్తిస్తూ రష్యా అధ్యక్షుడు పుతిన్ సంచలన ప్రకటన చేశారు. అంతటితో ఆగకుండా ఒక రోజు గడువులో ఏకంగా ఉక్రెయిన్ లోని డోన్ బాస్ ప్రాంతంపై మిలిటరీ దాడులు చేపట్టాలని రష్యా బలగాలకు ఆదేశాలిచ్చారు . ఈ సంక్షోభం ప్రపంచ ఆర్థిక వ్యవస్థపై ప్రభావం చూపుతోంది. దేశీయ స్టాక్ మార్కెట్లు భారీ నష్టాల్లో కొనసాగుతున్నాయి. అంతర్జాతీయంగా క్రూడాయిల్ ధరలు ఆకాశాన్ని అంటుతున్నాయి. మరోవైపు బంగారం పరుగులు పెడుతోంది.

ప్ర‌స్తుతం ఈ సంక్షోభం ముదిరితే దేశంలో ఏ వ‌స్తువుల ధ‌ర‌లు పెరుగుతాయ‌నేది పెద్ద అంశం.

• ఉక్రెయిన్ – రష్యా యుద్ధం కార‌ణంగా గ్లోబల్ గ్యాస్ క్రంచ్ ఏర్ప‌డే అవ‌కాశం ఉంది. ఈ ప్రభావం త్వరలో దేశీయ గ్యాస్ ధరలపై చూపవచ్చు,  వీటి ధరలు ఏప్రిల్ నుండి రెట్టింపు కావచ్చని అంచనా వేస్తున్నారు.
• దీని ప్రభావం ముడి చమురుపై అధికంగా ఉండనుంది. అంతర్జాతీయంగా క్రూడాయిల్ ధరలు భారీగా పెరగనున్నాయి. దేశంలో దీని ప్రభావం మరింత ఎక్కువ కానుంది. లీటర్ పెట్రోల్ 130 రూపాయలు దాటొచ్చని అంచనా వేస్తున్నారు.
• యుద్ధం ప్రభావం మద్యంపై కూడా పడనుంది. మద్యం తయారీలో ఉపయోగించే ప్రధాన వనరు బార్లీ (గోధుమ ఉత్పత్తులు). రష్యా ఉక్రెయిన్ దేశాలు వీటిని ఎక్కువుగా ఉత్పత్తి చేయడమే కాకుండా.. అంతర్జాతీయంగా బార్లీ ఎగుమతుల్లో వీటి వాటా 25 శాతం.
• విద్యుత్ ధరలు పెరిగే అవకాశం ఉంది. దీనివల్ల రవాణా ఖర్చులు, పరిశ్రమల నిర్వహణ ఖర్చులు కూడా పెరుగుతాయి. అంతే కాకుండా ప్రభుత్వ ఎరువుల సబ్సిడీ బిల్లు కూడా పెరిగే అవకాశం ఉంది.
• వంట నూనెల ధ‌ర‌లు పెరిగే అవకాశం ఉంది. త‌ద్వారా.. వండిన ఆహార ప‌దార్థాల ధ‌ర‌లు పెరిగే అవ‌కాశం ఉంది. దేశంలో ఉపయోగించే వంట నూనెల్లో సన్ ఫ్లవర్ ఆయిల్ వాటా గణనీయంగా ఉంది. పామ్ ఆయిల్ తర్వాత సన్ ఫ్లవర్ ఆయిల్‌ను ఇండియాలో ఎక్కువగా వినియోగిస్తున్నట్లు లెక్కలున్నాయి. ఉక్రెయిన్ నుంచి సన్ ఫ్లవర్ ఆయిల్ సరఫరాలు తగ్గిన క్రమంలో ధరలు పెరుగుతున్నాయి.
• బంగారం ధర పరుగులు పెడుతోంది. పెట్టుబడులకు అనుకూలంగా భావించడం వల్ల మదుపర్లు బంగారాన్ని ఎంచుకుంటున్నారు.. దీని వల్ల బంగారం ధర 60 వేల మార్కును దాటుతుందని అంచనా వేస్తున్నారు.