బ్రేకింగ్: భారత ఉక్కు మనిషి.. టాటా స్టీల్ మాజీ ఎండీ మృతి..

భారత ఉక్కు మనిషి, టాటా సన్స్ మాజీ డైరెక్టర్, టాటా స్టీల్ మాజీ ఎండీ జంషెడ్ జె ఇరానీ (86) ఇక లేరు. ఇండియన్ స్టీల్ మేన్ గా పేరొందిన జంషెడ్ జె ఇరానీ సోమవారం రాత్రి 10 గంటల సమయంలో జంషెడ్ పూర్ లో టాటా హాస్పిటల్ లో చికిత్స పొందుతూ మరణించారు. భారతదేశపు ఉక్కు మనిషి, పద్మభూషణ్ డాక్టర్ జంషెడ్ జె ఇరానీ కన్నుమూసిన విషయాన్ని టాటా స్టీల్ కంపెనీ ప్రకటనలో వెల్లడించింది. జూన్ 2 1936లో జన్మించిన ఈయన భారతదేశ ఆర్థిక సరళీకరణ సమయంలో టాటా స్టీల్ కంపెనీ అభివృద్ధికి విపరీతంగా కృషి చేశారు. భారతదేశంలో ఉక్కు పరిశ్రమని వృద్ధిలోకి తీసుకొచ్చినటువంటి మహోన్నతమైన వ్యక్తి జె జె ఇరానీ. ఈయన 1979లో టాటా స్టీల్ కంపెనీలో జనరల్ మేనేజర్ గా, 1985లో ప్రెసిడెంట్ గా, 1988లో జాయింట్ మేనేజింగ్ డైరెక్టర్ గా, 1992లో మేనేజింగ్ డైరెక్టర్ గా చేసి విశిష్ట సేవలందించారు.

జూన్ 2011లో టాటా స్టీల్ బోర్డు నుంచి పదవీ విరమణ తీసుకున్నారు. 43 ఏళ్ల పాటు విశిష్టమైన సేవలను అందించి అందరి ప్రశంసలు అందుకున్నారు. తన ప్రతిభా చాతుర్యంతో టాటా స్టీల్ కంపెనీకి అంతర్జాతీయ ఖ్యాతిని, గుర్తింపుని తీసుకొచ్చారు. ఈయన చేసిన కృషికి భారత ఉక్కు మనిషి అన్న పేరు కూడా వచ్చింది. భారతదేశ ఉక్కు మనిషి అయిన సర్దార్ వల్లభభాయి పటేల్ (అక్టోబర్ 31 1875 -డిసెంబర్ 15 1950) జయంతి రోజున జె జె ఇరానీ మరణించడం ఆశ్చర్యపరుస్తుంది. సర్దార్ పటేల్ తర్వాత ఉక్కు మనిషి అన్న బిరుదును జంషెడ్ జె ఇరానీ సొంతం చేసుకున్నారు. ఉక్కు మనిషిగా పేరొందిన జంషెడ్ జె ఇరానీ మృతిపై టాటా స్టీల్ ప్రగాఢ సానుభూతిని ప్రకటించింది.

We are deeply saddened at the demise of Padma Bhushan Dr. Jamshed J Irani, fondly known as the Steel Man of India. Tata Steel family offers its deepest condolences to his family and loved ones. pic.twitter.com/gGIg9JgGMS

— Tata Steel (@TataSteelLtd) October 31, 2022