స్టార్ హీరోకు సెబీ షాక్.. స్టాక్ మార్కెట్​లోకి రాకుండా బ్యాన్!

బాలీవుడ్ స్టార్ నటుడు అర్షద్ వార్సీ గురించి తెలిసిందే. ‘మున్నాభాయ్’ సిరీస్ సినిమాలతో ఆయన యాక్టర్​గా మంచి క్రేజ్ సంపాదించాడు. ‘మున్నాభాయ్ ఎంబీబీఎస్’ను తెలుగులో ‘శంకర్​దాదా ఎంబీబీఎస్​’గా మెగాస్టార్ చిరంజీవి హీరోగా రీమేక్ చేసిన విషయం విదితమే. హిందీలో ఎంత హిట్టయ్యిందో తెలుగులోనూ ఈ మూవీ అంతే పెద్ద విజయం సాధించింది. ఆ తర్వాత ‘సలామ్ నమస్తే’, ‘గోల్​మాల్ రిటర్న్స్​’, ‘జాలీ ఎల్​ఎల్​బీ’ చిత్రాలతో తన క్రేజ్​ను మరింతగా పెంచుకున్నాడు అర్షద్. ఇటీవల ‘బచ్చన్​ పాండే’లోనూ ఆయన మెరిశాడు. ప్రస్తుతం ఆయన పలు చిత్రాల షూటింగ్స్​తో బిజీబిజీగా ఉన్నారు. ఇలాంటి తరుణంలో ఆయనకు సంబంధించిన ఓ న్యూస్ కలకలం రేపింది.

అర్షద్ వార్సీపై సెక్యూరిటీస్ అండ్ ఎక్స్ఛేంజ్ బోర్డ్ ఆఫ్ ఇండియా (సెబీ) బ్యాన్ విధించింది. యూట్యూబ్ ద్వారా పంప్ అండ్ డంప్​కు పాల్పడుతున్న ఆరోపణలపై అర్షద్​తో పాటు మరో 45 మంది వ్యక్తుల మీద సెబీ కొరడా ఝళిపించింది. స్టాక్ మార్కెట్లోకి ప్రవేశించకుండా వారందరిపై ఒక ఏడాది పాటు నిషేధం విధించింది. అసలు పంప్ అండ్ డంప్ అంటే ఏంటంటే.. చౌకగా కొనుగోలు చేసిన స్టాక్​ను ఎక్కువ ధరకు విక్రయించడానికి.. తప్పుడు ప్రకటనల ద్వారా స్టాక్​ రేట్​ను కృత్రిమంగా పెంచేందుకు ప్రయత్నించడాన్ని పంప్ అండ్ డంప్ అంటారు. యూట్యూబ్​లో ఈ ప్రక్రియ ద్వారా అర్షద్ వార్సీ రూ.29.43 లక్షలు, ఆయన భార్య ర.37.56 లక్షలు అక్రమంగా లబ్ధిపొందారని తెలుస్తోంది. ఈ కేసులో వీరితో పాటు ఇతర నిందితులు అక్రమంగా సంపాదించిన సొమ్మును జప్తు చేయాలని సెబీ ఆదేశించింది.