బర్త్ డే రోజున ఫ్యాన్స్‌కు సర్‌ప్రైజ్ గిఫ్ట్ ఇచ్చిన విశాల్, ప్రేయసితో నిశ్చితార్ధం

ఈ మధ్యకాలంలో ఎందుకోగానీ సెలెబ్రిటీలు సీక్రెట్‌గా ఎంగేజ్‌మెంట్ చేసుకుంటున్నారు. మొన్న కోలీవుడ్ నటి నివేతా పేతురాజ్..ఇవాళ మరో కోలీవుడ్ స్టార్ హీరో విశాల్. హీరోయిన్ సాయి ధన్సికతో నిశ్చితార్ధం చేసుకున్నాడు. ఈ ఫోటోలు ఇప్పుడు వైరల్ అవుతున్నాయి. పూర్తి వివరాలు ఇలా ఉన్నాయి.

తమిళ, తెలుగు హీరో విశాల్ అందరికీ సర్‌ప్రైజ్ ఇచ్చాడు. మరో తమిళ హీరోయిన్ సాయి ధన్సికతో గత కొద్దికాలంగా ప్రేమలో ఉన్న విశాల్ ఇప్పుడు ఆ బంధాన్ని పెళ్లి వరకూ తీసుకొచ్చాడు. తాజాగా ఎవరికీ తెలియకుండా కేవలం కుటుంబసభ్యుల సమక్షంలో ఎంగేజ్‌మెంట్ చేసుకున్నాడు. వాస్తవానికి ఇవాళ ఆగస్టు 29న పెళ్లి చేసుకుంటానని ప్రకటించినా నిశ్చితార్ధంతో సరిపెట్టాడు. త్వరలో పెళ్లి చేసుకోనున్నాడు.

తంజావూరుకు చెందిన సాయి ధన్సికను కోలీవుడ్‌లో మెరీనాగా పిలుస్తారు. తమిళంలో మనతోడు మజైకాలం సినిమాతో ఎంట్రీ ఇచ్చిన మెరీనా ఆ తరువాత కన్నడలో కూడా సినిమాలు చేసింది. కబాలి సినిమాలో సూపర్ స్టార్ రజనీకాంత్ కూతురిగా నటించి మెప్పించింది. షికారు సినిమాతో టాలీవుడ్ ఎంట్రీ ఇచ్చిన సాయి ధన్సిక అలియాస్ మెరీనా తెలుగులో ముద్దుగుమ్మ, అంతిమ తీర్పు, దక్షిణ వంటి సినిమాల్లో చేసింది.

విశాల్-సాయి ధన్సిక కలిసి ఒక్క సినిమా చేయకున్నా..గత 15 ఏళ్లుగా స్నేహితులుగా ఉన్నారు. ఈ స్నేహబంధం కాస్తా ప్రేమగా మారి ఇప్పుడు నిశ్చితార్ధం వరకూ వచ్చింది. ఎంగేజ్‌మెంట్ ఫోటోల్ని విశాల్ స్వయంగా తన సోషల్ మీడియా మాధ్యమంపై షేర్ చేయగా అవిప్పుడు వైరల్ అవుతున్నాయి. విశాల్ తన పుట్టినరోజు నాడే సాయి ధన్సికతో నిశ్చితార్ధం చేసుకుని అభిమానులకు బర్త్ డే రిటర్న్ గిఫ్ట్ ఇచ్చాడు. అందరి ఆశీస్సులు కావాలంటున్నాడు.

నిశ్చితార్ధమైతే సీక్రెట్‌గా జరుపుకుని రివీల్ చేశాడు. మరి పెళ్లి ఎలా చేసుకుంటాడా అనేది ఇప్పుడు చర్చనీయాంశమైంది. విశాల్‌కు తమిళంతో పాటు తెలుగులో కూడా మంచి ఫాలోయింగ్ ఉంది. విశాల్ సినిమాలకు తెలుగులో మార్కెట్ కూడా ఉంది. తన పుట్టినరోజున నిశ్చితార్ధం చేసుకున్న విశాల్..సాయి ధన్సిక పుట్టినరోజున పెళ్లి చేసుకుని సర్‌ప్రైజ్ ఇస్తాడేమో మరి.

Thank u all u darlings from every nook and corner of this universe for wishing and blessing me on my special birthday. Happy to share the good news of my #engagement that happend today with @SaiDhanshika amidst our families.feeling positive and blessed. Seeking your blessings and… pic.twitter.com/N417OT11Um

— Vishal (@VishalKOfficial) August 29, 2025