పార్ట్ టైం జాబ్ స్కామ్స్.. నకిలీ జాబ్ వెబ్ సైట్లను గుర్తించడమెలా? మోసపోకూడదంటే ఏం చేయాలి?

చదువు అయిపోయింది. కుర్రాడు ఇంట్లో ఖాళీగా ఉన్నాడు. పేరుకే ఖాళీ.. కానీ ఉద్యోగాల కోసం వేటలో ఉన్నాడు. అది బయటకు కనబడేది కాదు కాబట్టి తెలియని వాళ్ళు అంటే చుట్టుపక్కల వాళ్ళు.. ‘ఏం బాబు, ఏం చేస్తున్నావ్’ అంటూ మొదలుపెడతారు. ఇక చుట్టుపక్కల వాళ్ళ నుంచి ప్రెజర్ మొదలవుతుంది. ప్రెజర్ కుక్కర్ విజిల్స్ వేసినట్టు.. అడుగుతూనే ఉంటారు. ఈ ప్రెజర్ తట్టుకోలేక పాపం కుర్రాడు.. గూగుల్ లో ఆ సైటు, ఈ సైటు చూసి కనబడిన జాబ్స్ కి అప్లై చేసేయాలనుకుంటాడు. పెద్ద కంపెనీలో జాబ్ వచ్చేలోపు అందాక పార్ట్ టైం జాబ్ చేయాలని అనుకుంటాడు. గూగుల్ లో పార్ట్ టైం జాబ్స్ అని కొట్టగానే వచ్చే పెద్ద లిస్టే వస్తుంది. అందులో ఏది జెన్యూనో, ఏది నకిలీనో అర్ధం కాదు. ఈ కన్ఫ్యూజన్ లోనే లింకులు క్లిక్ చేసేస్తాడు. కట్ చేస్తే ఖేల్ ఖతం, దుకాణ్ బంద్. 

డేటా ఎంట్రీ జాబ్ మోసాలు:

ఆన్ లైన్ మోసాల్లో గత కొన్నేళ్లుగా జరుగుతున్న ప్రధానమైన మోసం డేటాఎంట్రీ. ఇంగ్లీష్ భాషల్లో ఏ భాష వారికి నచ్చని పదం ఈ డేటాఎంట్రీ. డేటా ఎంట్రీ పేరుతో జరిగే మోసాల వల్ల డేటా ఎంట్రీ అంటే అదొక బూతు పదంలాగా అయిపోయింది. ఈ డేటా ఎంట్రీ పేరుతో ఇప్పటికీ మోసాలు జరుగుతున్నాయి. ఇప్పటికీ కొన్ని లక్షల మంది మోసపోతున్నారు. ఈ డేటా ఎంట్రీ స్కామ్ లో రెండు  పద్ధతులు ఉన్నాయి. ఒకటి.. జాబ్ రావాలంటే రిజిస్ట్రేషన్ ఫీజు కింద కొంత డబ్బు చెల్లించమంటారు. రెండోది, ముందు ఒక ప్రాజెక్ట్ ఇచ్చి.. పని పూర్తయ్యాక కన్సల్టేషన్ ఫీజు అని అకౌంట్ లో డబ్బులు వేయమంటారు. అడుక్కోవడంలో ఇదొక రకమైన ట్రెండ్ అన్నమాట. కష్టపడి పని చేయడం చేతకాని వాళ్ళు ఇలా మోసాలకు పాల్పడుతుంటారు. అసలు జాబ్ ఇచ్చేవాడికి డబ్బులెందుకివ్వాలి? పని చేయించుకుంటున్నాడు కాబట్టి, పనిని అమ్ముకుంటున్నాడు కాబట్టి వచ్చిన లాభాల్లోంచి జీతం ఇవ్వాలి. ఇది కదా ప్రాసెస్ ఆఫ్ జాబ్. కానీ ఇలా జరగట్లేదు.

యాక్చువల్లీ మేము జాబ్ చూపిస్తాం సార్, మమ్మల్ని కన్సల్టెంట్స్ అంటారు సార్ అని షో చేస్తారు. మొదటి జీతం వచ్చాక అందులో ఇస్తానంటే.. టాటా, బాయ్ బాయ్ అని చెప్పేసి బ్లాక్ చేసేస్తారు. ఇలా తెగట్లేదని చెప్పి రూట్ మార్చి.. అబ్బే మేము డబ్బులు తీసుకోమండి అని చెప్పి వర్క్ ఇస్తారు. ఇమేజెస్ రూపంలో ఉన్న డేటాని ఎక్సెల్ షీట్ లో ఎక్కించమనో, పీడీఎఫ్ ఫైల్స్ ని డాక్యుమెంట్స్ లో టైప్ చేయమనో చెప్తారు. వారమంతా ఆడతా పాడతా పనిచేస్తే 5 వేలు వస్తాయ్ కదా అని అనుకుంటాడు. ఇంకేముంది పెద్ద గూగుల్ ప్రాజెక్ట్ వచ్చిందని ఫీలైపోయి.. కసిగా వారం రోజుల పాటు టైప్ చేసుకుంటూ కూర్చుంటాడు. ప్రాజెక్ట్ ఫినిష్ అవ్వగానే సబ్మిట్ చేసి కాల్ చేస్తే.. ‘వెరీ గుడ్, చాలా బాగా చేశారు’ అని అంటారు.

మీ ప్రాజెక్ట్ డబ్బులు రావాలంటే మా బ్రోకర్ ఫీజు ఇవ్వాలని, ఒక బ్యాంక్ అకౌంట్ నంబర్ ఇస్తారు. అప్పుడు ‘నాకు రావాల్సిన దాంట్లో కట్ చేసుకుని మిగతా డబ్బులు ఇవ్వండి’ అని అంటే.. వాళ్ళేం చేస్తారో తెలుసా. మీ ఫోన్ నంబర్ బ్లాక్ చేస్తారు. రెస్పాన్స్ ఉండదు. తెలివైన వాళ్ళు శ్రమ మాత్రమే పోయిందని సైడ్ అవుతారు. అమాయకులైతే డబ్బులు కూడా పోయాయని చేతులు కాల్చుకుంటారు. ఇలాంటప్పుడే మనకి గుర్తొచ్చే డవిలాగ్.. “ఈ డేటా ఎంట్రీ జాబులు, పార్ట్ టైం జాబులు మనవల్ల కాదురా. శుభ్రంగా 4 గేదెలు కొనుక్కుని కాసుకుంటే మంచిది” అని అనిపిస్తుంది. గేదెలు కొనడానికైనా డబ్బులు కావాలిగా. ఆ డబ్బుల కోసమైనా ఉద్యోగం కావాలిగా. ఆ ఉద్యోగం రావాలంటే అదో రాజమౌళి ప్రాజెక్ట్ లా టైం పడుతుందిగా. మళ్ళీ కథ మొదలుకొస్తుందిగా. అందాక పార్ట్ టైం జాబ్ చేయాలనిపిస్తుందిగా. ఇంకేముంది ఐపాయ్. 

పార్ట్ టైం జాబ్ మోసాలు:

డేటా ఎంట్రీ జాబ్స్ అంటే నమ్మడం లేదని, కొత్త మోసాలకు పాల్పడుతున్నారు. ఫోన్ కి, వాట్సాప్ లో, మెయిల్స్ కి పార్ట్ టైం జాబ్ పేరుతో మెసేజ్ లు వస్తుంటాయి. వాటిలో కొన్ని లింకులు ఉంటాయి. అప్పుడే ఫ్రెండ్ చెప్పింది గుర్తుకొస్తుంది. ‘పార్ట్ టైం జాబ్స్ ని నమ్మకూడదురా, కొన్ని ఫేక్ ఉంటాయి’ అని ఫ్రెండ్స్ చెప్పింది గుర్తొచ్చి ఆగిపోయినా.. మనసులు ఒకవేళ జెన్యూన్ కంపెనీ అయితే ఏంటి పరిస్థితి అని లోపల సంటోడు ఓ తెగ మారం చేస్తుంటాడు. ఆ సంటోడ్ని సేటిస్ఫై చేయడం కోసం ధైర్యం చెప్పుకుని లింక్ ఓపెన్ చేస్తాడు. ఒక వెబ్ సైట్ ఓపెన్ చేయగానే.. లాగిన్ అవ్వమని అంటుంది. ఆ తర్వాత టాస్కుల రూపంలో కొన్ని పనులు చేయిస్తారు. అవి పూర్తవగానే వెబ్ సైట్ కి సంబంధించిన అతని వాలెట్ లో డబ్బులు జమ చేస్తారు. ఆ డబ్బుల్ని వెంటనే ఆ కుర్రాడు తన అకౌంట్ లోకి ట్రాన్స్ఫర్ చేసుకుంటాడు. కక్కుర్తి పడి ఇంకా సంపాదించాలని ఇంకా టాస్కులు ఉన్నాయేమో అని చూస్తే.. అసలు చిక్కు మొదలవుతుంది.

ఈ టాస్కులు కొనుక్కోవాలి అని గుండె పగిలే అలర్ట్ మెసేజ్ వస్తుంది. సర్లే తక్కువ డబ్బులే కదా అని టాస్కు కొంటాడు. నమ్మకంగా ఉండడం కోసం నకిలీ కంపెనీ మోసగాళ్లు డబ్బులు వేస్తారు. ఇదేదో బాగుందే అని ఎక్కువ డబులొస్తాయన్న ఆశతో ఎక్కువ టాస్కులు కొనుక్కుంటే వాడి ట్రాప్ లో పడినట్టే. ఆ టాస్కులు కొని, పని పూర్తి చేశాక గుండెలో బాంబు పేల్చుతారు. మీ పని డబ్బులు రావాలంటే.. మాకు డబ్బులు కట్టాలి అని అంటారు. ‘మొత్తం మా టైం అంతా వ్యాస్ట్ అయిపోయింది, ఎంతోకొంత ముట్టజెప్పండి’ అని బతిమిలాడినా ప్రయోజనం ఆఫ్ ఇండియా ఉండదన్నమాట. ఇలా మొదట ఆడు ఇచ్చేది అర్ధరూపాయి అయితే.. వీడు కోల్పోయేది వేలల్లో ఉంటుంది. మోసగాళ్లకు మోసగాడు లాంటోడు అయితే ఫస్ట్ టైం ఫ్రీగా టాస్క్ తీసుకుని.. ఫినిష్ చేసి వచ్చిన డబ్బులతో బయటకొచ్చేసి.. ఇలాంటి సైట్లు ఇంకేమైనా ఉన్నాయా అని సెర్చింగులు చేస్తాడు.

వర్క్ ఫ్రమ్ హోమ్ జాబ్ మోసాలు:

ఇంట్లోనే ఉండి నెలకి లక్షల్లో సంపాదించుకోవచ్చు అని మహిళలని టార్గెట్ చేస్తారు. ఫోన్ కి మెసేజ్ లు వస్తాయి. లేదా ఫోన్ చేస్తారు. పలానా కంపెనీ నుంచి ఫోన్ చేస్తున్నాం అని మాట్లాడతారు. మా కంపెనీలో అనేక ఉత్పత్తులు ఉన్నాయని అంటారు. వాటిని మీరు పది మందికి షేర్ చేస్తే.. మీకు డబ్బులు వస్తాయని అంటారు. ఈ కంపెనీలో చేరాలంటే డబ్బులు కట్టాలని అంటారు. 2000 కట్టమంటారు. తక్కువ అమౌంటే కదా అని కడతారు. అయితే మీతో పాటు మందని ఈ ప్రాజెక్ట్ లో చేర్పించండి, కమిషన్ ఇస్తామని ఆశ చూపిస్తారు. ఎంతమందిని చేర్పిస్తే అంతమందికి ఇంత పర్సంటేజ్ చొప్పున కమిషన్ వస్తుంది అని అంటారు. దీంతో పాటు.. మా వెబ్ సైట్ లో బోలెడన్ని బ్యూటీ ప్రాడెక్ట్స్ ఉన్నాయి. అవి షేర్ చేయండి. అవి ఎవరైనా కొంటే మీకు అందులో కూడా కమిషన్ ఇస్తామని అంటారు.

ఇప్పుడు మొదట జాయిన్ అయిన ఆమె ఉంటుంది కదా.. ఆవిడ మేకల మందలా గుంపుని నమ్మించి చేర్పిస్తుంది. ఈవిడ కేజీఎఫ్ లో యష్ రేంజ్ లో ఎలివేషన్ ఇచ్చాక వాళ్లు జాయిన్ అవ్వకుండా ఎలా ఉంటారు చెప్పండి. పాపం ఈవిడ మాటలు నమ్మి 20 మంది 2వేల చొప్పున 40 వేలు కడతారు. వాళ్ళు కంపెనీ ప్రొడక్ట్స్ ని షేర్ చేస్తుంటారు. ఆ స్కామ్ గాడి టార్గెట్ వంద మందో, 2 వందల మందో ఉంటుంది. అది రీచ్ అయ్యే వరకూ వాళ్ళిచ్చిన డబ్బుల్లోంచే ఒక శాతం డబ్బులు ఖర్చు పెట్టి చిన్న చిన్న గిఫ్ట్ లు మొఖాన పడేస్తాడు. మొదట జాయిన్ అయిన ఆమె కళ్ళలో ఆనందం వచ్చేస్తుంది. ఓ మై గాడ్, ఓ మై గాడ్ అని సంబరపడిపోయి ఇంకో పాతిక మందిని జాయిన్ చేస్తుంది. ఈవిడని చూసి మొదట్లో జాయిన్ అయిన 20 మంది కూడా విపరీతంగా నకిలీ కంపెనీ ఉత్పత్తులని ప్రమోట్ చేస్తారు.

ఈ క్రమంలో ఒక నెల పూర్తవుతుంది కదా. ఆమె కమిషన్ ఇవ్వాల్సి ఉంటుంది కదా. మొదట 20 మందిని జాయిన్ చేసినందుకు ఒక్కో మనిషి నుంచి 2వేలలో ఒక వెయ్యో, 5వందలో తీసి.. 20 వేలు లేదా 10 వేలు మొదట జాయిన్ అయిన ఆమె అకౌంట్ లో వేస్తాడు. డౌట్ రాకుండా ఉండాలి కాబట్టి. అయ్యబాబోయ్ మన నాయకురాలికి జీతం కూడా వచ్చిందే అని ఈ 20 మందిలో ఒక్కొక్కరూ కనీసం 10 మంది చొప్పున 200 మందిని జాయిన్ చేస్తారు. 200 కాకపోయినా 100 మందిని జాయిన్ చేసినా.. 2వేల చొప్పున వంద మంది 2 లక్షలు కడతారు. ఇలా వాడి టార్గెట్ కోటి రూపాయలు రీచ్ అయ్యే వరకూ వీళ్ళ డబ్బులనే వీరికి ఇస్తూ ఉంటాడు. ఈలోపు వీళ్ళు బ్యూటీ ప్రొడక్ట్స్ కి టెంప్ట్ అయ్యి కొనకుండా ఉంటారా? మళ్ళీ ఇంట్లో భర్తలకు ఇదొక లాసు.

వాడి కోటి రూపాయల టార్గెట్ రీచ్ అయిన మరు క్షణమే ఫోన్ స్విచ్చాఫ్ అవుతుంది. ప్రతి నెలా వచ్చే కమిషన్ లు ఆగిపోతాయి. అప్పటి వరకూ కమిషన్ మొఖం చూడనోళ్లు తిరుగుబాటు చేస్తారు. ఇంట్లో తపేలాలు, గుండుగులు తెచ్చి మీద ఇసురుతారు. కాసేపు మూడవ ప్రపంచయుద్ధమే జరుగుతుంది. అంతా అయిపోయాక మోసపోయామని రియలైజ్ అవుతారు. ఇది ఒక రకమైన మోసం. వర్క్ ఫ్రమ్ హోమ్ జాబుల పేరుతో ఇలా రకరకాలుగా మోసాలు చేస్తారు. డబ్బులు కట్టి నువ్వు జాయినవ్వు, ఇంకో పది మందిని జాయిన్ చెయ్ అని అంటున్నప్పుడే అర్ధమైపోవాలి. అంతా అయిపోయాక.. ‘మా ఆయన ముందే చెప్పాడురా నేనే వినలేదు. ఐ డిడ్ ఏ మిస్టేక్’ అని అనుకోవడం తప్ప ఏం ఉండదు.  

ఈ నకిలీ కంపెనీలను ఇలా గుర్తించండి:

• పార్ట్ టైం జాబ్ అయినా, వర్క్ ఫ్రమ్ హోమ్ జాబ్ అన్నా కూడా.. మీ బ్యాంకు ఖాతాలు మాత్రమే తీసుకుంటే అనుమానించాల్సిందే. 
• మీ క్వాలిఫికేషన్ డాక్యుమెంట్లు, ఉద్యోగానికి సంబంధించిన ఇతర డాక్యుమెంట్లు అడగడం లేదంటే అనుమానించాల్సిందే.
• మీ ఖాతాలో జీతం వేయడానికి.. మీ నెట్ బ్యాంకింగ్ వివరాలు ఇవ్వండి అని అడిగినా కూడా అనుమానించాల్సిందే. 
• ఉద్యోగంలో చేరాలంటే డబ్బులు కట్టాలి అని అంటారు. ఇది ఘోరంగా అనుమానించాల్సిన విషయం.
• ప్రాజెక్ట్ అయినా, వెబ్ సైట్ లో టాస్కులు అయినా డబ్బులు చెల్లించి కొనుక్కోవాలి అని అడిగితే మొహమాటం లేకుండా బాటా చెప్పు ఎమోజీని వాడికి మెయిల్ లోనో, వాట్సాప్ లోనో పంపండి. 
• ఎంత ఎలాంటి కంపెనీ అయినా సరే ఉద్యోగిని డబ్బులు అడగదు. అడిగితే అనుమానించండి.
• ఇక మీరు చేరి.. కొంతమందిని చేర్చండి అని చెప్పే చెయిన్ ప్రాసెస్ ని బ్రేక్ చేయండి. ప్రపంచంలో ఏ కంపెనీ కూడా ఇలా చెప్పదు.

మోసపోకుండా ఉండాలంటే ఏం చేయాలి?

• స్నేహితుల ద్వారానో, ఫ్రెండ్స్ ద్వారానో ఆన్ లైన్ జాబ్స్ ఉంటే అడిగి తెలుసుకోండి. 
• తెలిసిన వాళ్లు లేకపోతే టాస్కులు, డేటా ఎంట్రీలు కాకుండా.. ఏదైనా కోడింగ్ మీద జాబులు ఉంటే చూసుకోండి.
• ఏదైనా కంపెనీ నుంచి మెయిల్ గానీ, మెసేజ్ గానీ డైరెక్ట్ గా మీ ఫోన్ కి వచ్చిందంటే నమ్మకండి. ఎందుకంటే ఏ కంపెనీ కూడా డైరెక్ట్ గా ఎవరికీ మెసేజ్ పంపదు.
• పార్ట్ టైం జాబ్స్ అని వచ్చే మెసేజులని నమ్మకండి. ఈ విషయంలో మీ తెలివైన ఫ్రెండ్స్ అభిప్రాయాన్ని తీసుకోండి. వారు పర్లేదు ఓకే అంటే వెళ్ళండి. లేదంటే ఆగిపోండి.
• ఏ కంపెనీ పేరుతో అయినా పార్ట్ టైం జాబ్స్ అంటే ముందు ఆ కంపెనీ చరిత్ర ఏంటో, అప్పటి వరకూ ఆ కంపెనీ చేసిన ప్రాజెక్ట్స్ ఏంటో పరిశీలించండి. 
• ఈరోజుల్లో కంపెనీని ప్రతివాడూ రిజిస్టర్ చేయిస్తున్నాడు. గూగుల్ లో సెర్చ్ చేస్తే కంపెనీ వివరాలు వస్తాయి. గూగుల్ లో ఉంది కదా, కంపెనీ జెన్యూన్ అనుకుంటే పొరపాటే. గూగుల్ లో ఉండడం ముఖ్యం కాదు, దానికొక ఘన చరిత్ర ఉండడం కూడా ముఖ్యమే.
• నకిలీ కంపెనీ వివరాలు, మెయిల్ ఐడీ, ఫోన్ నంబర్లు గూగుల్ లో సెర్చ్ చేసి చూడండి. దాని పేరు మీద బాధితులు ఎవరైనా ఫిర్యాదులు చేశారేమో కనబడుతుంది. 
• ట్రూ కాలర్ లో ఫోన్ నంబర్ పరిశీలిస్తే స్పామ్ అని వస్తే.. ఆలోచించకుండా బ్లాక్ చేయండి. 
• ఏ మాత్రం చిన్న సందేహం వచ్చినా వెంటనే వారిని బ్లాక్ చేసేయండి. 
• వాళ్ల వెబ్ సైట్ లో లాగిన్ అయి ఉంటారు కాబట్టి బ్రౌజర్ హిస్టరీని క్లియర్ చేయండి. 
• ఒకవేళ ఏమైనా డబ్బు కట్టి.. మోసపోయి ఉంటే గనుక సైబర్ పోలీసులకు ఫిర్యాదు చేయండి.