follow us:
ప్రభుత్వాలు మారతాయి, హామీలు వస్తాయి… కానీ ఏజెన్సీ ప్రాంతాల గిరిజనుల తలరాతలు మాత్రం మారవు అనడానికి ఇదే నిదర్శనం.వారికి ఏ చిన్న కష్టమొచ్చిన ఆస్పత్రికి వెళ్లాలంటే వాగు దాటుతూ వెళ్తూ పెద్ద సాహసం చేయాల్సిందే.. తాజాగా ఓ గర్భిణి పడిన నరకయాతన చూసి ఆ గ్రామస్తుత గుండెలు మండిపోయాయి. అధికారుల చుట్టూ తిరగడం దండగ అనుకుని, ఇంటింటికీ రెండేసి వందలు వేసుకొని, ఆ రాత్రికి రాత్రే వాగుపై రాతి వారధిని నిర్మించి చరిత్ర సృష్టించారు. ఈ స్పూర్తి గాధ ఏపీలోని అల్లూరి సీతారామరాజు జిల్లా లో జరిగింది..
అల్లూరి సీతారామరాజు జిల్లా… ప్రకృతి అందాలకు నిలయమే కాదు, గిరిజనుల నిత్య పోరాటాలకు ప్రతీక. ఈ జిల్లాలోని గూడెంకొత్తవీధి మండలం, ధారకొండ పంచాయతీ పరిధిలో మూడు మారుమూల గ్రామాలున్నాయి. అభివృద్ధికి ఆమడ దూరంలో ఉన్న ఆ ప్రాంత ప్రజలకు రోడ్డు సౌకర్యం అనేది కేవలం ఒక కల మాత్రమే. ఏ చిన్న అనారోగ్య సమస్య వచ్చినా, ప్రసవ వేదనతో ఏ మహిళ బాధపడినా ఆసుపత్రికి చేర్చాలంటే ప్రాణాలు అరచేతిలో పెట్టుకోవాల్సిందే. కొండలు, వాగులు దాటుకుంటూ కిలోమీటర్ల కొద్దీ నడవడమే అక్కడి ప్రజల దినచర్య. అక్కడ జరిగిన ఒక హృదయ విదారక ఘటనే ఆ గ్రామస్థుల ఆలోచన ధోరణిని పూర్తిగా మార్చేసింది. ఇటీవల కాలంలో తడకపల్లి గ్రామానికి చెందిన ఒక గర్భిణి తీవ్రమైన ప్రసవ నొప్పులతో అల్లాడిపోయింది. సరైన రోడ్డు లేకపోవడంతో ఆమెను ఆసుపత్రికి తరలించడానికి అంబులెన్స్ వచ్చే మార్గమే లేకపోయింది. చేసేది లేక గ్రామస్థులు ఆమెను డోలీలో మోసుకుంటూ ఏకంగా ఎనిమిది కిలోమీటర్ల దూరం నడిచి ఆసుపత్రికి చేర్చాల్సి వచ్చింది. ఆ మార్గమధ్యంలో ఆ గర్భిణి పడ్డ నరకయాతన, ఆమె కుటుంబ సభ్యులు పడిన వేదన ఆ ఊరి ప్రజల గుండెలను పిండేసింది. “ఇంకెంతకాలం ఈ చావు బతుకులు? ప్రభుత్వాలు మారినా మన గతి మారదా?” అనే ప్రశ్న అందరిలోనూ ఆగ్రహాన్నిగురిచేసింది..
ఎవరికోసమో ఎదురుచూడటం కంటే, మన సమస్యను మనమే పరిష్కరించుకోవాలని ఆ మూడు గ్రామాల ప్రజలు నిర్ణయించుకున్నారు. వెంటనే అందరూ ఒక తాటిపైకి వచ్చి అద్భుతమైన ఐక్యతను ప్రదర్శించారు. ఇంటింటికీ రూ. 200 చొప్పున విరాళాలు పోగుచేశారు. ఆ వచ్చిన డబ్బులతో కూలీ సామాగ్రిని సమకూర్చుకున్నారు. ఆ తర్వాత ఊరి యువకులు, పెద్దలు అంతా కలిసి రంగంలోకి దిగారు. పట్టుదల ఉంటే కొండనైనా పిండి చేయవచ్చన్నట్లుగా… శ్రమదానంతో రాత్రికి రాత్రే వాగుపై రాతి కట్టడాలతో ఒక తాత్కాలిక వారధిని నిర్మించారు. ఆ ప్రజల కఠిన శ్రమ ఫలితంగా ఇప్పుడు ఆ వాగుపై చిన్నపాటి వంతెన సిద్ధమైంది. దీనితో ఇప్పుడు ఆ గ్రామాల ప్రజల రాకపోకలు సులభమయ్యాయి. టూవీలర్లు, జీపులు, ట్రాక్టర్లు ఆ రాతి వారధిపై నుంచి సునాయాసంగా రాకపోకలు సాగిస్తున్నాయి. నిత్యావసర సరుకులు తెచ్చుకోవడానికి, అత్యవసర వేళల్లో ఆసుపత్రికి వెళ్లడానికి రవాణా సౌకర్యం ఏర్పడింది. తమ కష్టాలను తామే తీర్చుకున్న ఆ గిరిజనుల సంకల్పం అందరిచేత శభాష్ అనిపిస్తోంది.
అయితే, గ్రామస్థులు చెబుతున్న మాట మరొకటి ఉంది. తాము కట్టుకున్నది తాత్కాలిక వంతెన మాత్రమేనని, వర్షాకాలంలో వాగు ఉప్పొంగితే ఇది కొట్టుకుపోయే ప్రమాదం ఉందని వారు ఆందోళన చెందుతున్నారు. గతంలో భారీ వర్షాలకు కొట్టుకుపోయిన చోట ఒక పక్కా వంతెనను , అలాగే మంచి రోడ్డును నిర్మించి తమ ప్రాంతాన్ని అభివృద్ధి చేయాలని వారు ప్రభుత్వాన్ని కోరుతున్నారు
