చెన్నై మెట్రో రెండో దశ ప్రారంభం.. ప్రధాని మోదీ, సీఎం విజయ్ కలిసి ప్రయాణం

చెన్నై మెట్రో రెండో దశలో భాగంగా అత్యంత కీలకమైన పూనమల్లి నుంచి వడపళని వరకు ఉన్న 15 కిలోమీటర్ల ఎలివేటెడ్ కారిడార్‌ను ప్రధాని నరేంద్ర మోదీ ఘనంగా ప్రారంభించారు. ఈ ప్రారంభోత్సవ కార్యక్రమంలో తమిళనాడు సీఎం విజయ్ తో కలిసి ప్రధాని మోదీ స్వయంగా మెట్రో రైలులో ప్రయాణించి ప్రయాణికులతో ముచ్చటించారు. రాష్ట్ర గవర్నర్ విశ్వనాథ్ అర్లేకర్ సమక్షంలో సాగిన ఈ కార్యక్రమం రాజకీయంగా, దేశవ్యాప్తంగా కూడా తీవ్ర ఆసక్తిని రేకెత్తించింది. ఈ సందర్భంగా ప్రధాని మోదీ స్వయంగా మెట్రో టికెట్ కొనుగోలు చేసి, కౌంటర్లో ఉన్న ఉద్యోగితో కాసేపు సరదాగా మాట్లాడారు

చెన్నై నగరంలో పబ్లిక్ ట్రాన్స్‌పోర్ట్‌ను విప్లవాత్మకంగా మార్చిన మెట్రో ప్రాజెక్ట్ ప్రయాణం చాలా ఏళ్ల క్రితమే ప్రారంభమైంది. చెన్నై మెట్రో ఫస్ట్ ఫేజ్ పనులు 2009లోనే మొదలుకాగా, 2015 నాటికి తొలి సర్వీసులు ప్రారంభమయ్యాయి. క్రమక్రమంగా విస్తరిస్తూ తొలి దశకు సంబంధించిన 54.1 కిలోమీటర్ల పూర్తి మార్గం 2019 ఫిబ్రవరి నాటికి పూర్తిగా అందుబాటులోకి వచ్చింది. ఫస్ట్ ఫేజ్‌లో రెండు ప్రధాన కారిడార్లు ఉండగా, నగర వాసులు వీటిని విపరీతంగా ఆదరించారు. దీంతో మరింత రద్దీని నియంత్రించేందుకు, నగర విస్తరణకు అనుగుణంగా కేంద్ర ప్రభుత్వం రెండో దశకు అంకురార్పణ చేసింది. కేంద్ర మంత్రి అమిత్ షా 2020 నవంబర్ 21న చెన్నై మెట్రో రెండో దశ పనులకు శంకుస్థాపన చేసిన విషయం తెలిసిందే.

కారిడార్ 3 విషయానికొస్తే.. మాధవరం నుంచి సిప్‌కాట్ వరకు 45.8 కిలోమీటర్ల మేర సాగుతుంది. ఇక కారిడార్ 4 లైట్ హౌస్ నుంచి పూనమల్లి వరకు 26.1 కిలోమీటర్ల దూరం ఉంటుంది. కారిడార్ 5 మాధవరం నుంచి షోల్లింగనూర్ వరకు 47 కిలోమీటర్ల మేర విస్తరించి ఉంది. ప్రస్తుతం ప్రధాని మోదీ ప్రారంభించిన 15 కి.మీ. మార్గం రెండో దశలోని నాలుగో కారిడార్‌లో భాగమైన పూనమల్లి బైపాస్ – వడపళని ఎలివేటెడ్ కారిడార్‌ కావడం విశేషం. ఈ కొత్త రూట్‌లో మొత్తం 11 మెట్రో స్టేషన్లు అందుబాటులోకి వచ్చాయి

సెకండ్ ఫేజ్‌లోని మూడు కారిడార్లు ఇంకా పూర్తిస్థాయిలో అందుబాటులోకి రాలేదు. అయితే, 2028 నాటికి మొత్తం 118.9 కిలోమీటర్ల మేర ఈ మూడు కారిడార్లను పూర్తి చేయాలని చెన్నై మెట్రో రైల్ కార్పొరేషన్ లక్ష్యంగా పెట్టుకుంది. 2028 నాటికి ఈ రెండో దశ పనులన్నీ పూర్తయితే, చెన్నై నగరంలో మొత్తం మెట్రో నెట్‌వర్క్ పొడవు ఏకంగా 173 కిలోమీటర్లకు చేరుకుంటుంది. దీనిద్వారా దేశంలో అత్యధిక పొడవైన మెట్రో మార్గం కలిగిన నగరాల జాబితాలో చెన్నై నాలుగో స్థానానికి ఎగబాకే అవకాశం ఉంది. ప్రస్తుతం ఈ జాబితాలో తొలి స్థానంలో ఢిల్లీ, రెండో స్థానంలో ముంబై, మూడో స్థానంలో బెంగళూరు నగరాలు కొనసాగుతున్నాయి.

ఇదే సమయంలో మన తెలుగు రాష్ట్రంలోని హైదరాబాద్ మెట్రో విషయానికి వస్తే.. ప్రస్తుతం నగరంలో 67 కి.మీ. మెట్రో మార్గం అందుబాటులో ఉంది. అయితే, మరో 162.5 కి.మీ. మేర రెండో దశను రాష్ట్ర ప్రభుత్వం ప్రతిపాదించినప్పటికీ, మెట్రో డీపీఆర్ కు కేంద్రం నుంచి ఇంకా గ్రీన్ సిగ్నల్ రాలేదు. ఫేజ్ 2ఏ, ఫేజ్ 2బీ కింద పలు కారిడార్లు ప్రణాళికలో ఉన్నప్పటికీ, డీపీఆర్‌కు ఆమోదం లభించకపోవడంతో 2028 నాటికి హైదరాబాద్‌లో రెండో దశ పూర్తికావడం కష్టమని పలువురు అభిప్రాయడుతున్నారు. ఏదేమైనా చెన్నై మెట్రో రెండో దశ విస్తరణ దక్షిణ భారతదేశంలోనే రవాణా రంగానికి ఒక పెద్ద బూస్ట్ అని చెప్పవచ్చు.