follow us:
గెలవాలంటే చెమట చుక్క చిందించాల్సిందే.. గెలుపు తలుపు తట్టాలంటే.. ఆశయం నెరవేరే వరకు ఆగకుండా పరిగెత్తాల్సిందే! గమ్యం ఏదైనా, మార్గంలో ఎన్ని కష్టాలు ఎదురైనా, పట్టుదల ఉంటే ప్రాప్తించని విజయమంటూ ఏదీ ఉండదని నిరూపించింది ఓ మహిళ.. చీరకట్టులో, కాళ్లకు చెప్పులు కూడా లేకుండా మండుటెండలో ఆమె సాగించిన పరుగు.. కేవలం ఒక ఉద్యోగం కోసం కాదు, తన పిల్లల భవిష్యత్తు కోసం ఒక తల్లి చేసిన అలుపెరగని పోరాటం..
ఝార్ఖండ్‌లోని రామ్‌గఢ్ జిల్లా సోసో గ్రామానికి చెందిన కవితా కుమారి జీవితం అనేక విషాదాల సమ్మేళనం. భర్తను కోల్పోయి, అభాగ్యులైన ఇద్దరు పిల్లలు, వృద్ధులైన అత్తమామల బాధ్యతను ఒంటరిగా మోస్తోంది ఆమె. కుటుంబ బండిని లాగడం కష్టంగా మారిన తరుణంలో, ప్రభుత్వ ఉద్యోగం సాధిస్తే తన కుటుంబానికి భరోసా దొరుకుతుందని బలంగా నమ్మింది. రామ్‌గఢ్‌లో జరుగుతున్న హోంగార్డు రిక్రూట్‌మెంట్‌కు దరఖాస్తు చేసుకుంది. అయితే, పేదరికం ఆమె ప్రతి అడుగుకూ అడ్డుగోడగా నిలిచింది. కనీసం రన్నింగ్ షూస్ కొనుక్కునేందుకు, ట్రాక్‌సూట్ వేసుకునేందుకు కూడా ఆమె వద్ద డబ్బులు లేవు. కానీ కష్టాలను చూసి కుంగిపోలేదు. తన కన్నీళ్లను ఒత్తిడిలా కాకుండా పట్టుదలగా మార్చుకుంది. రోజూ తెల్లవారుజామున 4 గంటలకే నిద్రలేచి, ఎవరూ చూడని వేళల్లో చీరకట్టుతోనే ప్రాక్టీస్ మొదలుపెట్టింది…భౌతిక సామర్థ్య పరీక్షల్లో భాగంగా 1600 మీటర్ల దూరాన్ని 10 నిమిషాల్లో పూర్తి చేయాల్సి ఉండగా.. కవితా కుమారి చీరకట్టుతో, కాళ్లకు చెప్పుల్లేకుండా మండుటెండలో పరుగెత్తి కేవలం 6 నిమిషాల్లోనే గమ్యస్థానాన్ని చేరుకుని అందరినీ విస్మయపరిచింది. ఆమె పట్టుదలను చూసిన అక్కడి అధికారులతో పాటు సోషల్ మీడియాలో చూసిన ప్రతి ఒక్కరూ భావోద్వేగానికి లోనయ్యారు. ఈ వార్త వైరల్ కావడంతో స్థానిక రన్నింగ్ గ్రూప్ సభ్యులు ఆమె ఇంటికి వెళ్లి అండగా ఉంటామని భరోసా ఇచ్చారు.
ఇక రామ్‌గఢ్‌లో మొత్తం 284 హోంగార్డు పోస్టుల భర్తీ ప్రక్రియ అక్టోబర్ 24 నుంచి నవంబర్ 5 వరకు జరుగుతోంది. ఇందులో 50 శాతం పోస్టులు మహిళలకు, అదనంగా 5 శాతం పోస్టులు వితంతువులు, విడాకులు తీసుకున్న మహిళలకు కేటాయించారు. ఆర్థిక, వ్యక్తిగత సవాళ్లు ఎదురైనా, పిల్లల భవిష్యత్తు కోసం కవితా కుమారి కనబరిచిన స్ఫూర్తి ఎందరికో ఆదర్శంగా నిలుస్తోంది “కష్టాలు ఎవరికైనా వస్తాయి, కానీ వాటిని మెట్లుగా మార్చుకుని ఎదిగేవాడే నిజమైన హీరో. కవితా కుమారి కేవలం ఒక ఉద్యోగం కోసం పరుగెత్తలేదు.. తన పిల్లల భవిష్యత్తుకు బంగారు బాట వేసుకోవడానికి పరుగెత్తింది. ఈ సమాజానికి ఆమె ఒక నడయాడే స్ఫూర్తి…
