రాజ్య సభలో అరుదైన దృశ్యం.. చైర్మన్ హోదాలో పిటి ఉష

పార్లమెంట్ బడ్జెట్ సమావేశాలు వాడీ వేడిగా సాగుతున్నాయి. ఈ సారి పార్లమెంట్ బడ్జెట్ సమావేశాలు రెండు దశల్లో జరగనున్నాయి. తొలి విడతలో భాగంగా జనవరి 31న మొదలు కాగా, ఫిబ్రవరితో ముగుస్తుంది. రెండవ విడత మార్చి 13న మొదలై ఏప్రిల్ 6వ తేదీ వరకు కొనసాగనుంది. ఇప్పటికే దేశాన్ని కుదుపేస్తున్న అదానీ అంశంపై అటు లోక్ సభలోనూ, ఇటు రాజ్యసభలోనూ చర్చించాలని విపక్షాలు పట్టుబడుతున్నాయి. వాయిదాల పర్వంతో ఇరు సభలు నెట్టుకొస్తున్నాయి. ప్రతిపక్ష నేత రాహుల్ గాంధీ వాగ్బాణాలు సంధిస్తుంటే, ఇటు ప్రధాని మోడీ తమదైన వాగ్ధాటితో సమాధానాలు ఇస్తున్నారు. అయితే ఈ సమావేశాల్లో భాగంగా పెద్దల సభ (రాజ్యసభ)లో ఓ అరుదైన దృశ్యం ఆవిష్కృతమైంది.

ఎగువ సభలో ఛైర్మన్ హోదాలో ప్రముఖ అథ్లెట్ పిటి ఉష కూర్చొని సభా కార్యకలాపాలను నిర్వహించారు. దీనికి సంబంధించిన వీడియోను ట్విట్లర్ లో షేర్ చేసిన ఆమె.. ఆ మైలు రాయిని చేరుకోవడం వెనుక ఆనందాన్ని వ్యక్తం చేశారు. ‘ప్రాంక్లిన్ డి. రూజ్‌వెల్డ్ చెప్పినట్లుగా గొప్పశక్తి గొప్ప బాధ్యతలను కలిగి ఉంటుంది. రాజ్యసభ సెషన్ నిర్వహిస్తున్నప్పుడు నాకు అలాంటి భావనే కలిగింది. ప్రజలు నాపై ఉంచిన నమ్మకం, విశ్వాసంతో ఈ ప్రయాణంలో మైలురాయిని చేరుకుంటానని ఆశిస్తున్నాను’అంటూ ట్వీట్ చేశారు. కాగా, ఆమెకు కూడా పలువురు శుభాకాంక్షలు తెలియజేస్తున్నారు. ‘గర్వంగా ఉంది ఉష. మీరు మరింత ముందుకు సాగాలి. మరోసారి మీరు చరిత్ర సృష్టించాలి’, నిజమైన సాధికారత, ఆల్ ది బెస్ట్ అంటూ కామెంట్స్ చేస్తున్నారు.

పిటి ఉష 2022 జులైలో బీజెపీ తరుఫున ఎగువ సభకు నామినేట్ అయిన సంగతి విదితమే. చైర్మన్, డిప్యూటీ ఛైర్మన్ అందుబాటులో లేనప్పుడు వైస్ ఛైర్ పర్సన్స్ కమిటీలోని సభ్యులు ఎవరో ఒకరు సభా అధ్యక్ష బాధ్యతలు చేపడతారు. ఆ ప్యానల్లో మొదటి నామినేటెడ్ గా పిటి ఉష ఉండటంతో ఆమె ఈ బాధ్యతలు చేపట్టారు. గత ఏడాది నవంబర్‌లో ఆమె భారత ఒలంపిక్ సంఘం అధ్యక్షురాలిగా కూడా ఉష ఎన్నికయ్యారు. పయ్యోలి ఎక్స్‌ప్రెస్‌గా ప్రసిద్ధి చెందింది. ఆసియా గేమ్స్‌లో పలుమార్లు స్వర్ణ పతాకం సాధించారు. 1984 లాస్ ఏంజిల్స్ లో జరిగిన ఒలంపిక్స్ గేమ్స్‌లో నాలుగో స్థానంలో నిలిచారు. రాజ్య సభ చైర్మన్ హోదాలో పిటి ఉష బాధ్యతలు చేపట్టడంపై మీ అభిప్రాయాలను కామెంట్ల రూపంలో తెలియజేయండి.

“Great power involves great responsibility” as said by Franklin D. Roosevelt was felt by me when I chaired the Rajya Sabha session. I hope to create milestones as I undertake this journey with the trust and faith vested in me by my people.
🎥 @sansad_tv pic.twitter.com/bR8wKlOf21

— P.T. USHA (@PTUshaOfficial) February 9, 2023