follow us:
ఆకాశంలో వేల అడుగుల ఎత్తు… విమానంలో 174 మంది ప్రాణాలు… గమ్యం ఇజ్రాయెల్‌లోని టెల్ అవీవ్… కాక్‌పిట్‌లో మాత్రం ప్రాణాంతక పోరాటం. ఒక్క క్షణం తేడా జరిగి ఉంటే ప్రపంచాన్ని కుదిపేసే మహా విషాదం జరిగి ఉండేది. కానీ అక్కడ నిలబడ్డది ఒక భారతీయుడు. తన ప్రాణం పోతున్నా ప్రయాణికుల ప్రాణాలను కాపాడేందుకు చివరి శక్తి వరకు పోరాడిన కెప్టెన్ స్మిత్ మచ్చర్. ఇవాళ ప్రపంచం ముందు మరోసారి భారతీయుడి ధైర్యం ఏమిటో చూపించిన వ్యక్తి.
దుబాయ్ నుంచి టెల్ అవీవ్‌కు బయలుదేరిన Flydubai FZ1073 విమానంలో కెప్టెన్ స్మిత్ మచ్చర్‌పై కోపైలట్ దాడి చేశాడు. విమానాన్ని కూల్చే ప్రయత్నం జరిగింది. పరిస్థితి అత్యంత ప్రమాదకరంగా మారింది. తీవ్రంగా గాయపడిన స్మిత్ మచ్చర్ మాత్రం లొంగిపోలేదు. తన శరీరం సహకరించకపోయినా కాక్‌పిట్ డోర్ తెరిచాడు. అదే ఈ ఘటనలో అత్యంత కీలకమైన మలుపు. ప్రయాణికులు, సిబ్బంది జోక్యం చేసుకునే అవకాశం వచ్చింది. దాడి చేసిన వ్యక్తిని అదుపులోకి తీసుకున్నారు. చివరకు విమానం సౌదీ అరేబియాలోని తబూక్‌లో సురక్షితంగా దిగింది. అయితే ఈ కథను కేవలం 174 మంది ప్రాణాలు కాపాడిన ఘటనగానే చూస్తే… అసలు కథలో సగమే చూసినట్టు అవుతుంది. ఎందుకంటే ఈ విమానం వెళ్తున్నది ఇజ్రాయెల్‌కు. దాన్ని నడిపిస్తున్న కెప్టెన్ భారతీయుడు. భారత్–ఇజ్రాయెల్ మధ్య ఇవాళ ఉన్న సంబంధం సాధారణ దౌత్య సంబంధం కాదు. 2026 ఫిబ్రవరిలోనే రెండు దేశాలు తమ సంబంధాలను “Special Strategic Partnership for Peace, Innovation and Prosperity” స్థాయికి తీసుకెళ్లాయి
వ్యవసాయం నుంచి నీటి నిర్వహణ వరకు… రక్షణ రంగం నుంచి సైబర్ సెక్యూరిటీ వరకు… అత్యాధునిక టెక్నాలజీ నుంచి శాస్త్రీయ పరిశోధన వరకు… భారత్, ఇజ్రాయెల్ పరస్పరం కలిసి పనిచేస్తున్నాయి. ఉగ్రవాదంపై పోరాటం, భద్రతా సహకారం కూడా ఈ బంధంలో కీలకమైన అంశాలు. భారత ప్రధాని నరేంద్ర మోదీ 2017లో చేసిన చారిత్రక ఇజ్రాయెల్ పర్యటన… నెతన్యాహు 2018లో చేసిన భారత పర్యటన… ఆ తర్వాత రెండు దేశాల మధ్య పెరిగిన వ్యూహాత్మక సహకారం… ఇవన్నీ భారత్–ఇజ్రాయెల్ మధ్య ఏర్పడిన పరస్పర విశ్వాసానికి ఉదాహరణలు. ఇక్కడే ఒక్కసారి మరో పరిస్థితిని ఊహించండి. స్మిత్ మచ్చర్ ఆ కాక్‌పిట్ డోర్ తెరవలేకపోయి ఉంటే..? విమానంపై పూర్తిగా నియంత్రణ కోల్పోయి ఉంటే..? ఆ విమానం ఇజ్రాయెల్ భూభాగంలో ఏదైనా జనావాస ప్రాంతాన్ని లేదా కీలకమైన నిర్మాణాన్ని ఢీకొట్టి ఉంటే..? 9/11ను గుర్తుచేసే భయానక దృశ్యం కనిపించి ఉంటే..? అప్పుడు ప్రపంచవ్యాప్తంగా ఎన్ని ప్రశ్నలు వచ్చేవి?
విమానానికి కెప్టెన్ భారతీయుడు కావడంతో మొదటి గంటల్లోనే “కాక్‌పిట్‌లో ఏం జరిగింది..? భారతీయ కెప్టెన్ పాత్ర ఏమిటి..?” అనే ప్రశ్నలు ప్రపంచ మీడియా నుంచి వచ్చేవి. పూర్తి నిజాలు బయటకు రాకముందే సోషల్ మీడియాలో ప్రచారాలు మొదలయ్యే అవకాశం ఉండేది. భారత్‌ను వ్యతిరేకించే శక్తులు ఈ ఘటనను తమ ప్రచారానికి ఉపయోగించుకునే ప్రయత్నం చేసే ప్రమాదం ఉండేది. అంతర్జాతీయంగా భారతదేశం వివరణ ఇవ్వాల్సిన పరిస్థితి కూడా ఏర్పడి ఉండేది. అంతేకాదు… భారత్–ఇజ్రాయెల్ మధ్య దశాబ్దాలుగా నిర్మించుకున్న విశ్వాసంపై కూడా కనీసం తాత్కాలికంగా అనుమానాల నీడ పడే ప్రమాదం ఉండేది. అయితే ఇవన్నీ జరగలేదు. కారణం… అదే కాక్‌పిట్‌లో ఉన్న భారతీయ కెప్టెన్ తన ప్రాణాలను సైతం లెక్కచేయకుండా పోరాడటం.
ఇక్కడ విధి ఎంత విచిత్రంగా ఉందో చూడండి. భారతీయుడు ఉన్నందుకు ప్రశ్నలు వచ్చే పరిస్థితి ఏర్పడాల్సిన చోట… అదే భారతీయుడు ఉండటం వల్ల 174 మంది ప్రాణాలు నిలిచాయి. అదే భారతీయుడి ధైర్యం కారణంగా ఇవాళ ఇజ్రాయెల్ నుంచి ప్రశంసలు వస్తున్నాయి. ఇజ్రాయెల్ ప్రధాని బెంజమిన్ నెతన్యాహు స్వయంగా కెప్టెన్ స్మిత్ మచ్చర్ ధైర్యాన్ని ప్రశంసించారు. భారత ప్రధాని నరేంద్ర మోదీ కూడా ఆయన సాహసాన్ని కొనియాడారు. అంటే ఇది ఒక పైలట్‌కు వచ్చిన ప్రశంస మాత్రమే కాదు… అత్యంత క్లిష్టమైన సమయంలో ఒక భారతీయుడు చూపించిన ధైర్యానికి వచ్చిన అంతర్జాతీయ గౌరవం
భారతదేశం ప్రపంచానికి ఎప్పుడూ చెప్పేది ఒక్కటే… శాంతి కావాలి… ఉగ్రవాదానికి స్థానం ఉండకూడదు… మిత్రదేశాలతో పరస్పర విశ్వాసం ఉండాలి. అదే సమయంలో అవసరం వచ్చినప్పుడు మిత్రదేశాలకు అండగా నిలబడే సంప్రదాయం కూడా భారత్‌కు ఉంది. ఇప్పుడు అదే విలువలను ఒక సాధారణ భారత పౌరుడు ఆకాశంలో తన చర్యలతో చూపించాడు. స్మిత్ మచ్చర్ అక్కడ భారత ప్రభుత్వ ప్రతినిధిగా లేడు… భారత సైనికుడిగా లేడు… ఒక ప్రొఫెషనల్ పైలట్‌గా తన బాధ్యత నిర్వర్తించాడు. కానీ ప్రాణాలకు తెగించి ఆయన చేసిన పని చివరకు భారతదేశానికే గర్వకారణంగా మారింది.
ఇక్కడ హీరోయిజం అంటే మాటలు కాదు…రక్తం కారుతున్నా బాధ్యతను వదలకపోవడం. ప్రాణం ప్రమాదంలో ఉన్నా 174 మంది గురించి ఆలోచించడం. పడిపోతున్నా కాక్‌పిట్ తలుపు తెరవడం. అదే కెప్టెన్ స్మిత్ మచ్చర్ చేసిన సాహసం. ఆయన కాపాడింది కేవలం ఒక విమానాన్ని కాదు… 174 కుటుంబాల్లో కన్నీళ్లు రాకుండా చేశాడు. ఒక భారీ విమాన విషాదాన్ని అడ్డుకున్నాడు. భారత్ పేరు అనుమానాలతో వినిపించే పరిస్థితికి బదులుగా… “ఒక భారతీయుడు మమ్మల్ని కాపాడాడు” అనే గౌరవంతో వినిపించేలా చేశాడు. అందుకే ఈ ఘటన తర్వాత ప్రపంచం మాట్లాడుతున్న పేరు… కెప్టెన్ స్మిత్ మచ్చర్. దేశం ఏంటో మ్యాప్ చెబుతుంది… కానీ ఆ దేశ ప్రజల స్వభావం ఏంటో ఇలాంటి సమయాల్లో వాళ్ల చర్యలు చెబుతాయి.
ఆకాశంలో ప్రాణాలతో పోరాడిన ఆ భారతీయుడు… 174 మంది ప్రాణాలను కాపాడిన ఆ పైలట్…మిత్రదేశ ప్రజలను కాపాడేందుకు తన ప్రాణాన్ని పణంగా పెట్టిన ఆ కెప్టెన్… ఇవాళ భారత్‌కు గర్వకారణం…
కెప్టెన్ స్మిత్ మచ్చర్
