follow us:
యూట్యూబ్ అంటే.. ఒకప్పుడు కేవలం టైంపాస్‌కి మాత్రమే అన్నట్లు ఉండేది. వీడియోలు, సినిమాలు చూడటం మాత్రమే అన్నట్లు ఉండేది. అయితే మారుతున్న టెక్నాలజీకి తగ్గట్టుగా.. యూట్యూబ్ కూడా రకరకాల ఫీచర్లను అందుబాటులోకి తీసుకొస్తుంది. ప్రస్తుతం ఎన్నో కుటుంబాలకు యూట్యూబ్ ఆదాయవనరుగా మారింది. టాలెంట్‌ ఉండి.. అవకాశాల కోసం ఎదురు చూసేవారికి యూట్యూబ్ మంచి ఫ్లాట్‌ఫామ్‌గా మారింది. వంటలు మొదలు.. కంప్యూటర్‌ లాంగ్వేజెస్‌ వరకు ఇలా దేనిలో అయినా సరే మన ప్రతిభ గురించి పది మందికి తెలియాలన్నా.. వీటిల్లో మనం ఏది నేర్చుకోవాలన్నా యూట్యూబే దిక్కు అన్నట్లుగా పరిస్థితి మారింది. ప్రతి అంశానికి సంబంధించిన వీడియోలు యూట్యూబ్‌లో అందుబాటులో ఉన్నాయి. కొన్నేళ్లుగా.. చాలా మంది సొంతంగా చానెల్స్‌ క్రియేట్‌ చేసుకుని.. వీడియోలు అప్‌లోడ్‌ చేస్తూ.. ఆదాయం ఆర్జిస్తున్నారు. యూట్యూబ్ ద్వారా ఏడాదికి కోట్ల రూపాయల ఆదాయాన్ని ఆర్జిస్తున్నవారు కూడా ఎందరో ఉన్నారు.
అయితే లాక్‌డౌన్‌ తర్వాత పరిస్థితులు పూర్తిగా మారిపోయాయి. మరీ ముఖ్యంగా సినిమా షూటింగ్‌లకు బ్రేక్‌ పడటంతో చాలా మంది సెలబ్రిటీలకు తీరిక దొరకడం ఒక ఎత్తయితే.. ఆదాయం వనరులు మూసుకుపోయినట్లు అయ్యింది. దాంతో సెలబ్రిటీల చూపు యూట్యూబ్ మీద పడింది. ప్రస్తుతం బుల్లితెర, బిగ్‌ స్క్రీన్‌, యాంకర్లు, ఇలా వారు వీరు అనే తేడా లేకుండా ప్రతి ఒక్కరు యూట్యూబ్ చానెల్స్‌ ప్రారంభించి.. వీడియోలు అప్‌లోడ్‌ చేస్తూ.. ఆదాయం ఆర్జిస్తున్నారు.
వీరంతా యూట్యూబ్‌లోకి ఎంటరయిన కొత్తలో వారి వ్యక్తిగత విషయాలు, హోమ్‌ టూర్‌లు, ఫ్రిడ్జ్‌ టూర్‌లు ఇలాంటి వీడియోలు పోస్ట్‌ చేసేవారు. కానీ ప్రస్తుతం ఆ ట్రెండ్‌ మారింది. షాపింగ్‌ వీడియోలు పెడుతున్నారు. కారు, బంగారం, ఇల్లు కొన్నాం అంటూ వరుసగా షాపింగ్‌ వీడియోలు పోస్ట్‌ చేస్తున్నారు. ఈ క్రమంలో రెండు రోజుల క్రితం బిగ్‌బాస్‌ ఫేం హిమజ.. బీఎండబ్ల్యూ కార్‌ కొన్నాను అంటూ వీడియో అప్‌లోడ్‌ చేసింది. కారు ధర, ఫీచర్లు ఇలా అన్ని వివరాలు చెప్పుకొస్తూ.. ఆఖర్లో భారీ షాకిచ్చింది. తాను కారు కొనడం.. దాని ఫీచర్లను ఎక్స్‌ప్లేయిన్‌ చేయడం కల అంటూ వివరణ ఇచ్చింది.
ఈ వీడియో చూసిన తర్వాత సోషల్‌ మీడియాలో.. సెలబ్రిటీలు పోస్ట్‌ చేసే షాపింగ్‌ వీడియోల మీద చర్చ మొదలయ్యింది. అంటే వారు షాపింగ్‌ చేయకపోయినా.. ఆయా మాల్స్‌, బ్రాండ్స్‌కి సంబంధించిన ఉత్పత్తులను ప్రమోట్‌ చేయవచ్చు అనే విషయం హిమజ పోస్ట్‌ చేసిన బీఎండబ్ల్యూ కారు వీడియో ద్వారా అర్థం అయ్యింది. దీని ప్రకారం చూస్తే.. కొందరు సెలబ్రిటీలు.. నెలలో 4-5 షాపింగ్‌ వీడియోలు పోస్ట్‌ చేయడంపై అనుమానాలు వ్యక్తం అవుతున్నాయి.
చాలా మంది సెలబ్రిటీలు.. బంగారం కొన్నాం, ఆభరణాలు తీసుకున్నాం.. ఖరీదైన పట్టు చీరలు కొన్నాం అంటూ అప్‌లోడ్‌ చేసే వీడియోలు అన్ని ప్రమోషన్‌వే అయ్యి ఉండవచ్చు. ఎంత సెలబ్రిటీలు అయినా సరే.. నెలలో పది సార్లు బంగారం, బ్రాండెడ్‌ బట్టలు షాపింగ్‌ చేసేంత సీన్‌ ఉండదు. వీరంతా తమ అతి తెలివితో జనాలు పిచ్చి వాళ్లను చేస్తున్నారంటూ కామెంట్స్‌ చేస్తున్నారు. ప్రమోషన్ల కోసం మరీ ఇంత కక్కుర్తి పడాలా అని ట్రోల్‌ చేస్తున్నారు. ఏది ఏమైనా హిమజ పోస్ట్‌ చేసిన బీఎండబ్ల్యూ వీడియో తర్వాత సెలబ్రిటీల షాపింగ్‌ వీడియోల మీద నమ్మకం పోతుంది అంటున్నారు నెటిజనులు.
View this post on Instagram
