‘ఐఫోన్’ అంటే జనాలకు ఎందుకంత పిచ్చి? లక్షలు పెట్టడానికి వెనుకాడరు ఎందుకు..?

Written By: Govardhan Reddy
Published Date - Sat - 14 January 23

గాడ్జెట్ ప్రేమికులకు ఐఫోన్ అంటే ఎంత ప్రేమో ప్రత్యేకంగా చెప్పక్కర్లేదు. పేరుకు ఎక్కువమంది వాడేవి ఆండ్రాయిడ్ ఫోన్లు అయినా వాడాలి అనుకునేవి మాత్రం ఆపిల్ ఐఫోన్ లే. అందరకీ ఐఫోన్ అంటే పిచ్చే.. జీవితంలో ఒక్కసారైనా ఐఫోన్ ని వాడాలి అనుకుంటున్న వారు ఇప్పటికీ ఎందరో ఉన్నారు. కాకుంటే.. ధర ఎక్కువ కావడంతో కొనడానికి వెనుకడుగు వేస్తుంటారు. ఐఫోన్ అంటే ఎందుకంత క్రేజ్? ధర ఎక్కువున్నా కొనడానికి ఎందుకు వెనుకాడట్లేరు..? మిగతా స్మార్ట్‌ఫోన్లకు ఐఫోన్‌కు ఉన్న తేడా ఏంటి? ఐఫోన్.. స్టేటస్ సింబల్ హా..? వంటి పలు ప్రశ్నలకు ఇప్పుడు సమాధానాలు చూద్దాం.

ప్ర‌స్తుతం స్మార్ట్‌ఫోన్ ప్ర‌పంచంలో కేవ‌లం రెండు ఫోన్ల‌కు చెందిన కంపెనీలే రాజ్య‌మేలుతున్నాయి. ఒకటి గూగుల్‌.. మ‌రొక‌టి యాపిల్‌. గూగుల్, ఆండ్రాయిడ్ ఆప‌రేటింగ్ సిస్ట‌మ్ ద్వారా మ‌న‌కు దగ్గరైతే, యాపిల్‌, ఐఓఎస్ ఆప‌రేటింగ్ సిస్ట‌మ్‌ ద్వారా మనకు దగ్గరయ్యింది. స‌హ‌జంగానే ఆండ్రాయిడ్ క‌న్నా ఐఫోన్లు ఖ‌రీదు ఎక్కువ. మ‌రి రెండూ ఫోన్లే క‌దా.. ఈ రెండింటిలో ఐఫోన్ల‌కే ఎందుకంత క్రేజ్ అంటే.. స్టేటస్ సింబల్. సెక్యూరిటీ, డిస్‌ప్లే, ట‌చ్ ఇంట‌ర్ ఫేస్, ఆప‌రేటింగ్ సిస్ట‌మ్, కెమెరా.. వంటి ఫీచర్లు బాగుంటాయి అని చెప్తున్నప్పటికీ.. అసలు నిజం స్టేటస్ సింబల్. చాలావరకు ఐఫోన్లను అందుకే కొనుగోలు చేస్తుంటారు. ఇది చేతిలో ఉందంటే.. రాజసం ఉట్టిపడుతున్నట్లే వారి లెక్క.

ఐఫోన్ అంటే ఎందుకంత క్రేజ్ అని చెప్పే మరికొన్ని ఉదాహరణలు..

సెక్యూరిటీ

ఆండ్రాయిడ్ ఫోన్ల క‌న్నా ఐఫోన్లే ఎక్కువ సుర‌క్షితం. ఇది వాస్తవం. ఆండ్రాయిడ్ ఫోన్లను చాలా సుల‌భంగా హ్యాకింగ్ చేయ‌వ‌చ్చు. కానీ ఐఫోన్ల‌ను హ్యాకింగ్ చేయడం అంత తేలికైన పని కాదు. అందుకోసం.. యాపిల్ కంపెనీ ఏటా కోట్లు ఖర్చుపెడుతోంది. అందువ‌ల్ల ఐఫోన్ల‌లో డేటా సుర‌క్షితంగా ఉంటుంది. ఒక‌వేళ ఎవ‌రైనా ఐఫోన్‌ను పోగొట్టుకున్నా స‌రే.. ‘ఫైండ్ మై ఐఫోన్’ స‌హాయంతో చాలా సుల‌భంగా వెతికి ప‌ట్టుకోవ‌చ్చు. అదే.. ఆండ్రాయిడ్ ఫోన్ అయితే దాని ఐఎంఈఐ కూడా మార్చేస్తున్నారు. పోయిందంటే.. ఇక మనకు రాదు అన్నట్లే లెక్క. ఐఫోన్ ఇష్టపడటానికి ఇది బలమైన పాయింట్.