‘కాంతార’ మూవీ చూసిన సూపర్ స్టార్ రజినీ! ఏమన్నారంటే..

కొద్దిరోజులుగా దేశవ్యాప్తంగా సినీ అభిమానులను విశేషంగా ఆకట్టుకుంటున్న చిత్రం ‘కాంతార‘. కన్నడలో తెరకెక్కిన ఈ విలేజ్ బ్యాక్ డ్రాప్ మిస్టీరియస్ థ్రిల్లర్ సినిమా.. ఇటీవలే తెలుగుతో పాటు హిందీ, తమిళ భాషలలో కూడా విడుదలై మంచి విజయాన్ని నమోదు చేసింది. మొదటి రోజునుండే హైలీ పాజిటివ్ టాక్ సొంతం చేసుకున్న కాంతార.. కన్నడతో పాటు రిలీజైన అన్ని భాషల్లోనూ అద్భుతమైన కలెక్షన్స్ రాబడుతోంది. కేవలం రూ. 20 కోట్ల బడ్జెట్ తో కేజీఎఫ్ ఫేమ్ హోంబలే ఫిలిమ్స్ వారు నిర్మించిన ఈ సినిమా.. తాజాగా రూ. 200 కోట్ల గ్రాస్ వసూల్ చేసినట్లు ట్రేడ్ వర్గాలు తెలిపాయి.

కన్నడ స్టార్ రిషబ్ శెట్టి హీరోగా నటించి, దర్శకత్వం వహించిన ఈ కాంతార మూవీ.. తుళునాడుకు చెందిన ఓ తెగకు చెందిన కథాంశంతో రూపుదిద్దుకుంది. అలాగే ఆ తెగకు సంబంధించి సాంప్రదాయ భూతకోల నృత్యం, వారు పూజించే దైవం.. వారి జీవన విధానాన్ని తెరపై అందంగా, ఎమోషనల్ గా చూపించిన తీరుకు వీక్షకులంతా ఫిదా అయిపోయారు. ముఖ్యంగా క్లైమాక్స్ కి వచ్చేసరికి రిషబ్ శెట్టి వీరంగం సినిమాకే హైలైట్ గా నిలిచింది. ఈ సినిమాను రూ. 2 కోట్ల బ్రేక్ ఈవెన్ టార్గెట్ తో తెలుగులో అల్లు అరవింద్ రిలీజ్ చేయగా.. ఇప్పటివరకు సినిమా దాదాపు రూ. 15 కోట్లకు పైగా షేర్ వసూల్ చేయడం విశేషం.

ఈ క్రమంలో కాంతార సినిమాకు అన్ని భాషల ప్రేక్షకుల నుండి పాజిటివ్ టాక్ రాగా, సినీ ప్రముఖులు సైతం సినిమాపై ప్రశంసలు కురిపించడం చెప్పుకోదగ్గ విషయం. తాజాగా కాంతార చిత్రంపై సూపర్ స్టార్ రజినీకాంత్ ప్రశంసలు కురిపించారు. ఈ నేపథ్యంలో కాంతార చిత్రాన్ని వీక్షించిన రజినీ.. ట్విట్టర్ వేదికగా స్పందించారు. “తెలిసిన దానికన్నా తెలియనిది ఎక్కువ. సినిమాలో ఈ విషయాన్నీ మీకంటే బాగా ఎవరూ చెప్పలేరని హోంబలే ఫిలిమ్స్ ని కొనియాడిన రజినీ.. కాంతార ఇండియన్ హిస్టరీలో మాస్టర్ పీస్ గా నిలుస్తుందని అన్నారు. అలాగే రైటర్, డైరెక్టర్, యాక్టర్ రిషబ్ శెట్టికి హ్యాట్సాఫ్” అని తెలిపారు రజినీ. ప్రస్తుతం కాంతార చిత్రంపై రజినీ చేసిన ట్వీట్ నెట్టింట వైరల్ గా మారింది. మరి రజినీ ట్వీట్ పై కాంతార టీమ్ ఎలా స్పందిస్తుందో చూడాలి.

“The unknown is more than the known” no one could have said this better in cinema than @hombalefilms #KantaraMovie you gave me goosebumps @shetty_rishab Rishab hats off to you as a writer,director and actor.Congrats to the whole cast and crew of this masterpiece in indian cinema

— Rajinikanth (@rajinikanth) October 26, 2022